ತುಳು ಭಾಷೆನ್ ರಾಜ್ಯೊಡು ಅಧಿಕೃತ ಭಾಷೆ ಆದ್ ಘೋಷಣೆ ಮಲ್ಪೆರ ಕುಡೊರ ಸದನೊಡು ಪ್ರಶ್ನೆ ಕೇನ್ಡೆರ್ ಪುತ್ತೂರು ಶಾಸಕೆ ಅಶೋಕ್ ರೈಕುಲು; ಏಪೊಲ್ದ ಲೆಕ ಮೊರಂಗೈಗ್ ನೆಯಿ ಪೂಜಿದ್ ನಕ್ಕೆರೆ ಪನ್ಡಿಲೆಕಂದಿನ ಸದು ಕೊರ್ನ ಸಚಿವೆರ್..!

Last updated on January 28th, 2026 at 01:25 pm

ಬೆಂಗಳೂರು, ಜ. 28: ತುಳು ಭಾಷೆಗ್ ಕರ್ನಾಟಕ ರಾಜ್ಯೊಡು ಅಧಿಕೃತ ಭಾಷೆದ ಸ್ಥಾನಮಾನ ಪಾಕ ವರ್ಸೊರ್ದಿಂಚಿ ತುಳುವೆರೆ ಕನ ಆದುಂಡು. ಇನಿ ಆಪುಂಡು, ಎಲ್ಲೆ ಆಪುಂಡು ಪನ್ದ್ ತುಳುವೆರ್ ಕಾತಿನವೇ ಬತ್ತ್ಂಡ್. ಪ್ರತಿ ಸರ್ತಿಲಾ ಮಲ್ಪುವ ಮಲ್ಪುವ ಪನ್ಪಿನ ಸದು ಅತ್ತಂದೆ ಏಪ ಮಲ್ಪುವೆರ್ ಪನ್ಪಿನ ಸದು ತಿಕ್ಕೊಂದಿಜ್ಜಿ. ಇನಿ ನಡತಿನ ವಿಶೇಷ ಅಧಿವೇಶನೊಡ್ಲಾ ಈ ಕತೆನೇ ರಿಪೀಟ್ ಆತ್ಂಡ್.

ಪುತ್ತೂರು ಶಾಸಕೆ ಅಶೋಕ್ ಕುಮಾರ್ ರೈಕುಲು ಈ ಬಗೆಟ್ ಪ್ರಶ್ನೆ ಕೇನ್ದ್, ತುಳುಕು ಮೂಜಿ ಮೂಜರೆ ಸಾರ ವರ್ಸೊದ ಪರತಿರಿ ಉಂಡು, ಲಿಪಿ ಉಂಡು. ಗೂಗಲ್ ಟ್ರಾನ್ಸ್‌ಲೇಷನ್ ಉಂಡು, ಜರ್ಮನಿ ಫ್ರಾನ್ಸ್‌ಡ್ ಅಧ್ಯಯನ ಮಲ್ಪೆರೆ ಅವಕಾಶ ಉಂಡು, ವಿವಿ ಡ್ ಪರೀಕ್ಷೆ ಬರೆಪುನ ವ್ಯವಸ್ಥೆಲಾ ಉಂಡು. ಬೇತೆ ರಾಜ್ಯೊಲೆಡ್ ಒಂಜೆರ್ದ್ ಎಚ್ಚ ಅಧಿಕೃತ ಭಾಷೆಲು ಉಲ್ಲ. ಯಾನ್ ಶಾಸಕೆ ಆದ್ ಬತ್ತಿನೆರ್ದಿಂಚಿ ತುಳುನು ಎಚ್ಚಿಗೆದ ಅಧಿಕೃತ ಭಾಷೆ ಮಲ್ಪುನ ಬಗೆಟ್ ಕೇನೊಂದುಲ್ಲೆ, ಎನ್ನ ಕಡೀರ ಪ್ರಶ್ನೆಲಾ ಅವ್ವೇ ಆದಿತ್ತ್ಂಡ್. ಆಂಧ್ರ, ವೆಸ್ಟ್ ಬೆಂಗಾಲ್‌ದ ಸ್ಟಡಿ ಮಲ್ತ್‌ದ್ಂಡ್, ಆಂಧ್ರಗ್ ಟೀಮ್ ಪೋದುಲಾ ಬೈದ್ಂಡ್. ಆಂಡ ಇಂದೆಕ್ ಮಾತ ಕಡೆ ಏಪ? ಏಪ ತುಳು ಈ ರಾಜ್ಯೊದ ಅಧಿಕೃತ ಭಾಷೆ ಆಪುಂಡು? ದಾಯೆ ಈ ವಿಷಯ ಏಪೊಲ ದುಂಬು ದುಂಬು ಪೋಪುಂಡು ಪನ್ದ್ ಸಭಾಧ್ಯಕ್ಷೆರೆನ ಮುಕೇನ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರೆಡ ಪ್ರಶ್ನೆ ಕೇನ್ಡೇರ್.

ಇಂದೆತ ಬೆರಿಕೇ ಪಾತೆರ್ನ ಶಾಸಕೆ ಕಾಮತ್ ಮೋಹನ್ ಆಳ್ವೆರೆನ ನರದಿ ಅನುಷ್ಠಾನ ಆವೊಡು ಪನ್ದ್ ಪನ್ಡೆರ್. ಸುಳ್ಯ ಶಾಸಕೆದಿ ಭಾಗೀರಥಿ ಮುರುಳ್ಯಲಾ ತುಳು ಅಧಿಕೃತ ಆವೊಡು ಪನ್ದ್ ಪನ್ಡೆರ್.

ಇಂದೆಕ್ ಸದು ಕೊರ್ನ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರ್ ಶಿವರಾಜ್ ತಂಗಡಗಿ, ಒಡಿಪು, ಮಂಗಳೂರು ಜಿಲ್ಲೆದ ಶಾಸಕೆರ್, ಜಿಲ್ಲಾ ಉಸ್ತುವಾರಿ ಸಚಿವೆರ್‌ನಕುಲು, ಮುಖ್ಯಮಂತ್ರಿಲೆನ್ ಲೆತ್ತ್‌ದ್ ಸಭೆ ಮಲ್ಪುಗ, ಇಂದೆತ ಪರವಾದ್ ಯಾನ್ ಉಲ್ಲೆ ಪನ್ದ್ ಪನ್ಡೆರ್.

ಪ್ರತಿ ಸರ್ತಿಲಾ ಅಧಿವೇಶನೊಡು ತುಳು ಭಾಷೆದ ಬಗೆಟ್ ಪ್ರಶ್ನೆ ಕೇನ್ನಗ ಸಚಿವೆರ್ ಮೊರಂಗೈಗ್ ನೆಯಿ ಪೂಜಿಲೆಕಂದಿನ ಸದು ಕೊರೊಂದೇ ಬರೊಂದುಲ್ಲೆರ್.

ಕಡೆಕ್ ಅಶೋಕ್ ರೈಕುಲು ಕುಡ್ಲಡ್ ಕ್ಯಾಬಿನೆಟ್ ಮೀಟಿಂಗ್ ಮಲ್ಪುನ ಬಗೆಟ್ ಪಾತೆರೊಂದುಲ್ಲೆರ್. ಆ ಕ್ಯಾಬಿನೆಟ್ ಮೀಟಿಂಗ್‌ಗ್ ಆನಗಾಂಡಲಾ ತುಳುನು ಅಧಿಕೃತ ಭಾಷೆ ಆದ್ ಘೋಷಣೆ ಮಲ್ಪುಲೆ ಪನ್ದ್ ಪನ್ಡೆರ್.