Last updated on January 29th, 2026 at 10:08 am
ಕುಡ್ಲ, ಜ. 28: ಕುಳಾಯಿ ಗ್ರಾಮೊದ ಬೀಗ ಪಾಡ್ದಿನ ಇಲ್ಲರ್ದ್ ದೈವೊಲೆನ ಮೂರ್ತಿಲು, ಕಡ್ಸಲೆ ಬೊಕ್ಕ ಬೇತೆ ಪಿರಿಯದ ಸೊತ್ತುಲೆನ್ ಲಕ್ಕಾಯಿನ ಪ್ರಕರಣೊಡು ತೊರ್ತಲ್ ಪೊಲೀಸೆರ್ ಇರ್ವೆರೆನ್ ಕೈದ್ ಮಲ್ತಿತ್ತ್ದ್, ಸುಮಾರ್ 1.95 ಲಕ್ಷ ರೂ. ಮೌಲ್ಯೊದ ಸೊತ್ತುನು ವಶೊಕು ಗೆತೊಂದೆರ್.
ಕೈದಾತಿನ ಆರೋಪಿಲೆನ್ ಬೋಲ್ತೇರ್ ತಾಲೂಕ್ದ ಸೈಯದ್ ಅಲಿ (40), ಬಜ್ಪೆ ನಿವಾಸಿ ವಾಜಿದ್ ಜೆ ಅಲಿಯಾಸ್ ವಾಜಿ (27) ಪನ್ದ್ ಗುರ್ತ ಪತ್ತ್ದೆರ್.
ಪೊಲೀಸೆರೆ ಪ್ರಕಾರ, ಕುಳಾಯಿ ಗ್ರಾಮೊದ ಯಶೋದಾ ಕ್ಲಿನಿಕ್ ಕೈತಲ್ದ ಸುರೇಶ್ ಪನ್ಪಿನಾರೆನ ಬೊಡೆದಿ ಅಮಿತಾ (43) ಒಯಿಲ್ ಬರೆಪಾದೆರ್. ದೈವೊಲೆನ ಒರುಕುಲು ಬೊಕ್ಕ ಅವೆಕ್ ಸಂಬಂಧಿತಿನ ಪೂಜೆದ ಸೊತ್ತುಲೆನ್ ಎನ್ನ ಅಪ್ಪೆ ಇಲ್ಲಡ್ ದೀದಿತ್ತ, ಆ ಇಲ್ಲಡ್ ಏರ್ಲಾ ಇಪ್ಪೆದಿಜೆರ್, ಪೂಜೆ ಮಲ್ತ್ ತುಡರ್ ದೀವರೆ ಮಾತ್ರ ಓಪನ್ ಮಲ್ತೊಂದಿತ್ತ ಬೊಕ್ಕ ಕುಡ ಬೀಗ ಪಾಡೆದ ಪನ್ದ್ ಆರ್ ಪನ್ತೆರ್.
ಡಿಸೆಂಬರ್ 26, 2025 ತ ರಾತ್ರೆ, ಏರೋ ಇರ್ವೆರ್ ಆಂಜೊವುನಕುಲು ಇಲ್ಲದ ಓಡು ಲಕ್ಕಾದ್, ಇಲ್ಲದುಲಯಿ ಪೊಗ್ಗುದು ಪಸಪ್ಪೆ ದೈವೊದ ತಾಮ್ರೊದ ಒರು, ಮಂತ್ರಜಾವದೆನ ಬೊಳ್ಳಿದ ಒರು, ಕಲ್ಲುರ್ಟಿ ಪಂಜುರ್ಲಿನ ತಾಮ್ರೊದ ಒರುಕುಲು, ಬೊಳ್ಳಿದ ಕಡ್ಸಲೆ, ತಾಮ್ರೊದ ಗಂಟೆಲು, ತಾಮ್ರೊದ ಪಾತ್ರೆಲು ಬೊಕ್ಕ ಎಲ್ಇಡಿ ಟಿವಿನ್ ಕನ್ಡ್ದೆರ್ ಪನ್ದ್ ಆರೋಪ ಮಲ್ತ್ದೆರ್.
ಡಿಸೆಂಬರ್ 27, 2025 ತಾನಿ ತೊರ್ತಲ್ ಪೊಲೀಸ್ ಸ್ಟೇಶನ್ಡ್ ಭಾರತೀಯ ನ್ಯಾಯ ಸಂಹಿತೆದ ವಿಭಾಗೊಲೆನ ಅಡಿಟ್ ಪ್ರಕರಣ ದಾಕಲಾದಿತ್ತ್ಂಡ್. ಜಡ್ತೆದ ಪೊರ್ತುಡು, ಪೊಲೀಸೆರ್ ಸುತ್ತಮುತ್ತೊದ ಸಿಸಿಟಿವಿ ದೃಶ್ಯೊಲೆನ್ ಪರಿಶೀಲಿಪುನಗ ಬಜ್ಪೆ ನಿವಾಸಿ ವಾಜಿದ್ ಜೆ ಅಲಿಯಾಸ್ ವಾಜಿ (27) ತಿಕ್ಕ್ದ್ ಬೂರ್ದೆ. ಉಂಬ್ಯೆ ಇತ್ತೆ ತೊರ್ತಲ್ಡ್ ಇತ್ತೆ. ವಿಚಾರಣೆದ ಪೊರ್ತುಡು, ಕನ್ಡ್ದಿನೆನ್ ಒತ್ತೊಂದೆ ಬೊಕ್ಕ ಇಲ್ಲರ್ದ್ ಕನ್ಡ್ದಿನ ಪಿತ್ತಾಲೆ ಬೊಕ್ಕ ಚೆಂಬುದ ಸೊತ್ತುಲೆನ್ ಜೋಕಟ್ಟೆದ ಗುಜಿರಿದಾಯಗ್ ಮಾರ್ದೆ ಪನ್ದ್ ಪನ್ತೆ.
ಆಯನ ಪಾತೆರೊದ ಆಧಾರೊಡು, ಪೊಲೀಸೆರ್ ಜನವರಿ 27, 2026 ತಾನಿ ಬೋಲ್ತೇರ್ ತಾಲೂಕ್ದ ಸೈಯದ್ ಅಲಿ (40)ನ್ ಪತ್ತ್ದೆರ್. ಆರೋಪಿನ ಕೈರ್ದ್, ಮಂತ್ರಜಾವದೆನ ಬೊಳ್ಳಿದ ಒರು, ಬೊಳ್ಳಿದ ಕಡ್ಸಲೆ, ಸುಮಾರ್ 2,750 ರೂ. ಮೌಲ್ಯೊದ ಪಿತ್ತಾಲೆದ ಪೂಜೆದ ಸೊತ್ತುಲು, ಸುಮಾರ್ 3000 ರೂ. ಮೌಲ್ಯೊದ ಚೆಂಬುದ ಪೂಜೆದ ಸೊತ್ತುಲು, ಟಿವಿ ಬೊಕ್ಕ ಸೆಟ್-ಟಾಪ್ ಬಾಕ್ಸ್, ರಡ್ಡ್ ಮೊಬೈಲ್ ಫೋನ್ಲು ಬೊಕ್ಕ ಸುಮಾರ್ 30,000 ರೂ. ಮೌಲ್ಯೊದ ಸ್ಕೂಟರ್ ಸೇರ್ದ್ ಸುಮಾರ್ 1.95 ಲಕ್ಷ ರೂ. ಮೌಲ್ಯೊದ ಸೊತ್ತುಲೆನ್ ವಶೊಕು ಗೆತೊಂದೆರ್.
ವಾಜಿದ್ ಜೆ ಅಲಿಯಾಸ್ ವಾಜಿನ ಮಿತ್ತ್ ತೊರ್ತಲ್ ಪೊಲೀಸ್ ಸ್ಟೇಶನ್ಡ್, ‘ಬಿ’ ರೌಡಿ ಶೀಟ್ ಬೊಕ್ಕ ಮಾಬ್ ದಾಕಲಾತ್ಂಡ್ ಪನ್ದ್ ಪೊಲೀಸೆರ್ ತೆರಿಪಾದೆರ್. ಮಂಗಳೂರು ನಗರ, ಒಡಿಪು, ಉತ್ತರ ಕನ್ನಡ ಬೊಕ್ಕ ಹಾಸನ ಜಿಲ್ಲೆಲೆಡ್ ಕೆರ್ಪುನ ಪುನೆಪು, ದಗೆ, ಇಲ್ಲ್ ಕಲ್ವೆ, ಪೆತ್ತ ಕಲ್ವೆ ಬೊಕ್ಕ ಗಾಡಿ ಕಲ್ವೆ ಸೇರ್ದ್ ಪಾಕ ಪ್ರಕರಣೊಲು ದಾಕಲಾದುಲ್ಲ. ನ್ಯಾಯಂತಡೆದ ವಿಚಾರಣೆರ್ದ್ಲಾ ಆಯೆ ದೆಂಗ್ತಪ್ಪಾದಿತ್ತೆ, ಬೊಕ್ಕ ಆಯನ ಮಿತ್ತ್ ಜಾಮೀನ್ದಾಂತಿನ ವಾರಂಟ್ ಪಿದಡ್ಪಾದಿತ್ತೆರ್.
ಇರ್ವೆರ್ ಆರೋಪಿಲೆನ್ಲಾ ಜನವರಿ 28, 2026 ತಾನಿ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್, ನ್ಯಾಯಾಂಗ ಕೈದ್ಗ್ ಒಪ್ಯಾದೆರ್.