Last updated on February 20th, 2026 at 12:13 pm
ಬಂಟ್ವಾಳ, ಫೆ. 20: ಬೆರ್ಮೆರೆಕೂಟೇಲ್ ಟೋಲ್ ಗೇಟ್ ದೆಪ್ಪೆರೆ ಒತ್ತಾಯ ಮಲ್ತ್ದ್ ‘ಬ್ರಹ್ಮರಕೂಟ್ಲು ಟೋಲ್ ಗೇಟ್ ತೆರವು ಹೋರಾಟ ಸಮಿತಿ’ ದ ಕಡೆರ್ದ್, ಸಮಾನ ಮನಸ್ಕ ಸಂಘ ಸಂಸ್ಥೆಲೆನ ಒಟ್ಟುಸೇರಿಗೆಡ್ ಮಾರ್ಚ್ 3 ತಾನಿ ಬೆರ್ಮೆರೆಕೂಟೇಲ್ ಟೋಲ್ ಗೇಟ್ದ ಕೈತಲ್ ಕಾಂಡೆ 9:00 ರ್ದ್ ಮಧ್ಯಾಹ್ನ 12:00 ಮುಟ್ಟ ಮಲ್ಲ ಸಾಮೂಹಿಕ ಧರಣಿ ಮಲ್ಪೆರ ನಿರ್ಧಾರ ಮಲ್ತ್ದೆರ್.
ಮಂಗಳೂರು ಜಿಲ್ಲೆಡ್ ಪೊಸ ಟೋಲ್ ಗೇಟ್ ಲೆನ್ ದೆಪ್ಪೆರೆ ಅಟ್ಟನೆ ಜೋರಾವೊಂದಿತ್ತಿಲೆಕನೆ ಬಿ.ಸಿ. ರೋಡ್ ಡ್ ಬಂಟ್ವಾಳ ತಾಲೂಕ್ದ ಸಮಾನ ಮನಸ್ಕ ಸಂಘಟನೆಲು, ಟೋಲ್ ವಿರೋಧಿ ಪೊರ್ಮ್ಬಾಟಗಾರೆರ್ ಬೆರ್ಮೆರೆಕೂಟೇಲ್ ಟೋಲ್ ಗೇಟ್ ದೆಪ್ಪೆರೆ ಬೋಡಾಪಿನ ಪೊರ್ಮ್ಬಾಟೊದ ಬಗೆಟ್ ಸಮಾಲೋಚನಾ ಸಭೆ ಮಲ್ತೆರ್. ಈ ಸಭೆ ಮಾಜಿ ಸಚಿವೆ ಬಿ ರಮಾನಾಥ ರೈ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.
ಈ ಸಭೆಟ್ ಬೇತೆ ಬೇತೆ ಸಮಾನ ಮನಸ್ಕ ಸಂಘಟನಲು, ಪಕ್ಷೊಲೆನ ಪ್ರತಿನಿಧಿಲು ಮಲ್ಲ ಸಂಖ್ಯೆಡ್ ಪಾಲ್ಪಡೆಯೆರ್. ತೊರ್ತಲ್ ಟೋಲ್ ಗೇಟ್ ವಿರೋಧಿ ಪೊರ್ಮ್ಬಾಟ ಸಮಿತಿದ ಸಂಚಾಲಕೆ ಮುನೀರ್ ಕಾಟಿಪಳ್ಳ ಟೋಲ್ ಗೇಟ್ ದೆಪ್ಪಾಯೆರ ಬೋಡಾಪಿನ ನನದ ಪೊರ್ಮ್ಬಾಟೊಲೆನ ಬಗೆಟ್ ಮಾರ್ಗದರ್ಶನ ಕೊರ್ಯೆರ್. ಇನಯೊದ ಅಕೇರಿಡ್ “ಬ್ರಹ್ಮರಕೂಟ್ಲು ಟೋಲ್ ಗೇಟ್ ತೆರವು ಹೋರಾಟ ಸಮಿತಿ, ಬಂಟ್ವಾಳ” ರಚಿಪೆರ, ಟೋಲ್ ಗೇಟ್ ದೆಪ್ಪುನೇಟಲಾ ಬುಡಂದೆ ಪೊರ್ಮ್ಬಾಟ ಮಲ್ಪೆರ ನಿರ್ಧಾರ ಮಲ್ತೆರ್.
ಪೊರ್ಮ್ಬಾಟ ಸಮಿತಿಗ್ ಬಿ ರಮಾನಾಥ ರೈ ಮೆರೇನ್ ಗೌರವಾಧ್ಯಕ್ಷೆರಾದ್, ಬಿ ಶೇಖರ್ ಬೊಕ್ಕ ಮೋಹನ್ ಶೆಟ್ಟಿ ಮೊಕಲೆನ್ ಸಂಚಾಲಕೆರಾದ್ ಸರ್ವಾನುಮತೊಡು ಅಜತೆರ್. ಬರ್ಪಿ ದಿನೊಟು ಸಮಾನ ಮನಸ್ಕೆರಾಯಿನ ಮಾತೆರ್ಲಾ ಇತ್ತ್ದ್ ಸಮಾವೇಶ ಮಲ್ತ್ದ್ ಪೂರ್ಣಪ್ರಮಾಣೊದ ಸಮಿತಿ ಉಂಡು ಮಲ್ಪೆರ ತೀರ್ಮಾನ ಗೆತೊಂಡೆರ್.
ಬೆರ್ಮೆರೆಕೂಟೇಲ್ ಟೋಲ್ ಗೇಟ್ ದೆಪ್ಪೆರೆ ಒತ್ತಾಯ ಮಲ್ತ್ದ್ ಪೊಸ ಸಮಿತಿದ ಕಡೆರ್ದ್, ಸಮಾನ ಮನಸ್ಕ ಸಂಘ ಸಂಸ್ಥೆಲೆನ ಒಟ್ಟುಸೇರಿಗೆಡ್ ಮಾರ್ಚ್ 3 ರ ತಾನಿ ಬೆರ್ಮೆರೆಕೂಟೇಲ್ ಟೋಲ್ ಗೇಟ್ದ ಕೈತಲ್ ಕಾಂಡೆ 9:00 ರ್ದ್ ಮಧ್ಯಾಹ್ನ 12:00 ಮುಟ್ಟ ಮಲ್ಲ ಸಾಮೂಹಿಕ ಧರಣಿ ಮಲ್ಪೆರೆ ಸಭೆಟ್ ತೀರ್ಮಾನ ಮಲ್ತೆರ್. ಟೋಲ್ ಗೇಟ್ ಮುಲ್ಪರ್ದ್ ಪೋಪುನೆಟ ಬುಡ್ಪುಜ ಪನ್ದ್ ಘೋಷಣೆ ಮಲ್ತೆರ್.