ಅಶೋಕ್ ರೈ ಆಕಸ್ಮಿಕ ಶಾಸಕೆ…ಆರೆಗ್ ತಿಕ್ಕಿನ ಅಧಿಕಾರ ಉಂದೇ ಕಡೆ, ನನ ಶಾಸಕೆ ಆಪುಜೆರ್ – ಮಂಜುಳಾ ರಾವ್

Last updated on March 3rd, 2026 at 01:03 pm

ಪುತ್ತೂರು, ಮಾ. 03: ಪುತ್ತೂರು ಮಹಿಳಾ ಕಾಲೇಜ್‌ದ ಪ್ರಿನ್ಸಿಪಾಲ್‌ನ್ ಅಮಾನತ್ ಮಲ್ತಿನೆನ್ ವಿರೋಧಿತ್‌ದ್ ಬಿಜೆಪಿ ಮಹಿಳಾ ಮೋರ್ಚಾ ಪುತ್ತೂರ್‌ಡ್ ಪೊರ್ಮ್ಬಾಟ ಮಲ್ತ್ಂಡ್.

ಪೊರ್ಮ್ಬಾಟೊನು ಉದ್ದೇಶಿತ್‌ದ್ ಪಾತೆರ್ನ ಬಿಜೆಪಿ ರಾಜ್ಯ ಮಹಿಳಾ ಘಟಕೊದ ಪದುಕೆದಿ ಸುಲೋಚನಾ ಭಟ್, ಪುತ್ತೂರು ಮಹಿಳಾ ಕಾಲೇಜ್‌ದ ಪ್ರಿನ್ಸಿಪಾಲ್‌ನ್ ಅಮಾನತ್ ಮಲ್ತಿನೆತ ಪಿರವು ಶಾಸಕೆ ಅಶೋಕ್ ರೈ ನ ಕೈ ಉಂಡು, ಶಾಸಕೆರೆಗ್ ಪ್ರಿನ್ಸಿಪಾಲ್ ವೇದಾಶ್ರೀ ನಿಡ್ಯಾ ಸಮಸ್ಯೆದ ಬಗೆಟ್ ಪನ್ಡಿನನೇ ತಪ್ಪಾಂಡಾ? ಅಶೋಕ್ ರೈ  ಶಾಸಕೆ ಆತಿನ ಅಲ್ಪಗ್ ಐಶ್ವರ್ಯ ಬತ್ತಿಲೆಕ ಆತ್ಂಡ್, ಅಂಚಾದ್ ದುಂಬು ಎಂಚ ಪಿಸ್ತೂಲ್ ಪತೊಂದು ಗೂಂಡಾಗಿರಿ ಮಲ್ತೊಂದಿತ್ತೆರಾ, ಅವೆನೇ ಶಾಸಕೆ ಆದ್ ಇತ್ತೆ ದುಂಬರಿತೊಂದುಲ್ಲೆರ್. ಅಶೋಕ್ ರೈ ನ ಗೂಂಡಾ ಪ್ರವೃತ್ತಿ, ಪೊಂಜೊವುಲೆನ ಮಿತ್ತ್ ಪುತ್ತೂರ್‌ಡ್ ಬುಡಂದೆ ದಬ್ಬಾಳಿಕೆ ಆವೊಂದುಂಡು ಪನ್ದ್ ಅಶೋಕ್ ರೈಕ್ಲೆನ ಮಿತ್ತ್ ಸುಲೋಚನಾ ಭಟ್ ಪಿಸಿರ್ ತೋಜಾದೆರ್.

ಪೊರ್ಮ್ಬಾಟೊಡು ಪಾತೆರ್ನ ದ.ಕ. ಬಿಜೆಪಿ ಮಹಿಳಾ ಮೋರ್ಚಾದ ಜಿಲ್ಲಾಧ್ಯಕ್ಷೆದಿ ಮಂಜುಳಾ ರಾವ್ , ಶಾಸಕೆ ಅಶೋಕ್ ರೈ ಸಮಾಜೊದ ವಿರುದ್ದ ನಡತೊಂದೆರ್, ಉಂದು ಸಮ ಅತ್ತ್, ಮಹಿಳಾ ಕಾಲೇಜ್‌ದ ಪ್ರಿನ್ಸಿಪಾಲ್‌ನ್ ಪೋಡಿಕಟ್ಟಾವುನ ಬೇಲೆ ಆರೆರ್ದ್ ಆತ್ಂಡ್. ವಿದ್ಯಾರ್ಥಿಲೆನ ಎದುರು ಬರವು ಕಲ್ಪಾವುನ ಗುರುನು ಎಲ್ಯೆ ಮಲ್ತ್‌ದ್ ಪಾತೆರುನ ಏತ್ ಸಮ, ಶಿಕ್ಷಣ ಕೊರ್ಪೂನ ಗುರುಕ್ಲೆನೇ ಪೋಡಿಪಾವೆರ್ಂದಾಂಡ ಆರೆನ ಇಂಚಿನ ದಬ್ಬಾಳಿಕೆಗ್  ಜನ ಬೋಡಾಪಿನ ಉತ್ತರ ಕೊರ್ಪೆರ್ ಪನ್ದ್ ಪನ್ಡೆರ್.

ಅಶೋಕ್ ರೈ ಆಕಸ್ಮಿಕ ಶಾಸಕೆ, ಆರೆಗ್ ತಿಕ್ಕಿನ ಅಧಿಕಾರ ಉಂದೇ ಕಡೆ , ನನ ದುಂಬಗ್ ಅಶೋಕ್ ರೈ ಶಾಸಕೆ ಆಪುಜೆರ್, ಇಂಚಿನಕ್ಲೆಗ್ ಬರ್ಪಿ ದಿನೊಟು ಜನೊಕುಲು ಸಮ ಉತ್ತರ ಕೊರ್ಪೆರ್ ಪನ್ದ್ ಪನ್ಡೆರ್.