Last updated on February 6th, 2026 at 11:38 am
ಬೆಂಗಳೂರು, ಫೆ. 6 : ಜಿಲ್ಲಾ ಪಂಚಾಯಿತಿ, ತಾಲೂಕು ಪಂಚಾಯಿತಿ ಬೊಕ್ಕ ಗ್ರಾಮ ಪಂಚಾಯಿತಿ ಎಲೆಕ್ಷನ್ಲೆನ್ ಎಲೆಕ್ಟ್ರಾನಿಕ್ ವೋಟಿಂಗ್ ಮಷಿನ್ (ಇವಿಎಂ)ಲೆನ ಪಗತೆಗ್ ಮತಪತ್ರ(ಬ್ಯಾಲೆಟ್ ಪೇಪರ್)ದ ಮುಕೇನ ಮಲ್ಪೆರೆ ರಾಜ್ಯ ಸಚಿವ ಸಂಪುಟ ಮಹತ್ವೊದ ತೀರ್ಮಾನ ಗೆತೊಂದುಂಡು.
ವಿಧಾನಸೌಧೊಡು ಮುಖ್ಯಮಂತ್ರಿ ಸಿದ್ದರಾಮಯ್ಯೆರೆನ ಗುರ್ಕಾರ್ಮೆಡ್ ಗುರುವಾರ ನಡತಿನ ಸಚಿವ ಸಂಪುಟ ಸಭೆ ಆದ್ ಬೊಕ್ಕ ಸುದ್ದಿಗೋಷ್ಠಿಡ್ ಪಾತೆರ್ನ ಕಾನೂನು ಬೊಕ್ಕ ಸಂಸದೀಯ ವೈವಾಟ್ಲೆನ ಸಚಿವೆ ಎಚ್.ಕೆ.ಪಾಟೀಲ್ ಈ ವಿಷಯೊನು ತೆರಿಪಾಯೆರ್.
ಪಂಚಾಯಿತಿ ಎಲೆಕ್ಷನ್ಲೆನ್ ಬ್ಯಾಲೆಟ್ ಪೇಪರ್ ಮುಕೇನ ಮಲ್ಪುನ ಬಗೆಟ್ ಕರ್ನಾಟಕ ಗ್ರಾಮ ಸ್ವರಾಜ್ ಬೊಕ್ಕ ಪಂಚಾಯತ್ ರಾಜ್(ತಿದ್ದುಪಡಿ)ವಿಧೇಯಕ 2026ನ್ ತಿದ್ದೆರೆ ಸಚಿವ ಸಂಪುಟ ಸಭೆಟ್ ಅನುಮೋದನೆ ತಿಕ್ಕ್ದ್ಂಡ್. ಇತ್ತೆನೇ, ಗ್ರೇಟರ್ ಬೆಂಗಳೂರು ಪ್ರಾಧಿಕಾರೊದ ಅಡಿಟ್ ಬರ್ಪುನ ನಗರ ಪಾಲಿಕೆ ಎಲೆಕ್ಷನ್ಲೆಡ್ ಇವಿಎಂ ಪಗತ್ದ್ ಬ್ಯಾಲೆಟ್ ಪೇಪರ್ಡ್ ಮಲ್ಪುನ ಬಗೆಟ್ ಸರಕಾರ ನಿರ್ಧಾರ ಗೆತೊಂದುಂಡು ಪನ್ದ್ ಎಚ್.ಕೆ.ಪಾಟೀಲ್ ಪನ್ಡೆರ್.