Last updated on February 13th, 2026 at 11:24 am
ಕುಡ್ಲ, ಫೆ. 13: ಪೋವೊಂದಿತ್ತಿನ ಓಮ್ನಿ ವ್ಯಾನ್ಡ್ ಒರರ್ದ್ ಒರಾನೆ ಸೂ ತೋಜಿದ್ ಬೈದಿತ್ತ್ದ್, ಪಿರವುರ್ದ್ ಬರೊಂದಿತ್ತಿನ ಗಾಡಿದಕ್ಲೆನ ಎಚ್ಚರ್ಗೆರ್ದಾವರ ಡ್ರೈವರ್ ಒಂತೆಟೇ ಬಚಾವಾತಿನ ನಡಕೆ ಕೋಟೆಕಾರ್ದ ಅಡ್ಕ ಪನ್ಪಿನಲ್ಪ ಗುರುವಾರ ನಡತ್ದ್ಂಡ್.
ತಲಪಾಡಿ ನಿವಾಸಿ ರಿಯಾಜ್ ಪನ್ಪಿನಾರ್ ಗುರುವಾರ ಮಧ್ಯಾಹ್ನ ಅಡ್ಕದ ಗ್ಯಾರೇಜ್ರ್ದ್ ರಿಪೇರಿ ಮುಗಿದಿತ್ತಿನ ತನ್ನ ವ್ಯಾನ್ನ್ ಗೆತೊಂದು ಪಿರ ಬರೊಂದಿತ್ತೆರ್. ಪೆಟ್ರೋಲ್ ಬಂಕ್ಡ್ ಪೆಟ್ರೋಲ್ ದಿಂಜಾದ್ ತಲಪಾಡಿದಂಚಿ ಪೋವೊಂದುಪ್ಪುನಗ ಗಾಡಿಡ್ ಪುಗೆ ತೋಜಿದ್ ಬೈದ್ಂಡ್. ಆಂಡ, ಗಾಡಿಗ್ ಸೂ ಪತೊಂದಿನ ರಿಯಾಜ್ ರೆನ ಗೇನೊಗು ಬೈದಿಜಿ. ಈ ಪೊರ್ತುಡು ಪಿರವುರ್ದ್ ಬರೊಂದಿತ್ತಿನ ಕುಡೊಂಜಿ ಗಾಡಿದಕುಲು ಸೂ ಪತೊಂದಿನ ಬಗೆಟ್ ರಿಯಾಜ್ ರೆಗ್ ತೆರಿಪಾದೆರ್.
ಅಪಗನೇ ರಿಯಾಜ್ ಹೈವೇ ಬರಿಟ್ ಗಾಡಿ ಉಂತಾದ್ ಪಿದಯಿ ಬತ್ತ್ದೆರ್. ಆರ್ ಓಮ್ನಿರ್ದ್ ಜತ್ತೊಂದಿತ್ತಿಲೆಕನೆ ಇಡೀ ವ್ಯಾನ್ ಸೂ ಪತೊಂದು ಅಲಕ್ಕ ಪೊತ್ತುದು ಸುಡು ಸೂಕರಿ ಆತ್ಂಡ್. ಒಲವು ತಿಕ್ಕಿನೇ ಜಾಗೆಗ್ ಬತ್ತಿನ ಅಗ್ನಿಶಾಮಕ ಬೊಕ್ಕ ತುರ್ತು ಸೇವಾ ಸಿಬ್ಬಂದಿ ಸೂ ತೆಕ್ಕಾದೆರ್.