Last updated on January 28th, 2026 at 03:59 pm
ಕೊಟ್ಟಾಯಂ, ಜ. 28: ಕೇರಳದ ಕೊಟ್ಟಾಯಂಡ್ ಬುಧವಾರ ನಡತಿನ ಕಾರ್ ಎಡ್ತೆಡ್ ತೊರತ್ತಲ್ ಕಾನಾದ ಜವನೆ ಒರಿ ತೀರ್ದಿತ್ತದ್, ಒರಿನ ನಾಲ್ವೆರೆಗ್ ಗಡಿಕುಲಾತ.
ತೀರ್ದಿನ ಜವನನ್ ಮುಲ್ಕಿ ತಾಲ್ಲೂಕ್ದ ಅಂಗರಗುಡ್ಡೆ ಮೂಲೊದ ಶಾನವಾಜ್ ಅಲಿಯಾಸ್ ಶಮೀಮ್ (26) ಪನ್ದ್ ಗುರ್ತ ಪತ್ತ್ದಿತ್ತ್ದ್, ಮೇರ್ ಕಾನಾದ ಚಿರಾಗ್ ಫ್ಲಾಟ್ಸ್ಡ್ ಇತ್ತೆರ್.
ಎಡ್ತೆಡ್ ಗಡಿಕುಲಾತಿನಕ್ಲೆಟ್ ಕಾಟಿಪಳ್ಳದ ಸಿರಾಜ್, ಕಾನಾದ ಅಶ್ಫಾಕ್, ಸೂರಿಂಜೆದ ಶಬ್ಬೀರ್ ಬೊಕ್ಕ ಕಾರ್ ಬುಡೊಂದಿತ್ತಿನ ರಾಜಸ್ಥಾನೊದ ಒರಿ ಆಂಜೊವು ಉಲ್ಲೆರ್. ಗಡಿಕುಲಾತನಕ್ಲೆಡ್ ಸಿರಾಜ್ನ ಸ್ಥಿತಿ ಸೀರಿಯಸ್ ಆದುಂಡು ಪನ್ದ್ ವರದಿ ಆತ್ಂಡ್.
ಶಮೀಮ್ ಬೊಕ್ಕ ಬೇತೆ ನಾಲ್ವೆರ್ ಕೊಟ್ಟಾಯಂಡ್ ನಡತೊಂದಿತ್ತಿನ ಲೇಸ್ಗ್ ಬೌನ್ಸರ್ ಆದ್ ಪೋದಿತ್ತೆರ್ ಪನ್ದ್ ತೆರಿದ್ ಬೈದ್ಂಡ್. ಬುಧವಾರ ಕಾಂಡೆ, ಅಕುಲು ತೆನಸ್ ತಿನರೆ ಪೇಂಟೆದಂಚಿ ಕಾರ್ಡ್ ಪೋವೊಂದುಪ್ಪುನಗ, ಈ ಎಡ್ತೆ ನಡತ್ದ್ಂಡ್. ಬಜಿ ಸಪೂರದ ಸಾದಿಡ್ ಕಾರ್ ಅಂಕೆ ತತ್ತ್ದ್ ಸುಮಾರ್ 20 ಫೀಟ್ ಗಂತ್ದ ಗುಂಡಿಗ್ ಬೂರ್ದ್ಂಡ್ ಪನ್ದ್ ವರದಿ ಆತ್ಂಡ್.
ಗಾತಿದ ಗಡಿಕುಲಾತಿನ ಶಾನವಾಜ್ ಅಲ್ಪನೇ ತೀರ್ದೆರ್. ಸಿರಾಜ್ಗ್ಲಾ ಗಾತಿದ ಗಡಿಕುಲಾದಿತ್ತ್ದ್, ಆರೆನ್ ಕುಡ್ಲಗ್ ಲೆತೊಂದು ಬತ್ತ್ದ್, ಮರ್ದ್ಗ್ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ದೆರ್. ಸೂರಿಂಜೆದ ಶಬ್ಬೀರ್ ಬೊಕ್ಕ ಕಾನಾದ ಅಶ್ಫಾಕ್ ಮರ್ದ್ ಮಲ್ತ್ದ್ ಆಸ್ಪತ್ರೆರ್ದ್ ಬುಡುಗಡೆ ಆತೆರ್. ರಾಜಸ್ಥಾನ ಮೂಲೊದ ಕಾರ್ ಡ್ರೈವರ್ಲಾ ಜೂವೊಗು ದಾಲಾ ಆವಂದೆ ಉಸಾರುಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.