Last updated on January 5th, 2026 at 11:13 am
ಸುಳ್ಯ, ಜ. 05: ತನ್ನ ಮೂಜಿ ವರ್ಸ ಪ್ರಾಯೊದ ಬಾಲೆನ್ ಸೊಂಟೊಗು ಕಟೊಂದು ಅಪ್ಪೆ ಒರ್ತಿ ಇಲ್ಲ ಬರಿತ ಕೆದುಕ್ ಲಾಗಿದ್ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಬೆಳ್ಳಾರೆ ಪೊಲೀಸ್ ಸ್ಟೇಶನ್ ಸೀಮೆಡ್ ಐತಾರ ನಡತ್ದ್ಂಡ್.
ಸುಳ್ಯ ತಾಲೂಕ್ದ ಕೊಡಿಯಾಲ ಗ್ರಾಮೊದ ಆರ್ವಾರ ಹರೀಶ್ ಪನ್ಪಿನಾರೆನ ಬೊಡೆದಿ ಮಧುಶ್ರೀ (34) ಬೊಕ್ಕ ಆರೆನ ಮೂಜಿ ವರ್ಸ ಪ್ರಾಯೊದ ಬಾಲೆ ಧನ್ವಿ ತೀರ್ದಿನಕುಲು. ಶನಿವಾರ ರಾತ್ರೆ ಇಲ್ಲದಕ್ಲೆ ಒಟ್ಟುಗು ಬೇಲೆ ಮಾತಾ ಮಲ್ತ್ದ್ ಜೆತ್ತಿತ್ತಿನ ಮಧುಶ್ರೀ ಮೇರ್ ಬೊಕ್ಕ ಬಾಲೆ ಐತಾರ ಕಾಂಡೆ ತೋಜಂದೆ ಇಪ್ಪುನಗ ಒರ್ಮೆಲಾ ನಾಡ್ದೆರ್. ಈ ಪೊರ್ತುಡು ಇಲ್ಲ ಬರಿತ ಕೆದುಟ್ ಮಧುಶ್ರೀ ಬೊಕ್ಕ ಬಾಲೆದ ಪುನ ತಿಕ್ಕ್ದ್ಂಡ್. ಮಧುಶ್ರೀ ಬಾಲೆದೊಟ್ಟುಗು ಕೆದುಕ್ ಲಾಗಿದ್ ಆತ್ಮಹತ್ಯೆ ಮಲ್ತೊಂದಿನ ಬಗೆಟ್ ಶಂಕೆ ಉಂಡಾತ್ಂಡ್.
ಪುತ್ತೂರು ತಾಲೂಕ್ದ ಉಲಮೊಗೇರ್ ಗ್ರಾಮೊದ ಮಧುಶ್ರೀ ಮೆರೆನ್ ನಾಲ್ ವರ್ಸೊಗು ದುಂಬು ಹರೀಶ್ ಪನ್ಪಿನಾರೆಗ್ ಕೊರ್ದು ಮದಿಮೆ ಮಲ್ತಿತ್ತೆರ್. ಆತ್ಮಹತ್ಯೆಗ್ ಪತ್ತ ನೆವನ ತೆರಿದ್ ಬೈದಿಜಿ. ಬೆಳ್ಳಾರೆ ಪೊಲೀಸೆರ್ ಬತ್ತ್ದ್, ಪರಿಶೀಲನೆ ಮಲ್ತ್ದ್ ಪ್ರಕರಣ ದಾಕಲ್ತೊಂದೆರ್.
ಮಧುಶ್ರೀ ಕೆದುಕ್ ಲಾಗ್ಯೆರೆ ದುಂಬು ತನ್ನ ಸೊಂಟಗ್ ಬಾಲೆನ್ ಕುಂಟುಡು ಕಟೊಂದು ಕೆದುಕ್ ಲಾಗಿದೆರ್. ಕೆದುಟು ಪುನ ತಿಕ್ಕ್ನಗ ಬಾಲೆ ಅಪ್ಪೆನ್ ತರ್ಕ್ದ್ ಪತ್ತಿಲೆಕ ಇತ್ತ್ಂಡ್.