Last updated on February 14th, 2026 at 06:21 pm
ಒಡಿಪು ಫೆ. 14: ಕರ್ನಾಟಕ ರಾಜ್ಯ ಸರ್ಕಾರ ಬೋಡಾಪಿನ ಬೆರಿತಾಂಗ್ ಕೊರ್ನ್ಡ ಬರ್ಪಿನ ದಿನೊಕ್ಲೆಡ್ ಒಡಿಪು ಜಿಲ್ಲೆದ, ಪಡ್ಡೆದ್ರದ ಕೈತಲ್ ಎರ್ಮಾಳ್ಡ್ ಏರ್ಪೋರ್ಟ್ದ ಯೋಜನೆಗ್ ಜಪ್ಪೊಲಿ ಪನ್ದ್ ವಿಮಾನಯಾನ ಸಚಿವೆ ಕಿಂಜರಪು ರಾಮ್ ಮೋಹನ್ ನಾಯ್ಡು ಮೇರ್ ಸಂಸದೆ ಕೋಟ ಶ್ರೀನಿವಾಸ ಪೂಜಾರ್ಲೆನ ಬಿನ್ನಪುಗು ಸದು ಕೊರ್ದು ಬರೆತಿನ ಓಲೆಡ್ ತೆರಿಪಾದೆರ್.
ಕಾಪು ಶಾಸಕೆ ಗುರ್ಮೆ ಸುರೇಶ್ ಶೆಟ್ರೆನ ಕಾಯೆಸ್ದ ಮಿತ್ತ್ ಸಂಸದೆ ಕೋಟ ಶ್ರೀನಿವಾಸ ಪೂಜಾರ್ಲು ಎರ್ಮಾಳ್ಡ್ ಪೊಸ ಏರ್ಪೋರ್ಟ್ ಬೋಡು ಪನ್ದ್ ಕೇಂದ್ರ ಸಚಿವೆರೆಗ್ ಬಿನ್ನಪು ಮಲ್ತಿತ್ತೆರ್. ಈ ಬಗೆಟ್ ಸಚಿವೆರ್ ಕೋಟ ಶ್ರೀನಿವಾಸ ಪೂಜಾರ್ಲೆಗ್ ಬರಿತಿನ ಓಲೆಡ್ ಉಡಾನ್ ಯೋಜನೆ ಆಯಿನ ವಿಮಾನ ಉಂತಡೆ ಬುಲೆಚ್ಚಿಲ್ ಬೊಕ್ಕ ಸುಧಾರಣೆಗ್ ಕೇಂದ್ರೊದ ಸಹಕಾರ ಕೊರ್ಯೆರ ಒಪ್ಪಿಗೆ ಇತ್ತ್ದ್, ಸಮಗಟ್ಟ್ದ ಜಾಗೆ ಗೊತ್ತು ಮಲ್ತ್ದ್, ಯೋಜನೆದ ಕಾರ್ಯ ಸಾಧ್ಯತೆದ ಅಧ್ಯಯನ ಮಲ್ತ್ದ್, ಕೇಂದ್ರ ಸರಕಾರೊಗು ಪ್ರಸ್ತಾಪನೆ ಕಡಪುಡ್ಯೆರ ಪನ್ತೆರ್.
ಭಾರತ ಸರಕಾರೊದ ಗ್ರೀನ್ ಫೀಲ್ಡ್ ನೀತಿದ ಪ್ರಕಾರ ಕೇಂದ್ರ ಸರಕಾರ ಸಕಾಯ ಮಲ್ಪುಂಡು ಪನ್ದ್ ಕೇಂದ್ರ ವಿಮಾನಯಾನ ಸಚಿವೆ ಕಿಂಜರಪು ರಾಮ್ ಮೋಹನ್ ನಾಯ್ಡು ಬರೆತಿನ ಓಲೆಡ್ ತೆರಿಪಾದೆರ್. ಎನ್ನ ಬಿನ್ನಪುಗು ಎಡ್ಡೆ ರೀತಿಡ್ ಸದು ಕೊರ್ನ ಗೌರವಾನ್ವಿತ ಸಚಿವೆರೆಗ್ ಸೊಲ್ಮೆಲು. ಈ ವಿಷಯೊನು ರಾಜ್ಯ ಸರ್ಕಾರೊದ ಗೇನೊಗು ಕನಪ ಪನ್ದ್ ಕೋಟ ತೆರಿಪಾಯೆರ್.