Last updated on February 26th, 2026 at 06:52 pm
ಪುತ್ತೂರು, ಫೆ. 26: ವಿದ್ಯಾರ್ಥಿನಿಯೆರೆನ ಪೊರ್ಮ್ಬಾಟೊನು ಉಂತಾವರೆ ಆವಂದಿನ ಅಂಚೆನೇ ಆಡಳಿತಾತ್ಮಕ ಕರ್ತವ್ಯ ಲೋಪ ಮಲ್ತಿನ ಆರೋಪಡ್ ಪುತ್ತೂರುದ ಸರ್ಕಾರಿ ಪ್ರಥಮ ದರ್ಜೆ ಮಹಿಳಾ ಕಾಲೇಜ್ದ ಇನ್ಚಾರ್ಜ್ ಪ್ರಿನ್ಸಿಪಾಲ್ ಬೊಕ್ಕ ಅಸಿಸ್ಟೆಂಟ್ ಪ್ರೊಫೆಸರ್ ವೇದಶ್ರೀ ವಿದ್ಯಾ ಮೆರೆನ್ ಬೇಲೆರ್ದ್ ಸಸ್ಪೆಂಡ್ ಮಲ್ತ್ದ್ ಸರ್ಕಾರ ಆದೇಶ ಕೊರ್ತುಂಡು.
ಉನ್ನತ ಶಿಕ್ಷಣ ಇಲಾಖೆದ ಸರ್ಕಾರೊದ ಅಧೀನ ಕಾರ್ಯದರ್ಶಿಲು ಫೆಬ್ರವರಿ 26ತಾನಿ ಈ ಆದೇಶ ಕೊರ್ತೆರ್.
ಪ್ರಕರಣೊದ ಒಲವು:
ಕರಿನ ಫೆಬ್ರವರಿ 16ತಾನಿ ಕಾಲೇಜ್ದ ಪೊಣ್ಣು ಜೋಕುಲು ಮುನ್ಸೂಚನೆ ದಾಂತೆ ಸಾರ್ವಜನಿಕ ಜಾಗೆಡ್ ಸಾದಿಗಡ್ಡ ಕಟ್ಟ್ದ್ ಪೊರ್ಮ್ಬಾಟ ಮಲ್ತಿತ್ತೆರ್. ಕಾಲೇಜ್ದ ಕೈತಲ್ ಡಯಾಲಿಸಿಸ್ ಕೇಂದ್ರ ಕಟ್ಟೊಂದಿಪ್ಪುನೆರ್ದಾವರ ಆವೊಂದುಪ್ಪುನ ಆರೋಗ್ಯ ಸಮಸ್ಯೆ ಬೊಕ್ಕ ಮೂಲಸೌಕರ್ಯೊಲೆನ ಕುಂದೆಲ್ದ ಬಗೆಟ್ ಜೋಕುಲು ಆಕ್ರೋಶ ತೂಪಾದಿತ್ತೆರ್.
ಸಸ್ಪೆಂಶನ್ಗ್ ನೆವನೊಲು:
ಸರ್ಕಾರೊದ ಆದೇಶೊದ ಪ್ರತಿತ ಪ್ರಕಾರ, ಸಸ್ಪೆಂಶನ್ಗ್ ಈ ತಿರ್ತ್ದ ಪ್ರಮುಖ ನೆವನೊಲೆನ್ ಉಲ್ಲೇಖ ಮಲ್ತ್ದೆರ್.
- ಪ್ರಚೋದನೆದ ಆರೋಪ: ಜೋಕುಲೆಗ್ ಕಲು ಒಲವು ಕೊರ್ದು ಸರ್ಕಾರೊದ ವಿರುದ್ಧ ಪೊರ್ಮ್ಬಾಟ ಮಲ್ಪೆರ ಪ್ರಚೋದನೆ ಕೊರ್ತೆರ್ ಪನ್ಪಿ ಬಗೆಟ್ ಗುಪ್ತಚರ ಇಲಾಖೆ ಒಲವು ಕೊರ್ತುಂಡು.
- ಒಲವು ಕೊರಂದೆ ಗೋಸ್ಮರಿ: ಪೊಣ್ಣು ಜೋಕುಲೆನ ಸಮಸ್ಯೆಲೆನ ಬಗೆಟ್ ಅಲ್ಪದ ಶಾಸಕೆರೆಗ್ ಆವಡ್ ಅತ್ತ್ಂಡ ಕಾಲೇಜ್ ಅಭಿವೃದ್ಧಿ ಸಮಿತಿಗಾನಡ್ (CDC) ಒವ್ವೇ ಲಿಖಿತ ಒಲವು ಕೊರಂದೆ ಗೋಸ್ಮರಿ ಮಲ್ತ್ದೆರ್.
- ಇನಯ ಮಲ್ಪಂದಿನವು: ಸಮಸ್ಯೆಲೆನ ಬಗೆಟ್ ಪಾಯೆರ್ಯೆರ ಸಿಬ್ಬಂದಿ ಅತ್ತ್ಂಡ ಅಭಿವೃದ್ಧಿ ಸಮಿತಿದ ಒಟ್ಟುಗು ಒವ್ವೇ ಇನಯ ಮಲ್ತಿನ ದಾಖಲೆಲು ಇಜ್ಜ.
- ಕರ್ತವ್ಯ ಲೋಪ: ಸಾರ್ವಜನಿಕ ಜಾಗೆಡ್ ಸಾದಿಗ್ ಅಡ್ಡ ಕಟ್ಟ್ನಗ ಅವೆನ್ ಉಂತಾಯೆರ ಅತ್ತ್ಂಡ ಪರಿಸ್ಥಿತಿನ್ ಅಂಕೆಗ್ ಕನಯೆರ ಪ್ರಾಂಶುಪಾಲೆರ್ ವಿಫಲೆರಾತೆರ್ ಪನ್ದ್ ಪ್ರಾದೇಶಿಕ ಜಂಟಿ ನಿರ್ದೇಶಕೆರೆ ವರದಿ ತೆರಿಪಾದ್ಂಡ್.
ವಿದ್ಯಾರ್ಥಿನಿಯೆರೆ ಶೈಕ್ಷಣಿಕ ಹಿತದೃಷ್ಟಿರ್ದ್ ಅಂಚೆನೇ ಆಡಳಿತಾತ್ಮಕ ಜವಾಬ್ದಾರಿನ್ ಸಮಗಟ್ಟ್ ಮಲ್ಪರೆ ಆವಂದಿನೆರ್ದಾವರ ಕರ್ನಾಟಕ ನಾಗರಿಕ ಸೇವಾ ನಿಯಮಾವಳಿಲೆನ ಅಡಿಟ್ ಶಿಸ್ತು ಕ್ರಮ ಗೆತೊಂದು ಇಲಾಖಾ ವಿಚಾರಣೆನ್ ಬಾಕಿ ದೀದ್ ಸಸ್ಪೆಂಡ್ ಮಲ್ತ್ದ್ಂಡ್” ಪನ್ದ್ ಆದೇಶೊಡು ತೆರಿಪಾದೆರ್.
ಇತ್ತೆಗ್ ಕಾಲೇಜ್ದ ಪೆರಿಯ ಉಪನ್ಯಾಸಕೆರೆಗ್ ಪ್ರಾಂಶುಪಾಲೆರೆ ಜವಾಬ್ದಾರಿ ಕೊರ್ಯೆರ ಸೂಚನೆ ಕೊರ್ತೆರ್.