Last updated on February 21st, 2026 at 02:21 pm
ಫತೇಪುರ, ಉತ್ತರ ಪ್ರದೇಶ, ಫೆ. 21: ಇತ್ತೆ ಇತ್ತೆ ಮದಿಮೆದ ಮಂಟಮೆಡೇ ಮದಿಮೆಲು ಉಂತುನ ಸುದ್ದಿಲು ಎಚ್ಚ ಎಚ್ಚ ವರದಿ ಆವೊಂದುಲ್ಲ, ಐಕ್ ಮಾತಾ ಒಂಜೊಂಜಿ ನೆವನ ಇಪ್ಪುಂಡು. ಆಂಡ ಪೊಣ್ಣನ ತಾಂಕನದ ನಾಯಿದ ವಿಚಾರೊಡು ಲಕ್ಕಿನ ವಾದ ರಡ್ಡ್ ಕುಟುಮೊಲೆ ನಡುಟು ಪೆಟ್ಟ್ ಲಡಯಿಗ್ ಪೋದು, ಮದಿಮೆನೇ ಉಂತುದಿನ ನಡಕೆ ಉತ್ತರ ಪ್ರದೇಶೊಡು ನಡತ್ದ್ಂಡ್.
ಫತೇಪುರ ಜಿಲ್ಲೆದ ಖಗಾ ಕೊತ್ವಾಲಿ ಪ್ರದೇಶೊದ ಗೆಸ್ಟ್ಹೌಸ್ಡ್ ಬುಧವಾರ ರಾತ್ರೆ(ಫೆ18) ಈ ನಡಕೆ ನಡತಿತ್ತ್ದ್, ವರದಿಲೆನ ಪ್ರಕಾರ, ಪೊಣ್ಣನ ಇಲ್ಲದಕುಲು ಪ್ರಯಾಗ್ರಾಜ್ರ್ದ್ ಗಾಡಿ ಮಲ್ತೊಂದು ಬತ್ತಿತ್ತೆರ್. ಆಣ ಕಡೆತಕುಲು ಕಟ್ಟ್-ಕಟ್ಲೆದ ಡಿಬ್ಬನೊಡು(ಬಾರಾತ್) ಹಾಲ್ಗ್ ಎತ್ತ್ದೆರ್. ಮಾಲೆ ಪಗತೊಂದು ಸುರು ಆಯಿನ ಮದಿಮೆದ ಲೇಸ್ ಸುರುಕು ಶಾಂತಿಯುತವಾದೇ ನಡತ್ದ್ಂಡ್.
ಪುಲ್ಯ ಕಾಂಡೆ 4 ಗಂಟೆದ ಅಂದಾಜಿಗ್, ಪದ್ದೈ ಬಂಗಾರ್ ಪಗತೊನುನ ಕ್ರಮ ನಡತೊಂದುಪ್ಪುನಗ, ಪೊಣ್ಣನ ಇಲ್ಲದಕುಲು ಒಂತೆ ದೂರೊಡು ಕಟ್ಟ್ದ್ ಪಾಡ್ದಿನ ಪೊಣ್ಣನ ತಾಂಕನೆದ ನಾಯೆ ಕೊರೆಪರೆ ಪತ್ತ್ದ್ಂಡ್. ಪಿಸ್ರ್ಡ್ ಆಣಕಡೆತಾಯೆ ಒರಿ ನಾಯಿಗ್ ಆಕ್ದೆ. ಪೊಣ್ಣನ ಇಲ್ಲದಕುಲು ಇಂದೆಕ್ ಬಾರೀ ಆಕ್ಷೇಪ ತೂಪಾಯೆರ್, ಪಾತೆರೊಗು ಪಾತೆರ ಬುಲೆದ್, ತೂಯಿ ತೂಯಿಲೆಕನೆ ಒರಿಯಗೊರಿ ಆಕೊನರೆ ಪತ್ತ್ದೆರ್.
ಆಕೊನ್ಯೆರ ಕೋಲು ಬೊಕ್ಕ ಕುರ್ಚಿಲೆನ್ ಗಲಸ್ದೆರ್ ಪನ್ದ್ ತೂಯಿನಕುಲು ತೆರಿಪಾದೆರ್. ಪೊಣ್ಣಕಡೆತ ಶುಭಂ ಗುಪ್ತಾ, ರಿಷಭ್ ಕೇಸರ್ವಾನಿ ಬೊಕ್ಕ ಸಂಗೀತಾ ದೇವಿ ಪನ್ಪಿನಕ್ಲೆಗ್ ತರೆಕ್ ಗಾತಿದ ಗಡಿಕುಲಾದ್ ಪಾಕ ನೆತ್ತೆರ್ ಪೋತುಂಡು. ಆಣಕಡೆತ ಇರ್ವೆರೆಗ್ ಕಿಞ್ಞ ಕಿಞ್ಞ ಗಡಿಕುಲಾತ. ನೆನೆಪಂದೆ ನಡತಿ ಗಲಾಟೆರ್ದ್ ಬೊಕ್ಕ ಜಾಗೆಗ್ ಪೊಲೀಸೆರ್ ಎತ್ತ್ನಗ ಆಕೊಂದಿತ್ತಿನಕುಲು ಬಲ್ತ್ ಪೋತೆರ್ ಪನ್ದ್ ವರದಿ ಆತ್ಂಡ್.
ಈ ವಿಷಯೊನು ಖಾಗಾ ಪೊಲೀಸ್ ಸ್ಟೇಶನ್ದ ಎದುರು ಕನತಿತ್ತ್ದ್ ಅಧಿಕಾರಿಲು ನಡುಕು ಬತ್ತ್ದ್ ಮದಿಮೆ ಉಂತಾದೆರ್. ಗಡಿಕುಲಾತಿನಕ್ಲೆಗ್ ಪ್ರಯಾಗ್ರಾಜ್ಡ್ ಮರ್ದ್ ನಡತೊಂದುಂಡು. ಗುರುವಾರ, ರಡ್ಡ್ ಇಲ್ಲದಕುಲುಲಾ ಪೊಲೀಸ್ ಸ್ಟೇಷನ್ಗ್ ಬತ್ತ್ದ್ ಕುಡ ಚರ್ಚೆಗ್ ಜತ್ತ್ದೆರ್. ವಿಚಾರಣೆದ ಪೊರ್ತುಡು, ಪೊಣ್ಣು ಎಂಕ್ ನನ ಈ ಮದಿಮೆ ಇಷ್ಟ ಇಜ್ಜಿ ಪನ್ದ್ ಪನ್ತಲ್.
ಕಾಲಿ ನಾಯಿ ಕೊರೆತಿನೆಕ್ ಮದಿಮೆ ಕಡೀಂಡಾ ಅತ್ತ್ ಬೇತೆ ದಾಲ ನೆವನ ಉಂಡಾ ಪನ್ದ್ ಜಡ್ತೆಡ್ ತೆರಿದ್ ಬರೊಡಾತೆ.