Last updated on January 29th, 2026 at 11:21 am
ಬೊಂಬೈ, ಜ. 29: ಹರಿಶ್ಚಂದ್ರ ಕುಂದರ್ ಬೊಂಬೈಡ್ ಇತ್ತೊಂದು, ತುಳುಕಾದ್, ತುಳು ಲಿಪಿತ ಬುಲೆಚ್ಚಿಲ್ಗಾದ್ ಪೊರ್ಮ್ಬೆದಿನ ಜೂವ ಕೋಡೆ, ಜನವರಿ 28 ದಾನಿ ರಾತ್ರೆ ವಸಾಯಿ ಡ್ ಆರೆನ ಇಲ್ಲ ಕೈತಲ್ ಟೆಂಪೋ ಗಾಡಿ ಒಂಜಿ ಎಡ್ತ್ದ್ ತೀರ್ಯೆರ್.
ಎಡ್ತೆರ್ದಾವರ ಗಾತಿದ ಗಡಿಕುಲಾದಿತ್ತಿನ ಆರೆನ್ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ಅಡೆ ಎತ್ತೆರಾನಗ ತೀರ್ದೆರ್ ಪನ್ದ್ ತೆರಿದ್ ಬೈದ್ಂಡ್. ಟೆಂಪೋ ಡ್ರೈವರ್ನ್ ಪೋಲೀಸೆರ್ ಕೈದ್ ಮಲ್ತ್ದೆರ್.
‘ತುಳುನಾಡ ಮಲ್ಲಿಗೆ’ ಪನ್ಪಿ ಕೂಪೆ ಕಟ್ಟೊಂದು ಪಾಕ ಜನಕ್ ತುಳು ಲಿಪಿ ಕಲ್ಪಾದ್, ಕಲ್ತಿ ಬೊಕ್ಕ ದಿನೋಲಾ ತುಳು ಪದಬಂಧ, ಎದುರುಕತೆ, ಗಾದೆಲೆ ಮುಕೇನ ಕಲ್ತಿನವು ಮರಪಂದಿಲೆಕ ದಾದಾಂಡಲಾ ತುಳು ಲಿಪಿಕ್ ಸಂಬಂಧಿತಿನ ವಿಷಯೊಲೆನ್ ಪಟ್ಟೊಂದು ತುಳು ಲಿಪಿತ ಒರಿಪು, ಬುಲೆಪುಗು ತನ್ನನೇ ಆಯಿನ ಮಾಮಲ್ಲ ಚಾಕಿರಿನ್ ಮಲ್ತೊಂದಿತ್ತಿನ ಹರೀಶಣ್ಣೆ ಮುಲ್ಕಿ ತಾಲೂಕ್ದ ಕಬತ್ತಾರ್ ಕೈತಲ್ದ ಕರ್ನಿರೆದಾರ್. ಸುಮಾರ್ 6 – 7 ವರ್ಸೊರ್ದಿಂಚಿ ನಡತೊಂದುಪ್ಪುನ ತುಳುನಾಡ ಮಲ್ಲಿಗೆ ಕೂಪೆ ಆರೆನ ಕುಂದಂದಿ ಉಮೇದ್ರ್ದಾವರ ಇನಿಕ್ ಮಲ್ಲ ಒಂಜಿ ಸಮುದಾಯ ಆದ್ ಬುಲೆದ್ಂಡ್.
ಕೋಟಿ ಗೀತಾ ಲೇಖನ ಯಜ್ಞೊಗು ಭಗವದ್ಗೀತೆನ್ ತುಳುಲಿಪಿಟ್ ಬರೆದ್, ತುಳು ಲಿಪಿಟ್ ಬರೆಪುನ ಬೇತೆಕ್ಲೆಗ್ ಸಾದಿ ಆದ್, ಉಮೇದ್ ದಿಂಜಾದಿತ್ತೆರ್, ಅಂಚೆನೇ ವಿಷ್ಣು ಸಹಸ್ರನಾಮ ಬೊಕ್ಕ ದೈವದೇವೆರೆನ ಕತೆಕ್ಲೆನ್ ತುಳು ಲಿಪಿಟೇ ಬರೆದ್ ತುಳು ಲಿಪಿ ಕಲ್ಪುನಕ್ಲೆಗ್ ಓದೆರೆ ಅಭ್ಯಾಸ ಮಲ್ಪಾವೆದೆರ್.
ಕೆನರಾ ಬ್ಯಾಂಕ್ಡ್ ರಿಟೈರ್ ಆದ್ ಬೊಕ್ಕ ಮೊಗವೀರ ಕೊ ಆಪರೇಟಿವ್ ಬ್ಯಾಂಕ್ಡ್ ಬೇಲೆ ಮಲ್ತೊಂದಿತ್ತಿನ ಮೇರ್ ಪಾಕ ಸಂಘ ಸಂಸ್ಥೆಲೆಡ್ ಸಕ್ರಿಯೆರಾದ್ ಇತ್ತಿನಾರ್. ಆರೆನ ಅತ್ತಂದಿ ಪೊರ್ತುದ ಅಗಪು ಆರೆನ ಇಲ್ಲದಕುಲು, ಬಂಧುಲು, ಶಿಷ್ಯೆರೆಗ್ ಬಾರೀ ಬೆಸರ್ಗ್ ನೂಕ್ದ್ಂಡ್.
ತುಳುಕಾದ್ ಪೊರ್ಮ್ಬೆದಿನ ಜೂವೊಗು ಶಾಂತಿ ತಿಕ್ಕಡ್ ಪನ್ದ್ ತುಳು ಸಮಾಚಾರೊದ ಕಡೆರ್ದ್ ನಟ್ಟೊನುವ.