Last updated on February 13th, 2026 at 01:20 pm
ಬೆದ್ರ, ಫೆ. 13: ಬೇಲೆ ಆವೊಂದುಪ್ಪುನ ಕಾರ್ಲ–ಬೆದ್ರ ರಾಷ್ಟ್ರೀಯ ಪೆರ್ಸಾದಿದ ಬನ್ನಡ್ಕಡ್ ಗುರುವಾರ ರಾತ್ರೆ ನಡತಿನ ಭೀಕರ ಎಡ್ತೆಡ್ ಗಾತಿದ ಗಡಿಕುಲಾದಿತ್ತಿನ ಪಿಯುಸಿ ವಿದ್ಯಾರ್ಥಿ ಮರ್ದ್ ಪಲಿಪಂದೆ ತೀರ್ದಿನ ನಡಕೆ ನಡತ್ದ್ಂಡ್. ಎಡ್ತೆಡ್ ಪುಗರ್ತೆದ ಕಂಟೆಂಟ್ ಕ್ರಿಯೇಟರ್ ಸೂರಜ್ಗ್ ಗಾತಿದ ಗಡಿಕುಲಾತ.
ಬೆದ್ರದ ರೋಟರಿ ಪಿಯು ಕಾಲೇಜ್ದ ಸೆಕೆಂಡ್ ಪಿಯುಸಿ ವಿದ್ಯಾರ್ಥಿ, ಮಾರ್ಪಾಡಿ ಗ್ರಾಮೊದ ಕೋಟೆಬಾಕಿಲ್ ಸದಾನಂದ ಸುವರ್ಣ- ರಾಜಶ್ರೀ ದಂಪತಿಲೆನ ಮಗೆ ಶ್ರವಣ್ ತೀರ್ದಿನ ಆಣ್. ಎಡ್ತೆದ ಪೊರ್ತುಡು ಬೆದ್ರದ ಕಂಟೆಂಟ್ ಕ್ರಿಯೇಟರ್ ಸೂರಜ್ ಅಂಚನ್ ಬೈಕ್ ಬುಡೊಂದಿತ್ತ್ದ್, ಶ್ರವಣ್ ಪಿರವು ಕುಲ್ದಿತ್ತೆರ್.
ಬನ್ನಡ್ಕ ದೈವಸ್ಥಾನೊದ ಕೈತಲ್ ಸಾದಿ ಕಡಪುನ ಪೊರ್ತುಡು ಬೆದ್ರದಂಚಿರ್ದ್ ಬೀಸ ಬತ್ತಿನ ಕಾರ್ ಬೈಕ್ಗ್ ಎಡ್ತ್ದ್ಂಡ್ ಪನ್ದ್ ತೆರಿದ್ ಬೈದ್ಂಡ್. ಎಡ್ತೆದ ಬರಸ್ಗ್ ಇರ್ವೆರೆಗ್ಲಾ ಗಾತಿದ ಗಡಿಕುಲಾತ. ಸುರುಕು ಬೆದ್ರದ ಆಸ್ಪತ್ರೆಗ್ ದಾಕಲ್ತ್ದೆರ್, ಬೊಕ್ಕ ಸ್ಥಿತಿ ಗಂಭೀರ ಆಯಿನೆರ್ದಾವರ ಕುಡ್ಲದ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ದೆರ್. ಆಂಡ ಶ್ರವಣ್ ಮರ್ದ್ ಪಲಿಪಂದೆ ತೀರ್ದೆರ್.