Last updated on February 7th, 2026 at 12:51 pm
ಕುಡ್ಲ, ಫೆ. 07: ನಂತೂರು ಸರ್ಕಲ್ದ ಕೈತಲ್ ಪ್ರೈವೇಟ್ ಬಸ್ ಎಡ್ತ್ದ್ ಸ್ಕೂಟರ್ಡ್ ಪಿರವು ಕುಲ್ದಿತ್ತಿನ ಪೊಣ್ಣು ತೀರ್ದಿನ ಪ್ರಕರಣೊಗು ಸಂಬಂಧಿತ್ದ್ ಮನದಾನಿ ಕದ್ರಿ ಟ್ರಾಫಿಕ್ ಪೊಲೀಸ್ ಸ್ಟೇಶನ್ದ ಎದುರು ಬಸ್ ಡ್ರೈವರ್ನ ಮಿತ್ತ್ ಕ್ರಮ ಗೆತೊನರೆ ಪೊರ್ಮ್ಬಾಟ ಮಲ್ತಿನಕ್ಲೆನ ಮಿತ್ತ್ ಕೇಸ್ ಪಾಡ್ದೆರ್.
1) ಅಮೀತ್, ವಿವೇಕನಗರ ಬಲ್ಲಾಳ್ ಭಾಗ್ 2) ಕೀರ್ತನ್ ,ವಿವೇಕನಗರ ಬಲ್ಲಾಳ್ ಭಾಗ್ 3) ನವೀತ್ ವಿವೇಕನಗರ , ಬಲ್ಲಾಳ್ ಭಾಗ್ 4) ಭರತ್ ರಾಜ್ ವಿವೇಕನಗರ ಬಲ್ಲಾಳ್ ಭಾಗ್ ,5) ಪವನ್, ವಿವೇಕನಗರ ಬಲ್ಲಾಳ್ ಭಾಗ್ 6) ಲೋಕೆಶ್ ,ಮಂಗಳಾದೇವಿ,7) ಮನ್ವೀತ್ ಬಲ್ಲಾಳ್ ಭಾಗ್ 8) ಅನೀಲ ಕುಮಾರ್ ಕಂಕನಾಡಿ ,9) ಪ್ರೇಮನಾಥ ಬಲ್ಲಾಳ್ ಭಾಗ್ ಬೊಕ್ಕ ಒಂತೆ ಜನೊತ ಮಿತ್ತ್ ಅಕ್ರಮಕೂಟ ಕಟೊಂದು ಸಾರ್ವಜನಿಕೆರೆಗ್ ತೊಂದರೆ ಬೊಕ್ಕ ಪೊಲೀಸೆರೆ ಬೇಲೆಗ್ ಅಡ್ಡಬತ್ತಿನ ಆರೋಪಡ್ ಪ್ರಕರಣ ದಾಕಲಾತ್ಂಡ್.
ಫೆಬ್ರವರಿ 4 ತಾನಿ ಬಯ್ಯ ನಂತೂರುದ ಕೈತಲ್ ಪ್ರೈವೇಟ್ ಬಸ್ ಎಡ್ತ್ದ್ ದೀಪ್ತಿ ಪನ್ಪಿ ಜವನ್ದಿ ತೀರ್ದಿತ್ತಲ್. ಬೊಕ್ಕ:05-02-2026 ತಾನಿ ತೀರ್ದಿನ ದೀಪ್ತಿ ನ ಪುನೊನು ಆಂಬುಲೆನ್ಸ್ ಡ್ ಕನತ್ದ್ ಕದ್ರಿ ಪೊಲೀಸ್ ಸ್ಟೇಶನ್ದ ಎದುರು ದೀದ್ ಪ್ರತಿಭಟನೆ ಮಲ್ತಿತ್ತೆರ್.
ಈ ಪೊರ್ತುಡು ಎಡ್ತಿನ ಬಸ್ದ ಡ್ರೈವರ್ನ ಮಿತ್ತ್ ಕ್ರಮ ಗೆತೊನರೆ ಪೊರ್ಮ್ಬಾಟಗಾರೆರ್ ಒತ್ತಾಯ ಮಲ್ತ್ದೆರ್. ಇಂಚ ಪುನ ದೀವೊಂದು ಪೊರ್ಮ್ಬಾಟ ಮಲ್ಪುನು ಸಮ ಅತ್ತ್ ಪನ್ದ್ ಪೊಲೀಸ್ ಅಧಿಕಾರಿಲು ಬೊಕ್ಕ ಸಿಬ್ಬಂದಿಲು ಪೊರ್ಮ್ಬಾಟ ಮಲ್ತೊಂದಿತ್ತಿನಕ್ಲೆಗ್ ಏತ್ ಪನ್ಡ್ನ್ಡಲಾ ಗೆನ್ಪಂದೆ ಪೊಲೀಸೆರೆ ಬೇಲೆಗ್ ಅಡ್ಡಬತ್ತ್ದೆರ್ ಬೊಕ್ಕ ಇಂಚ ಮಲ್ತಿನೆರ್ದಾವರ ಈ ಜಾಗೆಡೆ ಬೊಕ್ಕ ಸಾದಿಯೆ ಪೋಪಿನ ಗಾಡಿದಕ್ಲೆಗ್ಲಾ ಉಪದ್ರ ಆತ್ಂಡ್. ಸಾರ್ವಜನಿಕೆರೆ ನೆಮ್ಮದಿಗ್ ಪಡಾಯಿ ಮಲ್ತ್ದೆರ್ ಪನ್ದ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದೆರ್.