Last updated on February 7th, 2026 at 05:39 pm
2004 ಟ್ ತುಲುಕೂಟ ಉಡುಪಿ ನಡಪಾಯಿನ, ಪಣಿಯಾಡಿ ಪ್ರಶಸ್ತಿದ ಪತ್ತನೇ ವರ್ಷೊದ ವಿಶೇಷ ಇನಾಮು ಗೆಂದಿನ ಕಾದಂಬರಿ ರಡ್ಡ್ ಕುದುರುದ ನಡುಟು , ಬರೆತಿನಾರ್ ಶ್ರೀಯುತ ಕೇಶವ ಸಂಕಮಾರ್.
ಈ ಕತೆ ಬೂಕು ಎನ್ನ ಕೈಕ್ ಕೇಶವಣ್ಣನ ಯಜಮಾನ್ದಿ ಶ್ರೀಮತಿ ಸುನಂದಾ ಅಕ್ಕಾಕೊರ್ತಿನಾರ್. ದಾದನಾ ಒಂಜಿ ಯೋಗಾಯೋಗದಲೆಕ ಆರೆನ ಗುರ್ತ ಪರಿಚಯ ಎಂಕ್ ಮಂತಿನಾರ್ ಸುರತ್ಕಲ್ ದ ಡಾ. ಕಸ್ತೂರಿ ಟೀಚರ್. ಕೈ ಕ್ ತಿಕ್ಕಿನ ತುಲು ಬೂಕುಲೆನ್ ಓದಂದೆ ಕುಲ್ಲುನಾಲ್ ಯಾನತ್ತ್. ಅಂಚ ಈ ಕಾದಂಬರಿನ್ಲಾ ಓದೆರೆ ಕುಲ್ಲಿಯೆ. ಸಾಂಚ ತುಲು ಭಾಷೆಡ್ ನಮ ಪಾತೆರುಲೆಕಾನೆ ಪಾತೆರ್ಪಾವೊಂದು ಪೋಪುನ ಕತೆ ಕಡೇ ಮುಟ್ಟಲಾ ಗುಟ್ಟುದ ಪೊದಿಕೆನ್ ಗಿರ್ಯೆರೆ ಬುಡ್ಪುಜಿ. ರುಮು ಕೂಟುದು ಓದಾವೊಂದು ಪೋಪುನ ಒಯ್ಪು ಈ ಬರವುಗುಂಡು! ಏಪನಾ… ಕೋಡೆ ಮುರನಿ ನಡತ್ ಪೋಯಿನ ಸಂಗತಿಯಾ ಪನ್ಪುಲೆಕ ಕಣ್ಣ್ಗ್ ಕಟ್ಟಾವುಂಡು. ನಾಲ್ ಸುತ್ತಲಾ ನೀರ್ ನಡುಟು ಉಪ್ಪುನ ಕುದುರು ದೂರಗ್ ತೂಯೆರೆ ಪೊರ್ಲು ತೋಜಿಂಡಲಾ ಅಯಿತ ಉಲಾಯಿ ಬದ್ಕ್ ಕಟ್ಟೊಡಾಂಡ ಏತ್ ಬಂಙ ಉಂಡು, ತಂಕ ಇತ್ತ್ಂಡ ಉಪ್ಪಿನೀರ ನಡುಟು ಚೀಪೆದ ಒಸರ್ ಎಂಚ ಎರ್ಕಾವೊಲಿ, ಮೋಕೆದ ಅರ್ಕಟ್ಟ್ ಏತ್ ಬಿಗಿತ, ಸತ್ಯ-ದರ್ಮ ಎಂಚ ಕೈ ಪತ್ತುಂಡು ಪನ್ಪುನೆನ್ ಮಾತಾ ಒಂಜೆಕೊಂಜಿ ಮೊಡೆಯೊಂದು ಪೋತಿನ ಕತೆ, ನಂಜಿ ಮಚ್ಚರ ಎಂಚ ಪೇರ್ಗ್ ಪುಲಿ ಪುಂಟುಂಡುಂದುಲಾ ತೆರಿಪಾದ್ಂಡ್. ಕಾಡ, ಬಾಡೆರೆನ ಪೊರುಂಬಾಟ ಕಣ್ಣ್ಗ್ ಕಟ್ಟುಂಡು, ಬೊಲ್ಲದ ಪೊರ್ತುಗು ಮದಿಮಯನಕುಲು ಊರುಕಾಪೆರೆ ಜಪ್ಪುನ ಸನ್ನಿವೇಶ ಮೈ ಕೊಲ್ಚೆರುಂಡು. ಬಾಗಿನ ದುರಂತ ಅಂತ್ಯ, ಗಂಗಿನ ಪವಿತ್ರವಾಯಿನ ಮೋಕೆ. ಮರ್ಯಾದಿಯೇ ಮಲ್ಲಾಂದ್ ಅಪ್ಪೆರ್ದ್ ದೂರಾಪುನ ಬಾಲೆ, ಕಡೇಕ್ ಏರೆಗ್ ಏರ್ ಎಂಚಿನ ಸಂಬಂಧ ಪನ್ಪುನ ನಿಜನ್ ತೆರಿಪಾಯಿನ ರೀತಿ ಬಾರೀ ಸೋಕಾತ್ಂಡ್.
ಇಂಚಿನ ಕತೆನ್ ಇತ್ತೆದ ಜವನೆರ್ ಓದೊಡು, ನೆಟ್ಟ್ ತೆರಿಯೊನುನ ವಿಷಯ ಮಸ್ತ್ಂಡು. ಕಷ್ಟ ಸುಖತ ಪೊಲಬುಂಡು, ಕಡಿನೆನ್ ಒಂಜಿ ಮನ್ಪುನ ಗುಣವುಂಡು. ಉಡಲ್ಗ್ ಮುಟ್ಟ ಆಪುಂಡು. ಕಾಲ ಚಕ್ರ ತಿರುಗೊಂದು ತಿರುಗೊಂದು ಕುಡ ಅಡೇಗೆ ಬರ್ಪುಂಡು ಪನ್ಪುನೆನ್ ಈ ಕತೆಟ್ ತೂವೊಲಿ. ಅಜ್ಜೆ ಮಂತಿನ ಚಾತುರ್ಪು ಪುಲ್ಲಿ ತಲ್ಲಿನ ಮೂಲಕ ಕುಡೊಂಜಿ ತಿಕ್ಡ್, ಕುಡೊಂಜಿ ರೂಪೊಡು ಕುಡ ಪುಟ್ಟುಂಡು ಪನ್ಪುನೆನ್ ಬಾರಿ ಪೊರ್ಲುಡು ಕತೆಟ್ ತೂವೊಲಿ.
ಕತೆಕ್ ಇಂಚ ನಾಲಚ್ಚರಡ್ ಪುಗಾರ್ತೆ ಬರೆಂಡ ದಾಲಾ ಯಾರಂದ್, ಈ ಕತೆತ ಉಲ ತಿರ್ಲ್ನ್ ಓದುದೇ ತೆರಿಯೊಡು ಪನೊಂದು, ಕತೆ ಬರೆಯಿನ ಕೇಶವ ಸಂಕಮಾರಣ್ಣಗ್ ಅಂಚೆನೆ ಬೂಕುನು ಎನ್ನ ಕೈಕ್ ಪಾಡಿನ ಸುನಂದಕ್ಕಗ್ ಎಡ್ಡೆಪ್ಪುಲೆನ್ ಬಯಕೊಂದು, ತುಲು ಬರವುದ ಸಿರಿತುಪ್ಪೆಗ್ ನನಲಾತ್ ತುಲು ಬರವುಲು ಇರೆ ಕೈಟ್ ಉದಿಪಡ್. ಮದೆಕ್ ಸಂದೊಂದುಪ್ಪುನ ಅವ್ವೇತೊ ತುಲು ಪದೊಕುಲು ಮಾಜಂದೆ ಒರಿಯಡ್ಂದ್ ಪನೊಂದು, ಉಡಲ್ದಿಂಜಿನ ಎಡ್ಡೆಪ್ಪುಲು.
✍🏻ಕುವಿಕು ಕಣ್ವತೀರ್ಥ
07-02-2026