Last updated on January 6th, 2026 at 07:42 am
ಕುಡ್ಲ, ಜ. 05: ಜವನ್ದಿ ಒರ್ತಿ ಗುರುಪುರ ಸಂಕೊರ್ದು ಸುದೆಕ್ ಲಾಗಿದ್ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಸೋಮವಾರ ನಡತ್ದ್ಂಡ್. ಆತ್ಮಹತ್ಯೆ ಮಲ್ತೊಂದಿನ ಪೊಣ್ಣನ್ ಬೆದ್ರದ ಕಡೆಪಲ್ಲ ನಿವಾಸಿ ನವ್ಯಾ(20) ಪನ್ದ್ ಗುರ್ತ ಪತ್ತ್ದೆರ್.
ಮಧ್ಯಾಹ್ನದ ಪೊರ್ತುಗು ದೋಸ್ತಿನೊಟ್ಟುಗು ಸ್ಕೂಟರ್ಡ್ ಬತ್ತಿನ ನವ್ಯಾ ಗುರುಪುರ ಸಂಕೊದಡೆ ಎತ್ತ್ನಗ ಸ್ಕೂಟರ್ ಉಂತಾದ್ ಯಾನ್ ಸುದೆಕ್ ಲಾಗ್ಯುವೆ ಪನ್ದ್ ಲಾಗಿದಲ್. ಈ ಪೊರ್ತುಡು ದೋಸ್ತಿ ಕೈ ಪತ್ತ್ದ್ ಒಯ್ತ್ಂಡಲಾ ಆಲೆಗ್ ನವ್ಯಾನ್ ಬದ್ಕಾಯೆರ ಆತಿಜಿ. ವಿಷಯ ತೆರಿದ್ ಅಪಗನೇ ಪೊಲೀಸೆರ್, ಅಗ್ನಿ ಶಾಮಕ ದಳೊದ ಸಿಬ್ಬಂದಿಲು ಬತ್ತ್ದ್ ಪುನೊನು ಮಿತ್ತ್ ಕನತ್ದೆರ್. ಬಜ್ಪೆ ಪೊಲೀಸ್ ಸ್ಟೇಶನ್ ಸೀಮೆಡ್ ಪ್ರಕರಣ ನಡತ್ದ್ಂಡ್.
ನವ್ಯಾ ಒರಿ ಜವನನ್ ಮೋಕೆ ಮಲ್ತೊಂದಿತ್ತ್ದ್, ಆಯೆ ಮದಿಮೆ ಆಪೆ ಪನ್ದ್ ನಂಬಾದ್ ದಗೆ ಮಲ್ತ್ದೆಗೆ ಪನ್ದ್ ಪನೊಂದುಲ್ಲೆರ್. ಆಯನ್ ತಿಕ್ಯೆರೆ ಬೋಡಾದ್ ಕಾಲ್ಲಾ ಮಲ್ತಿತ್ತಲ್, ಬೊಕ್ಕ ಡೆತ್ ನೋಟ್ ಬರೆತಲ್ ಪನ್ದ್ ಪನ್ತೆರ್. ಪೊಲೀಸೆರ್ ಈ ಬಗೆಟ್ ಜಡ್ತೆ ಮಲ್ತೊಂದುಲ್ಲೆರ್.