Last updated on January 21st, 2026 at 09:14 am
ಸುಳ್ಯ, ಜ. 21: ಬೆಳ್ಳಾರೆ ಗ್ರಾಮೊದ ದರ್ಖಾಸ್ಡ್ ಅಪ್ರಾಪ್ತ ಪೊಣ್ಣಗ್ ಲೈಂಗಿಕ ಕಿರುಕುಳ ಕೊರ್ತಿನ ಪ್ರಕರಣೊಡು ಆರೋಪಿಗ್ ಪೋಕ್ಸೋ ವಿಶೇಷ ನ್ಯಾಯಂತಡೆ 5 ವರ್ಸೊದ ಸಾದಾ ಕರ್ಪಿಲ್ಲ ಶಿಕ್ಷೆ ಕೊರ್ದು ತೀರ್ಪು ಕೊರ್ತುಂಡು. ಬೆಳ್ಳಾರೆ ದರ್ಖಾಸ್ ನಿವಾಸಿ ಎಂ. ಸೆಲ್ವಕುಮಾರ್ ಆರೋಪಿ.
ಆರೋಪಿ ಸೆಲ್ವಕುಮಾರ್ ದರ್ಖಾಸ್ಡ್ ಬಾಡಾಯಿದ ಇಲ್ಲಡ್ ಇತ್ತ್ದ್, 2020ದ ಏಪ್ರಿಲ್ 1 ತಾನಿ ಅಪ್ರಾಪ್ತ ಪ್ರಾಯೊದ ಪೊಣ್ಣಗ್ ಚಾಕಲೇಟ್ ದ ತೊಡು ತೋಜಾದ್ ಲೈಂಗಿಕ ಕಿರುಕುಳ ಕೊರ್ತೆ ಪನ್ದ್ ಆರೋಪ ಇತ್ತ್ಂಡ್. ಈ ಬಗೆಟ್ ಪೊಣ್ಣನ ಅಪ್ಪೆ ಬರೆಪಾದಿನ ಒಯಿಲ್ದ ಆಧಾರೊಡು ಬೆಳ್ಳಾರೆ ಪೊಲೀಸೆರ್ ಪ್ರಕರಣ ದಾಕಲ್ತೊಂದು ಆರೋಪಿನ್ ಕೈದ್ ಮಲ್ತಿತ್ತೆರ್. ಬೊಕ್ಕ ಜಡ್ತೆ ಮಲ್ತ್ದ್ ನ್ಯಾಯಂತಡೆಕ್ ದೋಷಾರೋಪಣಾ ಪಟ್ಟಿ ಸಂದಾದಿತ್ತೆರ್.
ಈ ಪ್ರಕರಣೊನು ಪುತ್ತೂರ್ದ 5ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ, ಬೊಕ್ಕ ಪೊಕ್ಸೋ ವಿಶೇಷ ನ್ಯಾಯಂತಡೆಡ್ ವಿಚಾರಣೆ ಮಲ್ತಿತ್ತ್ದ್, ಒಟ್ಟು 17 ಸಾಕ್ಷಿಲೆನ್ ಪರಿಶೀಲನೆ ಮಲ್ತ್ದೆರ್. ಬೆಳ್ಳಾರೆ ಪೊಲೀಸೆರ್ ಆರೋಪಿನ ಮಿತ್ತ್ ಸಮಗ್ರ ಬೊಕ್ಕ ಸ್ಪಷ್ಟ ಸಾಕ್ಷ್ಯೊಲೆನ್ ಮಂಡನೆ ಮಲ್ತ್ದೆರ್.
ರಡ್ಡ್ ಕಡೆತಕಲೆನ ವಾದ ಕೇನ್ಡಿನ ನ್ಯಾಯಾಧೀಶೆದಿ ಸರಿತಾ ಡಿ., ಆರೋಪಿನ ಮಿತ್ತ್ ಇಪ್ಪುನ ಆರೋಪೊಲು ಸಾಬೀತ್ ಆತ ಪನ್ದ್ ತೀರ್ಮಾನ ಗೆತೊಂದು, ಪೊಕ್ಸೋ ಕಾಯ್ದೆದ ಅಡಿಟ್ 5 ವರ್ಸ ಸಾದಾ ಕರ್ಪಿಲ್ಲ ಶಿಕ್ಷೆ ಬೊಕ್ಕ ರೂ. 20,000 ದಂಡ ಪಾಡ್ದೆರ್. ದಂಡ ಕಟ್ಟೆರಾಯಿಜಿಂಡ ಎಚ್ಚಿಗೆ 6 ತಿಂಗೊಲು ಸಾದಾ ಕರ್ಪಿಲ್ಲ ಶಿಕ್ಷೆ ಅನುಭವಿಪೊಡು ಪನ್ದ್ ಆದೇಶ ಕೊರ್ತೆರ್.