Last updated on January 21st, 2026 at 11:00 am
ಕಾನ್ಪುರ, ಜ. 21: ಇರ್ವೆರೆನಲಾ ಲವ್ ಮ್ಯಾರೇಜ್, ಅಪ್ಪೆಅಮ್ಮನ ವಿರೋಧ ಕಟೊಂದು ಮದಿಮೆ ಆದಿತ್ತೆರ್. ಎಡ್ಡೆಡ್ ಸಂಸಾರ ಮಲ್ತೊಂದುಪ್ಪೊಡಾಯಿನ ಪೊಂಜೊವು ಬೇತೆ ಆಂಜೊವುಲೆನ ಒಟ್ಟುಗು ಜೆತ್ತ್ದ್ ಕೊಲೆ ಆತಲ್. ಮದಿಮೆ ಆದ್ ಕಾಲಿ ನಾಲ್ ತಿಂಗೊಲು ಕರಿದಿತ್ತ್ಂಡ್, ಕಂಡನೆ ತನ್ನ ಬೊಡೆದಿನ್ ಕೆಕ್ಕಿಲ್ ಪೊಜೆಂಕ್ದ್ ಕೆರ್ತಿನ ನಡಕೆ ಉತ್ತರ ಪ್ರದೇಶೊದ ಕಾನ್ಪುರಡ್ ನಡತ್ದ್ಂಡ್.
ತನ್ನ ಬೊಡೆದಿ ಬೇತೆ ಇರ್ವೆರ್ ಆಂಜೊವುನಕ್ಲೆ ಒಟ್ಟುಗು ಜೆತ್ತಿನೆನ್ ತೂದು ಶಾಕ್ ಆಯಿನ ಕಂಡನೆ ಬೇತೆ ಅಲೆಚನೆ ಮಲ್ಪಂದೆ ಆಲೆನ ಕೆಕ್ಕಿಲ್ ಪೊಜೆಂಕ್ದ್ ಕೆರ್ತಿನ ನಡಕೆ ವರದಿ ಆತ್ಂಡ್.
ಪುನೊನು ಕಂಬೊಲಿಡ್ ಸುತ್ತ್ದ್ ಮನದಾನಿ ಪೊಲೀಸ್ ಸ್ಟೇಶನ್ಡ್ ಸರೆಂಡರ್ ಆತೆ. ಆರೋಪಿ ಸಚಿನ್ ಸಿಂಗ್ ಕರಿನ ಒಂಜಿ ತಿಂಗೊಲುರ್ದಿಂಚಿ ತನ್ನ ಬೊಡೆದಿ ಶ್ವೇತಾ ಸಿಂಗ್ನ ಒಟ್ಟುಗು ಬಾಡಾಯಿದ ಇಲ್ಲಡ್ ಇತ್ತೆ. ಪಾಕ ರ್ಸೊರ್ದಿಂಚಿ ಒರಿಯನೊರಿ ಮೋಕೆ ಮಲ್ತೊಂದಿತ್ತಿನ ಮೊಕುಲು ಇಲ್ಲದಕ್ಲೆನ ಒಪ್ಪಿಗೆ ಇಜ್ಜಿಂಡಲಾ ಮದಿಮೆ ಆದಿತ್ತೆರ್, ನ್ಯಾಯಂತಡೆಡ್ ಮದಿಮೆದ ರಿಜಿಸ್ಟರ್ ಮಲ್ತಿತ್ತೆರ್.
ಸಚಿನ್ ಪೊಲೀಸೆರೆಡ ಪನ್ತಿನ ಪ್ರಕಾರ, ತನ್ನ ಬೊಡೆದಿನ ನಡಕೆದ ಬಗೆಟ್ ಅನುಮಾನ ಬೈದಿತ್ತ್ಂಡ್. ತಾನ್ ಬೇಲೆಗ್ ಪಿದಯಿ ಪೋದುಪ್ಪುನಗ, ಮಹಾರಾಜಪುರದ ಎಂಜಿನಿಯರಿಂಗ್ ಕಾಲೇಜ್ದ ಕೈತಲ್ ಒಂಜಿ ಇಲ್ಲಡ್ ಇತ್ತಿನ ಇರ್ವೆರ್ ಎಂಜಿನಿಯರಿಂಗ್ ವಿದ್ಯಾರ್ಥಿಲೆನ ಒಟ್ಟುಗು ಆಲ್ ಸಂಬಂಧ ಬುಲೆಪಾವೊಂದಲ್ ಪನ್ದ್ ಕಂಡನೆ ಆರೋಪ ಮಲ್ತ್ದೆ.
ರಡ್ಡ್ ದಿನೊಕು ದುಂಬು ಎನ್ನ ಬೊಡೆದಿಗ್ ಯಾನ್ ಊರ್ಗ್ ಪೋಪೆ, ಆನಿ ರಾತ್ರೆ ಪಿರ ಬರ್ಪುಜಿ ಪನ್ದ್ ಪನ್ಡ್ದ್ ಪೋದು, ರಾತ್ರೆನೇ ತೆರಿಪಾವಂದೆ ಇಲ್ಲಡೆ ಪಿರ ಬತ್ತಿತ್ತೆ ಪನ್ದ್ ಸಚಿನ್ ಪೊಲೀಸೆರೆಗ್ ತೆರಿಪಾದೆ. ರಾತ್ರೆ ನೆನೆಪಂದೆ ಪಿರ ಬನ್ನಗ ಎನ್ನ ಬೊಡೆದಿ ಇರ್ವೆರ್ ಆಣುಲೆನ ಒಟ್ಟುಗು ಹಾಸಿಗೆಡ್ ಜೈದಿನೆನ್ ತೂಯೆ ಪನ್ದ್ ಪನ್ತೆ.
ಎನ್ನ ಮೊಬೈಲ್ಡ್ ವೀಡಿಯೊ ರೆಕಾರ್ಡ್ ಮಲ್ತ್ದೆ, ಬೊಕ್ಕ ಎನ್ನ ಬೊಡೆದಿ ಆ ಆಣುಲೆಡ ಎಂಕ್ ಆಕ್ಯೆರೆ ಪನ್ಡಿನೆಕ್ ಅಕುಲು ಎಂಕ್ ಆಕ್ಯೆರ್ ಪನ್ದ್ ಪನ್ತೆ. ಪೊಲೀಸೆರ್ ಮಾತೆರೆನ್ಲಾ ಸ್ಟೇಶನ್ಗ್ ಲೆತೊಂದು ಪೋದಿತ್ತೆರ್. ಸಚಿನ್ ಅಧಿಕಾರಿಲೆಗ್ ಈ ವಿಷಯೊನು ನನ ದುಂಬು ಕೊನೊಯೆರೆ ಇಷ್ಟ ಇಜ್ಜಿ , ಉಂದೆಕ್ ಯಾನೇ ಪಿರಿಕಟ್ಟ್ ಮಲ್ಪುವೆ ಪನ್ದ್ ಪನ್ಡ್ದ್ ಇಲ್ಲಗ್ ಪಿರ ಬತ್ತಿತ್ತೆ.
ಇಲ್ಲಗ್ ಪಿರ ಬತ್ತಿ ಬೊಕ್ಕ, ಬೊಡೆದಿ ಆಯನ್ ಬುಡ್ದ್ ಆ ಇರ್ವೆರೆ ಒಟ್ಟುಗೇ ಇಪ್ಪುವೆ ಪನ್ದ್ ಪೋಡಿಕಟ್ಟಾದಲ್ಗೆ, ಬೊಕ್ಕ ಇರ್ವೆರೆ ನಡುಟು ಲಡಯಿ ಆತ್ಂಡ್. ಪಿಸ್ರ್ಡ್ ತನ್ನ ಬೊಡೆದಿನ್ ಕೆಕ್ಕಿಲ್ ಪೊಜೆಂಕ್ದ್ ಕೆರ್ತೆ ಪನ್ದ್ ಸಚಿನ್ ಪನ್ತೆ. ಆಲೆನ ಪುನೊನು ಕಂಬೊಲಿಡ್ ಸುತ್ತ್ದ್ ಬಾಡಾಯಿದ ಅದೆಟ್ ಬುಡ್ದು ಪೋತೆ.
ಮನದಾನಿ, ಕೈತಲ್ದ ಪೊಲೀಸ್ ಸ್ಟೇಶನ್ಗ್ ಪೋದು ಅಪರಾಧೊನು ಒತ್ತೊನ್ದೆ. ಕಂಬೊಲಿಡ್ ಪುನ ತಿಕ್ಕ್ದಿತ್ತ್ದ್, ಆರೋಪಿನ್ ವಶೊಕು ಗೆತೊಂದು ಜಡ್ತೆ ಮಲ್ತೊಂದುಲ್ಲೆರ್.