Last updated on January 29th, 2026 at 12:54 pm
ಕುಡ್ಲ, ಜ. 29: ಕದ್ರಿ ಜೋಗಿ ಮಠೊತ ಆವರಣೊಡು ಇಪ್ಪುನ ಜೋಗಿ ಮಠ ಜೀರ್ಣೋದ್ಧಾರ ಬೊಕ್ಕ ಕಾರ್ಯ ನಿರ್ವಹಣ ಸಮಿತಿದ ಆಫೀಸ್ಗ್ ಪೊಗ್ಗಿನ ಕಲ್ವೆರ್ ದೈವ ಬೊಕ್ಕ ದೇವೆರೆನ ಬೊಳ್ಳಿದ ಪದ್ದೈ ಬೊಕ್ಕ ಕಾಸ್ ಕನ್ಡ್ದೆರ್.
ಜುಮಾದಿ ದೈವೊಗು ಬೊಕ್ಕ ಗಣಪತಿ ದೇವೆರೆಗ್ ಸಂಬಂಧಿತಿನ ಪದ್ದೈಲು ಸಮಿತಿಡ್ ಇತ್ತ್ದ್, ಉಂದೆನ್ ಸಾಮಾನ್ಯವಾದ್ ಕದ್ರಿ ಮುಂಡಾಣದ ಜಗಜೀವನದಾಸ್ ಪನ್ಪಿನಾರೆನ ಇಲ್ಲಡ್ ದೀಪೆರ್. ಬರ್ಪಿ ಫೆಬ್ರವರಿ ತಿಂಗೊಲ್ದ ರಡ್ಡನೇ ವಾರ ಜುಮಾದಿಗ್ ನೇಮ ಇಪ್ಪುನೆರ್ದಾವರ ಒಂತೆ ದಿನೊಕು ದುಂಬು ಜಗಜೀವನದಾಸೆರೆನ ಇಲ್ಲರ್ದ್ ಜುಮಾದಿ ದೈವೊದ ಬೊಕ್ಕ ಗಣಪತಿ ದೇವೆರೆನ ಬೊಳ್ಳಿದ ಪದ್ದೈಲೆನ್ ಕನತ್ದ್ ಆಫೀಸ್ಡ್ ದೀದಿತ್ತೆರ್.
ಜ.26ತಾನಿ ದೂರುದಾರೆರಾಯಿನ ಸಮಿತಿದ ಅಧ್ಯಕ್ಷೆ ಹರಿನಾಥ ಎಂ ಬೊಕ್ಕ ಗೋಪಿನಾಥ ಜೋಗಿ ಮೊಕುಲು ಮಧ್ಯಾಹ್ನ 2 ಗಂಟೆಗ್ ಆಫೀಸ್ಗ್ ಬೀಗ ಪಾಡ್ದ್ ಪೋದಿತ್ತೆರ್. ಜ.27ತಾನಿ ಕಾಂಡೆ 11 ಗಂಟೆಗ್ ದಿನೇಶ್ ಜೋಗಿ ಪನ್ಪಿನಾರ್ ಬತ್ತ್ದ್ ತೂನಗ ಆಫೀಸ್ದ ಬಾಕಿಲ್ನ್ ಏರೋ ಪುಡತಿತ್ತ್ದ್, ಬೇತೆಕ್ಲೆನ್ ಲೆತ್ತ್ದೆರ್. ಬತ್ತ್ದ್ ತೂನಗ ಬೀಗ ಪೊಲಿದ್ ಬೂರ್ದಿತ್ತ್ಂಡ್, ಆತೇ ಅತ್ತಂದೆ ಜುಮಾದಿ ದೈವೊದ ಪದ್ದೈ ಇತ್ತಿನ ಬ್ಯಾಗ್ಡ್ 8 ಬೊಳ್ಳಿದ ಗುಬ್ಬೆಲೆಡ್ 7 ಗುಬ್ಬೆಲೆನ್, ರಡ್ಡ್ ಬೊಳ್ಳಿದ ಅರ್ಧ ಚಂದ್ರಾಕೃತಿದ ಆಭರಣೊಡು ಒಂಜಿ, ರಡ್ಡ್ ಬೊಳ್ಳಿಯ ಮಲ್ಲ ಪೂಟ್ ಒಂಜಿ, ರಡ್ಡ್ ಬೊಳ್ಳಿದ ಎಲ್ಯ ಪೂಟ್ ಒಂಜಿ ಪೂ, ಒಂಜಿ ಗಂಧೊದ ಗಿಂಡಿ ಬಟ್ಟಲ್ ಕನ್ಡ್ದ್ ಪೋತುಂಡು.
ಗಣಪತಿ ದೇವೆರೆನ ಪದ್ದೈಲೆನ ಕುಂಟುದ ಗಂಟ್ನ್ ಬಿಚ್ಚದ್ ತೂನಗ ಇತ್ತಿನ ರಡ್ಡ್ ಬೊಳ್ಳಿದ ತೊಂಡಿಲ್ದ ಕಟ್ಟೊಲೆಡ್ ಒಂಜಿ, ಗಣಪತಿನ ನಾಲ್ ಬೊಳ್ಳಿದ ಕೈಕಡಗೊಲೆಡ್ ಮೂಜಿ, ಗಣಪತಿನ ಬೊಳ್ಳಿದ ಕೆಬಿತ ಒಂಜಿ ಕುಂಡಲಗ, ಬೊಳ್ಳಿದ ರಡ್ಡ್ ಕಾರ್ದ ಕಡಗ ಲಾ ಕನ್ಡ್ದ್ ಪೋತುಂಡು. ಕನ್ಡ್ದ್ ಪೋತಿನ ಸೊತ್ತು ಬೊಕ್ಕ ಕಾಸ್ದ ಒಟ್ಟು ಮೊತ್ತ 1,30,000 ರೂ. ಆವು. ಕದ್ರಿ ಸ್ಟೇನ್ಡ್ ಪ್ರಕರಣ ದಾಕಲಾತ್ಂಡ್.