Last updated on February 25th, 2026 at 04:25 am
ದೆಲ್ಲಿ, ಫೆ. 25: ಕೇರಳ ರಾಜ್ಯೊದ ಪುದರ್ನ್ ಕೇರಳಂ ಪನ್ದ್ ಪಗಪುನ ಕೇರಳ ಸರ್ಕಾರೊದ ಪ್ರಸ್ತಾವನೆಗ್ ಕೇಂದ್ರ ಸಚಿವ ಸಂಪುಟ ಕೋಡೆ ಅನುಮೋದನೆ ಕೊರ್ತುಂಡು.
ಏಪ್ರಿಲ್-ಮೇ ತಿಂಗೊಲುಡು ನಡಪುನ ಕೇರಳ ವಿಧಾನಸಭಾ ಎಲೆಕ್ಷನ್ಗ್ ದುಂಬು ಈ ಕ್ರಮ ಗೆತೊಂದೆರ್. ಕೇರಳಂ ಪನ್ಪಿ ಪುದರ್ ಮಲಯಾಳಂ ಮೂಲ ಭಾಷೆದವು ಆಯಿನೆರ್ದಾವರ ಇಂಗ್ಲಿಷ್ದ ಕೇರಳ ಪನ್ಪಿ ಪುದರ್ ಪಗತ್ದ್ ಕೇರಳಂ ಪನ್ದ್ ದೀಯೆರ ನಿರ್ಧಾರ ಮಲ್ತ್ದೆರ್.
ಈ ಬಗೆಟ್ ಕೇರಳದ ವಿಧಾನಸಭೆಟ್ ಸರ್ವಾನುಮತೊದ ನಿರ್ಣಯ ಗೆತೊಂದಿತ್ತೆರ್. ಇತ್ತೆ ಉಂದೆಕ್ ಕೇಂದ್ರ ಸಚಿವ ಸಂಪುಟೊದ ಒಪ್ಪಿಗೆಲಾ ತಿಕ್ಕ್ದ್ಂಡ್. ನನ ರಾಷ್ಟ್ರಪತಿಲೆನ ಅನುಮೋದನೆ ತಿಕ್ಕ್ಂಡ ಕೇರಳ ರಾಜ್ಯೊದ ಪುದರ್ ಅಧಿಕೃತವಾದ್ ಕೇರಳಂ ಪನ್ದ್ ಪಗಪುಂಡು.
ಕೇರಳ ರಾಜ್ಯೊದ ಪುದರ್ ಪಗತಿನೆಕ್ ಸಾಂಸ್ಕೃತಿಕ ಮಹತ್ವೊಲಾ ಉಂಡು. ಮೂಲ ಪುದರ್ದ ಗಲಕೆದ ಮುಕೇನ ಇತಿಹಾಸ ಬೊಕ್ಕ ಪರಂಪರೆನ್ ತೂಪಾವುನು, ಕೇರಳ ರಾಜ್ಯೊದ ಜನೊಕ್ಲೆನ ಭಾವನೆಲೆಗ್ ಗೌರವ ಕೊರ್ಪುನ ಇಂದೆತ ಮುಖ್ಯ ಉದ್ದೇಶ. ಭಾರತೊದ ಸಂವಿಧಾನೊದ ಪ್ರಕಾರ ರಾಜ್ಯೊದ ಪುದರ್ ಪಗಪೆರೆ ಸಂಸತ್ತ್ಡ್ ತಿದ್ದುಪಡಿ ಮಸೂದೆ ಅಂಗೀಕಾರ ಆತ್ಂಡ್. ಅವೆಕ್ ಇತ್ತೆ ರಾಷ್ಟ್ರಪತಿಕ್ಲೆನ ಅನುಮೋದನೆ ಮಾತ್ರ ಬಾಕಿ.
ಮಲಯಾಳಂ ಡ್ ಕೇರಳಂ ಪನ್ಡ ‘ತಾರಾಯಿದ ನಾಡ್’ ಪನ್ದ್ ಅರ್ಥ. ‘ಕೇರಾ’ ಪನ್ಡ ತಾರಾಯಿ, ‘ಆಲಂ’ ಪನ್ಡ ನಾಡ್ ಅತ್ತ್ಂಡ ಭೂಮಿ ಪನ್ದ್ ಅರ್ಥ. ರಡ್ಡೆನ್ಲಾ ಗೋಡ್ಯಾದ್ ಕೇರಳಂ(ತಾರಾಯಿದ ನಾಡ್) ಪನ್ದ್ ಲೆಪ್ಪುವೆರ್. ಕೇರಳ ರಾಜ್ಯೊಡು ಎಚ್ಚ ತಾರಾಯಿ ಬುಲೆಪುಂಡು. ಕೇರಳಂ ಪುದರ್ ಭೌಗೋಳಿಕ, ಸಾಂಸ್ಕೃತಿಕ ವೈಶಿಷ್ಟ್ಯೊನು ಸೂಚಿಪುನೆರ್ದಾವರ, ಕೇರಳ ಪುದರ್ನ್ ಕೇರಳಂ ಪನ್ದ್ ಮಲ್ಪೆರ ಕೇಂದ್ರ ಸರ್ಕಾರ ಒಪ್ಪಿಗೆ ಕೊರ್ತುಂಡು.