Last updated on January 26th, 2026 at 05:08 pm
ಒಡಿಪು, ಜ. 26: ಜಿಲ್ಲೆದ ಕೋಡಿಬೆಂಗ್ರೆ ಕೈತಲ್ ಪಡ್ಡಾಯಿಡ್ ಪ್ರವಾಸಿಗೆರೆನ್ ಲೆತೊಂದು ಪೋವೊಂದಿತ್ತಿನ ಟೂರಿಸ್ಟ್ ಬೋಟ್ ಕಬ್ಬೆ ಬೂರ್ದು, ನಾಲ್ವೆರ್ ಪ್ರವಾಸಿಗೆರೆನ ಸ್ಥಿತಿ ಗಾತಿಡ್ ಇತ್ತ್ಂಡ್. ಆ ನಾಲ್ವೆರೆಡ್ ಇರ್ವೆರ್ ತೀರ್ದೆರ್. ಈ ನಡಕೆಡ್ ಪಾಕ ಜನ ಅಸ್ವಸ್ಥೆರಾದಿತ್ತ್ದ್, ಮುಟ್ಟದ ಆಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ಮಲ್ತೊಂದುಲ್ಲೆರ್.
ಮೈಸೂರ್ರ್ದ್ ಬತ್ತಿತ್ತಿನ ಬಿಪಿಓ ಉದ್ಯೋಗಿಲು
ಮೈಸೂರ್ದ ಸರಸ್ವತಿಪುರಂ ರ್ದ್ ಪ್ರವಾಸೊಗು ಬೈದಿನ ಬಿಪಿಒ ಕಾಲ್ ಸೆಂಟರ್ ಉದ್ಯೋಗಿಲೆನ 28 ಜನೊತ ಟೀಮ್ ರಡ್ಡ್ ಪ್ರವಾಸಿ ಬೋಟ್ಲೆಡ್ ತಿರ್ಗೆರೆ ಪೋದಿತ್ತೆರ್. ಒಂಜೊಂಜಿ ಬೋಟ್ಡ್ 14 14 ಜನ ಇತ್ತ್ದ್, ಕೋಡಿಬೆಂಗ್ರೆದ ಕೈತಲ್ ಕಡಲ ಸಿರೆಕ್ ತಿಕ್ಕ್ದ್, ಒಂಜಿ ಬೋಟ್ ಒರರ್ದ್ ಒರಾನೆ ಕಬ್ಬೆ ಬೂರ್ದ್ಂಡ್. ಈ ಪೊರ್ತುಡು ಪ್ರವಾಸಿಗೆರ್ ಕಡಲ್ಗ್ ಬೂರ್ದ್ ಕೈಕಾರ್ ಆಕೊಂದುಪ್ಪುನೆನ್ ತೂದು, ಮುಟ್ಟದಕುಲು ಪಕ್ಕ ರಕ್ಷಣೆಗ್ ಪೋದು, ಮಾತೆರೆನ್ ಸುರಕ್ಷಿತವಾದ್ ಕಡಲ್ರ್ದ್ ಪಿದಯಿ ದೆತ್ತ್ದೆರ್. ಈ ನಡಕೆಡ್ ಶಂಕರಪ್ಪೆ (22), ಸಿಂಧು (23), ಧರ್ಮರಾಜ್ (26) ದಿಶಾ (26) ಮೊಕಲೆನ ಸ್ಥಿತಿ ಗಾತಿಡ್ ಇತ್ತ್ಂಡ್. ಉಂದೆಟ್ ಶಂಕರಪ್ಪೆ ಬೊಕ್ಕ ಸಿಂಧು ತೀರ್ದೆರ್, ಒರಿನ ಇರ್ವೆರ್ ನನಲ ಸೀರಿಯಸ್ ಸ್ಥಿತಿಟ್ ಉಲ್ಲೆರ್.
ಲೈಫ್ ಜಾಕೆಟ್ ಇಜ್ಜಂದೆ ಬೋಟ್ ರೈಡ್?
ಡೆಲ್ಟಾ ಬೀಚ್ರ್ದ್ ಪ್ರವಾಸಿ ಬೋಟ್ಡ್ ಪೋತಿನ 14 ಜನೊಕು ಸಿಬ್ಬಂದಿಲು ಲೈಫ್ ಜಾಕೆಟ್ ಕೊರ್ದಿತ್ತ್ಂಡಲಾ, ಕೆಲ ಪ್ರವಾಸಿಗೆರ್ ಜಾಕೆಟ್ ಪಾಡ್ದಿಜ್ಜಂಡ್ ಪನ್ದ್ ತೆರಿದ್ ಬೈದ್ಂಡ್. ಈ ನಡಕೆಗ್ ಸುರಕ್ಷತಾ ನಿಯಮೊಲೆನ್ ಪಾಲಿಪಂದಿನನೇ ನೆವನನಾ ಪನ್ದ್ ಪೊಲೀಸೆರ್ ಪರಿಶೀಲನೆ ಮಲ್ತೊಂದುಲ್ಲೆರ್. ಈ ನಡಕೆ ಮಲ್ಪೆ ಪೊಲೀಸ್ ಸ್ಟೇಶನ್ ಸೀಮಡ್ ನಡತಿತ್ತ್ದ್, ಸುಹಾನ್ ಬೊಕ್ಕ ಸೂಫಿಯಾನ ಟೂರಿಸ್ಟ್ ಬೋಟ್ಲೆನ್ ಈ ಪ್ರವಾಸೊಗು ಗಲಸ್ದಿತ್ತೆರ್. ಪ್ರಕರಣೊದ ಬಗೆಟ್ ಪೊಲೀಸೆರ್ ಎಚ್ಚಿನ ಒಲವು ಒಟ್ಟು ಮಲ್ತೊಂದುಲ್ಲೆರ್.