ನರಮಾನಿ ಬದ್ಕ್ ಡ್ ಪಕ್ಕಿಲು – ಕುವಿಕು ಕಣ್ವತೀರ್ಥ

Last updated on March 3rd, 2026 at 02:58 pm

ಭೂಮಿದ ಮಿತ್ತ್ ನರಮಾನಿ ಬದ್ಕ್ ನಗ ಈ ಪಸಂತ್ರೊಡು ಇತ್ತಿನ ಪ್ರತಿಯೊಂಜಿ ಸೊತ್ತುನುಲಾ ಹೊಂದೊಂದೇ ಬದುಕುವೆರ್, ಮಣ್ಣ್, ನೀರ್, ದಯಿ, ಮರ ಮಾತ್ರ ಅತ್ತಂದೆ ಮುರ್ಗೊಲು, ಪಕ್ಕಿಲುಲಾ ಅಯಿಟ್ ಸೇರುಂಡು.

ಪಕ್ಕಿಲು ನರಮಾನಿನ ಬದ್ಕ್ ಡ್ ಎಂಚ ಉಲ್ಲ ಪನ್ನಗ ದಿನ ಬೊಲ್ಪುಪಾನಗ ಇಲ್ಲದ  ಕೂಡುಡು ಕೆಲೆಪುನ ಕೋರಿದ ನೆಂಪಾಪುಂಡು, ದುಂಬುದ ಕಾಲೊಡು ಪ್ರತೀ ಇಲ್ಲಡ್ಲಾ ಕೋರಿ ತಾಂಕೊಂದು ಇತ್ತೆರ್, ಹಿರಿಯಕ್ಲೆನ ಒಂಜಿ ಪಾತೆರನೇ ಇತ್ಂಡ್ “ಪೆಜ್ಜಿತಿನೆರೆ ರಡ್ಡ್ ಕೋರಿ ತಾಂಕೊಡು”. ಪಂಡ ಇಲ್ಲ ಸುತ್ತಲ ಬಿತ್ಲ್ ಡ್, ತಾರೆದ ಮುದೆಲ್, ದಯಿತ ಮುದೆಲ್ ಡ್ ಮಾತಾ ಪುರಿಪಾಂತೆ ಉದಲ್ ಪೆಜ್ಜಿದ್ ಅಯಿತ ಬಂಜಿ ದಿಂಜಾವೊಂದು ನಮಕ್ ಉಪಕಾರ ಮನ್ಪುಂಡು, ಅಂಚೆನೆ ಬಿರ್ಕಿನ ಮಡೆ ಅಡಿತ್ ಪಿದಯಿ ದಕ್ಕ್ಂಡ ಪೆಜ್ಜುಂಡು. ಬೆನ್ನಿದ ಇಲ್ಲಡ್ ದಡ್ಡ್, ಬಾರ್, ಬಿರ್ಕಿನೆ ಪೆಜ್ಜಿತಿನ್ಪ, ಜಾಲ್ಡ್ ಬೂರ್ದು ಆಳಾಪುನೆನ್ ಅಯಿಕುಲು ತಿಂದ್ದ್ ನಿರ್ಮಲ ಮನ್ಪುವ. ಅರಿಪೊಡೆತ್ ದ್ ತಿಕ್ಕುನ ನಿಂಗಲ್ ಕಿನ್ನಿಲೆಗ್ಂದೇ ದೆತ್ದ್ ದೀಪೆದೆರ್. ದುಂಬುದ ಕಾಲೊಡು ಇಲ್ಲಡೆ ಏರಾಂಡ ಅಪ್ರೂಪದ ಬಿನ್ನೆರ್ ಬತ್ತ್ಂಡ ಇಲ್ಲದನೇ ಕೋರಿ ಪತ್ದ್ ಕಜಿಪು ಮನ್ಪುನೆ.ದುಂಬುಮಾತ ಇತ್ತೆದಲೆಕ ಕೋರಿ ಮಾಸಮಂತ್ ಕೊರ್ಪುನ ಅಂಗಡಿ ಇಜ್ಯಂಡತ್ತೇ…?. ಜಾಲ್ಡ್ ರಡ್ಡ್ ಬಾರಾ , ನಿಂಗಲಾ ದಕ್ದ್ “ಬಾ ಬಾ “ಪಂಡ್ದ್ ಲೆತ್ತ್ಂಡ ಯಾವು ಕೋರಿಲು ಮಾತಾ ಬತ್ದ್  ಸೇರುಂಡು. ರಡ್ಡ್ ಮೂಜಿ ಜನ ಸುತ್ತ ಉಂತುದು ಮೆಲ್ಲ ಕಬ್ಬುದು ಒಂಜೆತ ಕಾರ್ಡ್ ಪತ್ತ್ಂಡ ಆಂಡ್ ಬಿನ್ನಗ ತಮ್ಮನ! ಇಲ್ಲಡ್ ಏರಾಂಡ ಕೋರಿದ ಕಟ್ಟದ ಬೆರಂತ್ ದಕ್ಲು ಇತ್ತ್ಂಡ ಪನ್ಪುನನೇ ಬೊರ್ಚಿ, ಜಾಲ್ದ ಮೂಲೆ ಮೂಲೆಡ್, ಕೊಟ್ಯಡ್, ಇಲ್ಲ ಮುಟ್ಟದ ಮರತ ಮುದೆಲ್ಡ್ ಮಾತಾ ಕುಂಟ ಪಾಡ್ದ್ ಕಟ್ಟ್ ಪಾಡ್ನ ಕಟ್ಟದ ಕೋರಿಲೆನ್ ತೂವೊಲಿ. ಅಯಿಟ್ಲಾ ಚಂಡದ ಕೋರಿ, ರಂಗ್, ಕೊಟ್ಟು, ಅರ್ವೆ ಮಾತಾ ತೂಯೆರೆ ಉಂಡು. ಕಟ್ಟದ ಕೋರಿದ ಬಗೆಟ್ ಕುಕ್ಕುಟ ಪಂಚಾಂಗನೇ ಉಂಡು ಪನ್ಪೆರ್!! ಕಟ್ಟ್ ದ ಕೋರಿಡ್ ಸುಮಾರ್ ಇದೊ ಉಂಡು. ಉರಿಯೆ, ಕೆಂಪುರಿಯೆ, ಕಪ್ಪುರಿಯೆ, ಮೈಪೆ, ಕೆಮ್ಮರಮೈಪೆ, ಕಪ್ಪುಮೈಪೆ, ಬೊಲ್ದುಮೈಪೆ, ಬೊಲ್ಲೆ, ಗಂದಬೊಲ್ಲೆ, ಕರ್ಬೊಲ್ಲೆ, ಶಾಸ್ತ್ರಿಬೊಲ್ಲೆ, ಕಡ್ಲೆ, ಕಪ್ಪುಕಡ್ಲೆ, ಕೆಮ್ಮರೆಕಡ್ಲೆ, ಪಂರ್ದ್ ಕಡ್ಲೆ, ಬೊಲ್ದುಕಡ್ಲೆ, ಕೊರುಂಗೆ, ಪೆರಡಿಂಗೆ, ಪೆರಡಿಂಗಮೈಪೆ, ಕಕ್ಕೆ, ಕುಪುಲೆ, ಗಿಡಿಯೆ, ಕಾವೆ, ಮಂಜೊಲೆ, ಕೆಮ್ಮರಕರ್ಬೊಲ್ಲೆ, ನೀಲೆ, ಪಂಚೊನಿ, ನೀಲಮೈಪೆ, ಬೊನ್ಯಮೈಪೆ, ಮಂಜಲ್ ಮೈಪೆ, ನಯಿಲೆ, ಪುದಚಲೆ, ಬಂಗಾರ್ ಕಡ್ಲೆ, ಕೆಮ್ಮರಉರಿಯೆ, ಜೀಂಕೆ, ಗಿಲಿರಾಜೆ, ಪೈಟರ್, ಮಂಜಲ್ ಕೆಮ್ಮರೆ ಇಂಚ . ಕೋರಿದಕಟ್ಟ ಒಂಜಿ ತುಲುನಾಡ್ ದ ಜನಪದ ಗೊಬ್ಬುಆದುಂಡು. ದುಂಬುದ ಕಾಲೊಡು ಊರುದ ಬಂಡಿ,ನೇಮಗ್ ಕೋರಿಕುಂಟ ಆದೇ ಸುರುವಾಪುನಿ. ಬೊಕ್ಕ ಈತ್ ದೀನಾಂದ್ ನಿಗಾಂಟ್ ಆತಿನಾತ್ ದಿನ ಕೋರಿದ ಕಟ್ಟ ನಡತೊಂದಿತ್ತಿನಿ, ಬೊಕ್ಕ ಬೊಕ್ಕ ಅವು ಪಂತೊದ ಗೊಬ್ಬುಲಾದ್ ಪಣವು ಕಟ್ಟ್ ದ್ ಗೊಬ್ಬುನಡೆಮುಟ್ಟ ಎತ್ತ್ಂಡ್. ಅಯಿನ್ ಪಂಡ್ದ್ ಏತೊ ಜನ ಇಲ್ಲ್ ಬಿತ್ಲ್ ಕಲೆಯೊಂದಿನಲಾ ಉಂಡುಗೆ. ಬೊಕ ಕಟ್ಟದ ಪಿರವು ಪೋದು ಗಂಗರ ಪರ್ಪುನ, ಜಿಗರಿದಂಚಿನ ಹಾಳ್ ಅಬ್ಬೆಸದ ಪುಂಡಿದುಲಯಿ ಆಯಿನಕುಲುಲಾ ಉಲ್ಲೆರ್. ಇತ್ತಿತ್ತೆ ಕೋರಿದ ಕಟ್ಟ ದ ಮಿತ್ತ್ ಸರಕಾರ ಕಣ್ಣ್ ದೀತ್ಂಡ್ , ಒಪ್ಪಿಗೆ ದೆತೊನಂದೆ ದೆಂಗ್ ದೆಂಗ್ ದ್ ಆಪುನ ಕೋರಿದ ಕಟ್ಟದಡೆ ಪೋಲಿಸ್ ರೈಡ್ ಆದ್ ಪೂರಾ ಚಲ್ಲಪಿಲ್ಲ್ ಆದ್ ಓಲೋಲು ಬಲಿಪುನ, ಅಂಚ ಬಲಿತ್ದ್ ಗುವೆಲ್ಗ್ ಕೆದುಕು ಬೂರುದು ಜೂವಪೋಯಿನಲಾ ಸುದ್ದಿ ಕೇನೆರೆ ತಿಕ್ಕುಂಡು.
     ಒಂಜಿ ಇಲ್ಲ್ ಕಟ್ಟ್ಂಡ ಇಲ್ಲಗ್ ಮಾಡ್ ಗ್ ಮರತ ಮೊಂದಾಯಿ(ವಾಲ್ ಪ್ಲೇಟ್)ದೀನಗ ಕುತ್ತಿ ಪೂಜೆ ಪಂಡ್ದ್ ಕೋರಿ ಕಡ್ಪುನ ಕ್ರಮ ಇತ್ಂಡ್, ನಮ ಇಲ್ಲ್ ಗಾದ್ ಕಡ್ತಿನ ಮರಟ್ ದಾದಾಂಡ ದೋಷ, ತೊಂದರೆ ಇತ್ತ್ಂಡ ಅಯಿಕ್ ಶಾಂತಿಗಾದ್ ಕೋರಿ ಕಡ್ಪುನ ನಂಬಿಕೆ ಇತ್ತ್ಂಡ್. ಆ ಕೋರಿನ್ ಆಚಾರ್ಲು ಕೊನೊವೊಂದಿತ್ತಿನಿ.

ದುಂಬುದ ಕಾಲೊಡು ಒಂಜಿ ಇಲ್ಲಡ್ ಬಯಕೆ ಆಪುಂಡ ಕೋರಿದ ಕಟ್ಟ ಮನ್ತೊಂದಿತ್ತೆರ್ಗೆ, ಕಟ್ಟದ ಕೋರಿದ ಕಜಿಪುಡೆ ಬಯಕೆಗ್ ಬತ್ತಿ ಬಿನ್ನೆರೆಗ್ ಒನಸ್, ಇಲ್ಲಡೊಂಜಿ ಮದಿಮೆ ಇತ್ತ್ಂಡ ನಿಚ್ಚಯೊಗು, ಬದ್ದದ ಒನಸ್ಗ್, ಮಾಮಿಸಿಕೆಕ್ ಕೋರಿ ಆವೊಡೆ. ಅಪಗ ಒಂಜಿ ರಡ್ಡ್ ಕೋರಿ ಆಜಾಂಡ ಐವ ನೂದು ಜನ ಸುದಾರಿತೊಂದಿತ್ತೆರ್. ದಿಂಜ ತಾರಯಿ ಪಾಡ್ದ್ ಆಜಾಂಡ ಕಜಿಪು ಬಲಸ್ನಗ ತುಂಡು ಬೂರುಂಡಲಾ ಆಂಡ್, ಇಜ್ಜಿಂಡಲಾ ಆಂಡ್!! ಆಂಡಾ ಊರ ಕೋರಿದ ಕಜಿಪುದ ಪನಿ ಪೂ ಬೂರುಂಡಲಾ ಯಾವುಂಡು!! ವಾ ಕಮ್ಮೆನ !! ವಾ ರುಚಿ !! ತುಲುನಾಡ್ ಡ್ ದೈವೊಗು ಕಾಲಾದಿದ ಕರಿಪುನಗ ಕೋರಿ ಅಗೆಲ್ ಬಲಸುನ ಕ್ರಮ ಉಂಡು, ಅಂಚೆನೆ ದೈವೊಗು ಪರಕೆ ಕೋರಿ ಕೊರ್ಪುನ ಕ್ರಮಲಾ ಉಂಡು. ಕೋರಿ ತಾಂಕುನ ಇಲ್ಲಡ್ ಒಂಜಿ ಪೂಂಜನ್ ಬೂತೊಗುಂದೇ ಬುಡ್ದು ತಾಂಕುವೆರ್, ಅವು ಮಲ್ಲ ಪೂಂಜೆ ಆಂಡ, ಏರಾಂಡ ಕಟ್ಟದಕುಲು ಕೇಂಡೆರ್ಂಡ “ಅವು ಕೊರ್ರೆ ಆಪುಜಿ, ಬೂತಗ್ ಬುಡ್ತಿನ ಕೋರಿ” ಪನ್ಪೆರ್. ಅಂಚೆನೆ ಬೂತಗ್ ಬುಡ್ನ ಕೋರಿಗ್ ಪೆಟ್ಟ್-ಗಡಿ ಆವಂದಿಲೆಕ ಜಾಗೃತೆಲಾ ಮನ್ಪುವೆರ್, ಪನಿ ಪೆಟ್ಟಾದ್ ನೆತ್ತೆರ್ ಪೋಂಡ ಆ ಕೋರಿ ಬೂತೊಗು ಕೊರ್ರೆ ಆಪುಜಿ. ಬೊಕ್ಕ ಒಂಜಿ ಎಲ್ಯ ಕಿನ್ನಿಡೇ ಬೂತೊಗುಂದು ಬುಡುಂಡ ಏಲೆನ್ಮ ತಿಂಗಳು ಆನಗ ಅವು ಮಲ್ಲ ಪೂಂಜೆ ಆಪ, ಬೂತದಡೆ ಕೊನೊನಗ ಮಲ್ಲ ಕೋರಿ ಕೊನೊಪುನಲಾ ನಾಲ್ ಜನತ ಎದುರು ಪನಿ ಗತ್ತ್ ದ ಇಸಯನೆ !!. ಕೆಲವು ಸರ್ತಿ ಬೂತೊಗಾನಗ ಇಲ್ಲಡ್ ಕೋರಿ ಇಜ್ಜಿಂಡ ಪಿದಯಿರ್ದ್ ದೆತ್ತ್ ಕೊನೊಪುಲೆಕ ಆಯೆರೆ ಬಲ್ಲೀಂದ್ಲಾ ದುಂಬೇ ಒಂಜಿ ಕೋರಿನ್ ಅಯಿಕ್ಂದ್ ದೀಪುನಿ ಆದುಪ್ಪು. ತುಲುನಾಡ್ ಡ್ ಕೋರಿ ಪರಕೆ ಅಗೆಲ್ ಕೊರ್ಪುನ ಮಲ್ಲ ಕಾರ್ಣಿಕ ಕ್ಷೇತ್ರ ಪಂಡ ಅವು ಪನೋಲಿ ಬೈಲ್ ಕಲ್ಲುಟ್ಟಿ ಕ್ಷೇತ್ರ. ಇಡೆ ಊರ ಪರಪೂರ ಭಕ್ತೆರ್ ಅಗೆಲ್ ಪರಕೆ ಪಂಡ್ದ್ ಅಕ್ಲೆ ಅಂಗಲ್ಪು ಈಡೇರ್ದಾನಗ, ಕಷ್ಟ ದೂರಾದಾನಗ ಬತ್ದ್ ಪರಕೆ ಸಂದಾದ್ ಪೋಪುನ ತೂವೊಲಿ. ಅಂಚೆನೆ ತುಲುನಾಡೊರ್ಮೆ ಆರಾಧನೆ ಮನ್ಪುನ ಮಾರಿಯಮ್ಮ , ಅತ್ತ್ಂಡ ಮಾರಿ ಪೂಜೆ ಗ್ ಕೋರಿ ಕೊಯ್ಪವುನ ಪಿರಾಕ್ ರ್ದೇ ನಡತೊಂದು ಬೈದ್ಂಡ್. ಉಂದುಲಾ ತುಲುವೆರೆ ಭಕ್ತಿ ಬೊಕ ನಂಬೊಲಿಕೆದ ಒಂಜಿ ಬಾಗೊವಾದುಂಡು.
     ತುಲುವೆರೆನೆಟ್ ಬಯಕೆಗ್ ಕೋರಿ ಬುಡ್ಪುನ ಕ್ರಮ ಉಂಡು. ಒಂಜಿ ಪೊಣ್ಣು ಮಗಲ್ ಕಂಡನಿಲ್ಲರ್ದ್ ಬಯಕೆ ಆದ್ ಅಪ್ಪೆಲ್ಲಡೆ ಪೋನಗ ಕಂಡನಿಲ್ಲಡ್ ಕೋರಿ ಬುಡ್ಪುನ ಕ್ರಮ ಮನ್ಪುವೆರ್, ಅಪ್ಪೆ ಇಲ್ಲದಕುಲು ಕಾಂಡೆ ಬೇಗ ಒಂಜಿ ಲಾಕಿ ಕಿನ್ನಿನ್ ಪತೊಂದು ಬರ್ಪೆರ್, ಕಾಂಡೆದ ಒಂಜಿ ಎಡ್ಡೆ ಏಲ್ಯಗಲಿಗೆಡ್ ಜಾಲ್ಡ್  ಪೊಣ್ಣನ ಮಾಮಿ ಕೋರಿದ ಕಿನ್ನಿನ್ ಪೊಣ್ಣನ ತರೆತೊರತ್ದ್ ಪೊಣ್ಣನ ಕೈಟ್ ಕಿನ್ನಿದ ಬಾಯಿಗ್ ಮೂಜಿ ಮೂಜಿ ಸರ್ತಿ ಅರಿ ಪಾಡಾದ್ ಬೊಕ್ಕ ಕಿನ್ನಿನ್ ಬುಡ್ಪುನಿ, ಪೊಣ್ಣು ಪೆದ್ದ್ ಲಕ್ಕ್ ದ್ ಬನ್ನೇಟ ಆ ಕಿನ್ನಿನ್ ಅಕುಲು ಜಾಗೃತೆಡ್ ತಾಂಕೊಡು, ಆಲ್ ಬನ್ನಗ ಅವು ಮಲ್ಲೆ ಆದ್ ತೆತ್ತಿ ದೀದ್ ಕಿನ್ನಿ ಒಡೆಪೊಡು ಪನ್ಪುನ ನಂಬಿಕೆ. ನೆತ್ತ ಪಿರವು ಹಿರಿಯಕ್ಲೆನ ದೂರಾದ ಆಲೋಚನೆನ್ ತೂವೊಲಿ. ಪೊಣ್ಣು ಪೆದ್ದ್ ಲಕ್ಕ್ ದ್ ಬತ್ತಿಬೊಕ್ಕ ಅಲೆಗಾವಡ್, ಅಲೆನ ಬಾಲೆಗಾವಡ್ ದಾದಾಂಡಲ ಎಲ್ಯ ಖರ್ಚಿಗ್ ಕೋರಿದ ಕಿನ್ನಿ ಮಾರೊಲಿ, ಕಿನ್ನಿ ಮಲ್ಲ ಆಂಡ ಮಲ್ಲ ಪೂಂಜನ್ಲಾ ಮಾರ್ದ್ ಅಗತ್ಯೊಗು ದಾಲ ಪೊಡಿ ಕಾಸ್ಗ್ ಆಪುಂಡು, ಮಾತೆಕ್ಲಾ ಆಲ್ ಕಂಡನಿ, ಮಾಮಿ,ತಮ್ಮಲೆನ ಎದುರು ಅಂಗೈ ಮೊರಂಕನೆ ಪತ್ತುಲೆಕ ಆಯೆರೆ ಬಲ್ಲಿ ಪನ್ಪುನಲಾ ಆದುಪ್ಪು.
     ಕೆಲವು ಮರ್ದ್ ಗ್ಲಾ ಕೋರಿನ್ ಗಲಸುವೆರ್, ಪೆದ್ದೊಲ್ದಿಗ್ ಕೋರ್ದಕಿನ್ನಿದ ಕಸಾಯ ಮನ್ತ್ ದ್ ಕೊರೊಂದಿತ್ತೆರ್ಗೆ. ಕರಿಯ ಕೋರಿ ಪಂಡ್ದ್ ಕಾರ್ ರ್ದ್ ಕೊಕಯಿ ಮುಟ್ಟಲ ಕಪ್ಪುದ ಕೋರಿನ್ ಕೆಲವು ಮರ್ದ್ ಗಲಸೊಂದಿತ್ತೆರ್ಗೆ. ಅತ್ತಾಂದೆ ಕೆಲವು ನಿಮುರ್ತಿಲೆಗ್, ಮಾಟ  ಮಂತ್ರದ ಪ್ರಯೋಗಗ್ಲಾ ಗಲಸೊಂದಿತ್ತೆರ್ಂದ್ ತೆರಿದ್ ಬರ್ಪುಂಡು. ಕೋರಿದ ಕಜಿಪಂತು ಮಾತೆರೆಗ್ಲಾ ಇಷ್ಟ. ಅಯಿಟ್ ಜೂವಗ್ ಬೋಡಾಯಿನ ತ್ರಾಣದ ಬಲ ಉಂಡುಂದು ಪನ್ಪೆರ್, ಅಂಚ ಪಂಡ್ದ್ ಎಚ್ಚ ತಿಂದ್ಂಡಲಾ ಎಡ್ಡೆ ಅತ್ತ್, ಉಷ್ಣಗುಣದ ಕೋರಿದ ಮಾಸ ಇತಿ ಮಿತಿಟ್ ತಿಂದ್ಂಡನೇ ಎಡ್ಡೆ. ಕೋರಿ ತೆತ್ತಿಲಾ ದಿಂಜ ಪ್ರೋಟೀನ್ ಇತ್ತಿನೆರ್ದಾವರ್ ಡಾಕ್ಟರ್ ನಕುಲುಲಾ ಕೆಲವು ಸೀಕ್ದಕ್ಲೆಗ್, ಜೋಕುಲೆಗ್ ತೆತ್ತಿ ತಿನೆರೆ ಪನ್ಪೆರ್.
    ಊರುದ ಪೆರಡೆ ಸಾದಾರ್ಣ ಪದಿನೈನ್, ಇರ್ವಮುಟ್ಟ ತೆತ್ತಿ ದೀಪುಂಡು, ಬೊಕ್ಕ ಪಾರಡ್ ಕುಲ್ಲುಂಡ ಇರ್ವತ್ತ ರಡ್ಡ್ ದಿನಟ್ ಕಿನ್ನಿ ಒಡೆಪುಂಡು. ಕಿನ್ನಿ ಪನಿ ಮಲ್ಲ ಆನಗ ಪೊಣ್ಣಾಂಡ ಲಾಕಿ, ಆಣಾಂಡ ತೆಲವು, ಬೊಕ ಒಂತೆ ಮಲ್ಲಾನಗ ಪೊಣ್ಣು ಕೋರಿನ್ ಪೆರಡೆ ಪಂಡ ಆಣ್ ಕೋರಿನ್ ಪೂಂಜೆಂದ್ ಪನ್ಪ. ಇತ್ತೆಮಾತಾ ಮಾಸ, ತೆತ್ತಿಗ್ಂದೆ ಕೋರಿತಾಂಕುನ ಬೊಕ ಮಾರುನ ಮಲ್ಲ ಮಟ್ಟ್ ದ ಬೇರನೇ ಸುರುವಾತ್ಂಡ್, ಕರಂಟ್ದ ಬೆಚ್ಚಡ್ ರಾತ್ರೆ ಪುಲ್ಯಾನಗ ತೆತ್ತಿಡ್ ಕಿನ್ನಿ ಆಪುನ, ಇರ್ವ ದಿನತುಲಯಿ ತೆತ್ತಿ ದೀಪುನ ಅತ್ಂಡ್, ಮಾಸಗ್ ತಯಾರಾಪುನಂಚ ಮನ್ಪುನ ಬೇತೆ ಬೇತೆ ಮರ್ದ್ ಮಾನನೆಲು ಸುರುವಾತ್ಂಡ್. ಎಂಚಿನನೇ ಆವಡ್ ಇತ್ತೆದ ಅಂಗಡಿದ ಕೋರಿದ ಕಜಿಪು ಇಲ್ಲಡ್ ತಾಂಕಿನ ಕೋರಿದ ಕಜಿಪುಗು ಬರಂದ್ ಪನ್ಪುನವು ಸತ್ಯ. ದುಂಬು ಮಣ್ಣಬಿಸಲೆಡ್ ಕಟ್ಟದ ಕೋರಿದ ಕಜಿಪಾಂಡ ರಡ್ಡ್ ಬಿತ್ತಿಲ್ ದ ಆ ಮೆಯಿಕ್ಲಾ ಕಮ್ಮೆನ ಬರೊಂದಿತ್ತ್ಂಡ್. ಕಟ್ಟದ ಕೋರಿದ ಪುಳಿಮುಂಜಿ ನೆನೆಪುನಗ ಬಾಯಿಡ್ ನೀರ್ ಬರ್ಪುಂಡು.
    ಊರ ಕೋರಿ ಮಾತ್ರ ಅತ್ತಂದೆ ಕಾಡ್ ಕೋರಿ, ಕೇಂಕನ್, ಕುಂಡಕೋರಿ, ಕೆಯಿ ಕೋರಿ ಪನ್ಪುನ ಕೋರಿಲುಲಾ ಇತ್ತ. ಅಯಿನ್ ತಾಂಕೊಂದು ಇಜ್ಯಂಡ್, ಅವು ಅಯಿತಾತಿಗೆ ಕಾಡ್, ಬಲ್ಲೆ, ಪುದೆಲ್, ಕೆಯಿತ ಕಂಡೊಡು ಮಾತಾ ಉಪ್ಪುನ, ಅಂಚಪಂಡ್ದ್ ಕೈಕ್ ತಿಕ್ಕ್ಂಡ ಅಯಿನ್ಲಾ ಕಜಿಪು ಮಂತ್ ತಿನ್ಪೆದೆರ್ ದುಂಬುದಕುಲು. ತುಲುವೆರೆ ಪರ್ಬ ಕೆಡ್ಡಸಗ್ ಕುಂಡದನ್ ಉರ್ಲು ದೀದ್ ಪತ್ತ್ ದ್ ಕಜಿಪು ಪನ್ಪೆದೆರ್ಗೆ. ಅಯಿಕೊಂಜಿ ಪಾತೆರನೇ ಉಂಡು “ಕೆಡ್ಡಸದಗ ಕುಂಡದಗ್ ಜರ ಬರ್ಪುಂಡು”.
    ನರಮಾನಿ ಬದ್ಕ್ ಡ್ ಕೋರಿನ್ ಎಂಚಮಾತ ಗಲಸೊನುವೆರ್ಂದ್ ಒಂತೆ ತರಿಯೊಂಡ ನನೊಂಜಿ ಪಕ್ಕಿ ಕಕ್ಕೆ. ಕಕ್ಕೆ ಪಂಡ ದೂರ ದೇರುನ ನರಮಾನಿ ಸೈತ್ಂಡ ಬೊಜ್ಜದಾನಿ ಮುಟ್ಟ ಲೆಪ್ಪುವೆ. ನಮ್ಮ ನಂಬಿಕೆದ ವಿಶೇಷತೆನೇ ಅವು. ಸೈತಿನಕುಲು ಕಕ್ಕೆ ಆಪೆರುಂದೋ, ಕಕ್ಕೆದ ರೂಪಡ್ ಬರ್ಪೆರ್ಂದೊ, ಸಾವುದಾನಿ ಬಲಸಿನ ನುಪ್ಪು ಕಕ್ಕೆ ಮುಟ್ಟಿಜಿಂಡ ಸಾವು ಮಂತಿನ ತೀರ್ನಕ್ಲೆಗ್ ಸಲ್ಮಂತ ಆತಿಜಿಂದ್ ನಂಬೊಲಿಕೆ. ಅಂಚಾದ್ ಆನಿ ಕಕ್ಕೆಗ್ ಇಸೇಸ ಮಾನಾಧಿಗೆ. ಕಕ್ಕೆ ನಮ ಇತ್ತಿನಲ್ಪನೇ ಮುಟ್ಟೊಡು ಮರಟ್ ಕಾರಿಕಟ್ದ್ ಬದುಕುಂಡು, ನಮ್ಮ ಸುತ್ತ ಪಸಂತ್ರೊನು ನಿರ್ಮಲ ಮನ್ಪೆರೆ ತನ್ಕುಲೆನ ಸೇವೆನ್ ಸಂದಾವೊಂದೇ ಉಪ್ಪುವ, ನಮ ಅಯಿನ್ ಬಾಕಿ ಪೊರ್ತು ದೂರ ದೇರೊಂದೇ ಉಪ್ಪುವ.
   ದುಂಬುದಕುಲು ಕೆಲವು ಸೀಕ್ ಗ್ ಕಕ್ಕೆದ ಕಜಿಪು ಮಂತ್ ಕೊರೊಂದಿತ್ತೆರ್ಗೆ, ಮೈಟ್ ಬೂರುನ ಕ್ರಾಣಿ ಅತ್ಂಡ ಕಿರಾಣಿ ಪನ್ಪಿ ಸೀಕ್ಗ್ ಕಕ್ಕೆದ ಮಾಸ ಮರ್ದ್ ಪಂಡ್ದ್ ದುಂಬುದಕುಲು ಪನೊಂದಿತ್ತೆರ್, ಕಾಂಡೆ ಬೇಗ ಲಕ್ಕ್ ದ್ ಕರೆಪುನ ಕಕ್ಕೆ ಇಲ್ಲ ಬಾಕಿಲ್ಡ್ ಕರೆಂಡ ಬಿನ್ನೆರ್ ಬರ್ಪೆರ್ ಪಂಡ್ದ್ ಪನ್ಪುನಲಾ ಉಂಡು. ಕಕ್ಕೆಡ್ಲಾ ರಡ್ಡ್ ನಮುನೆದ ಉಂಡು ಒಂಜಿ ಸಾದಾರ್ಣ ದಿಂಜ ತೂಯೆರೆ ತಿಕ್ಕುನ ಕಕ್ಕೆ ಆಂಡ ಬೊಕ್ಕೊಂಜಿ ಮಂಡೆ ಕಕ್ಕೆ ಪನ್ಪುನ ಒಂತೆ ಮಲ್ಲ ಜಾತಿದ, ಮಲ್ಲ ಮಂಡೆದ ಕಕ್ಕೆ, ಇತ್ತಿತ್ತೆ ಅವು ತೂಯೆರೆ ತಿಕ್ಕುನ ಕಮ್ಮಿ ಆತ್ಂಡ್.
    ನನೊಂಜಿ ಪಕ್ಕಿ ಗಿಳಿ, ಪಜ್ಜೆ ರಂಗ್ ದ ಕೆಂಪು ಕೊಕ್ಕುದ ಪೊರ್ಲುದ ಗಿಳಿ ಪಕ್ಕ ನರಮಾನಿನ ಕೈಕ್ ತಿಕ್ಕುಜಿ !! ಎಂಚಾಂಡಲ ಮಂತ್ದ್ ಪತ್ದ್ ಗೂಡುಡು ಪಾಡ್ದ್ ತಾಂಕ್ಂಡ ನಮ್ಮ ಬಾಷೆನ್ ಕಲ್ತೊಂದು ಪಾತೆರುನ ಚಾತುರ್ಪು ಗಿಳಿಕ್ ಇಸೇಸವಾದ್ ಉಂಡು. ಅಂಚಾದ್ ಕೆಲವೆರ್ ಗಿಳಿ ತಾಂಕುವೆರ್, ಗೂಡುಡು ಪಾಡ್ದ್ ತಾಂಕಿನ ಗಿಳಿನ್ ಪತೊಂದು ಗಿಳಿಲಚ್ಚನ ಪನೊಂದು ಬಂಜಿದಿಂಜಾವುನ ಕೆಲವೆರ್ ಇತ್ತೆರ್. ಇತ್ತೆ ಗಿಳಿಲ ಇಜ್ಜಿ, ಲಚ್ಚನಲಾ ಇಜ್ಜಿ.
      ನನೊಂಜಿ ಪಕ್ಕಿ ಪುದ, ಅತ್ಂಡ ಪಾರಿವಾಳ. ದೇಲ ಪುದಂದ್ಲಾ ಪನ್ಪೆರ್. ಎಚ್ಚಾದ್ ಮಾಡ್ದ ಬರಿಟ್, ದೇವೊಲ್ಯದ ಮಾಡ್ ಡ್ ಗೂಡು ಕಟ್ದ್ ಬದುಕುನ ಪುದನ್ಲಾ ಕೆಲವೆರ್ ತಾಂಕುವೆರ್, ಬೊಲ್ದು, ಕಡ್ಲೆ, ಕಪ್ಪು ರಂಗ್ ಡ್ಲಾ ಉಪ್ಪುನ ಪುದ ಅಯಿತ ಸಾಜಾ ರಂಗ್ ಬೊಣ್ಯ ನೀಲಿಯೇ ಪೊರ್ಲು. ಕೆಂಪು ಕಣ್ಣ್, ಕೆಂಪು ಕಾರ್ದ ಈ ಪಕ್ಕಿ ನಡತೊಂದು ಪೋಪುನ ತೂನಗ ಕೊಂಡಟ ಆಪುಂಡು. ಸಾದು ಗುಣತ ಈ ಪಕ್ಕಿನ್ಲಾ ಇಲ್ಲಡ್ ತಾಂಕುವೆರ್. ಆಂಡ ದುಂಬು ಹಿರಿಯಕುಲು ಇಲ್ಲಡ್ ತಾಂಕೆರೆ ಬುಡೊಂದಿಜ್ಯಂಡ್, ಅವು ಹುಂ ಹುಂ ಪನೊಂದಿತ್ತ್ಂಡ ಇಲ್ಲಡ್ ಸೀಕ್ ದಕುಲು ನರಕಿಲೆಕ ಕೇನುಂಡು, ಇಲ್ಲಡ್ ಸೀಕ್ ತಪ್ಪುಜಿ ಪಂಡ್ದ್ ಪನೊಂದಿತ್ತೆರ್.
  ಬತ್ತ್ ಅತ್ಂಡ ಕನ್ನಡಡ್ ಪನ್ಪುನ ಬಾತುಕೋಳಿ ಲಾ ಇಲ್ಲಡ್ ಪೊರ್ಲುಗು ತಾಂಕುವೆರ್, ಪುರಿ ಪಾಂತೆಲೆನ್ ತಿನ್ಪುನ ಉಂದು ತಿನಿಯೆರೆ ಪಾಡಿನಕ್ಲೆನ ಗುರ್ತ ದೀದ್ ಅಕ್ಲೆನ ಬೆರಿಯೆ ಪೋಪುನ ತೂನಗ ಕುಷಿ ಆಪುಂಡು. ತೆತ್ತಿಗ್, ಮಾಸಗಾದ್ ಬತ್ತ್ ತಾಂಕುನ ಬೇಲೆ, ಬೇರ ಮನ್ಪುನಕುಲುಲಾ ಉಲ್ಲೆರ್. ದುಂಬು ಪೂರಾ ಬತ್ತ್ ತಾಂಕುನಕುಲು ಪೈರ್ ದೇರೊಂದು ಬರ್ಪುನಿ, ಅವು ಕಂಡಡೆ ಪೋನಗ ಕಂಡಡ್ ಇತ್ತಿನ ನರ್ತೆಲೆನ್ ನಿಂಗುನ ತೂಪುನನೇ ಸೋಕು. ದುಂಬು ಬತ್ತ್ ದ ಪೈರ್ ಬತ್ದ್ ಪೋಯಿಬೊಕ್ಕ ಕಂಡಡ್ ತೆತ್ತಿನಾಡೆರೆ ಜೋಕುಲು ಕಂಡಗ್ ಜತ್ತೊಂದಿತ್ತ, ಬತ್ತ್ ಪೋಯಿನಲೆ ತೆತ್ತಿ ದೀವೊಂದು ಪೋಪುನಿ !! ಕೋರಿದಲೆಕ ದೆಂಕ್ ದ್ ಕೂಡುದ ಉಲಾಯಿ ತೆತ್ತಿ ದೀಪುನ ಗುಣ ಅಯಿಕಿಜ್ಜಿ.
   ಅಪ್ರೂಪೊಡು ಕೆಲವೆರ್ ದುಂಬು ನವಿಲ್ ನ್ಲಾ ತಾಂಕೊಂದು ಇತ್ತೆರ್ಗೆ, ಆಂಡ ಅವು ನಮ್ಮ ರಾಷ್ಟ್ರ ಪಕ್ಕೀಂದ್ ತಾನಮಾನ ಇತ್ತಿನೆಟ್ ಅಯಿನ್ ತಾಂಕುನೆಕ್ ಆವಡ್ ಕೆರ್ಪುನೆ ಆವಡ್ ಕಾನೂನು ರೀತಿದ ತಲ್ಪು ಇತ್ತಿನೆಟ್ ಅಯಿನ್ ತಾಂಕುನ ಕಮ್ಮಿ ಆತ್ಂಡ್. ಇತ್ತೆ ಕೆಲವೆರ್ ಅಂಗಡಿಡ್ ತಿಕ್ಕುನ ಕಿನ್ಯ ಪಕ್ಕಿಲೆನ್ ಕನತ್ ದ್ ಪೊರ್ಲುಗು ತಾಂಕುವೆರ್. ಲವ್ ಬರ್ಡ್ಸ್ ಪನ್ಪುನ ರಂಗ್ ರಂಗ್ ದ ಪಕ್ಕಿಲು ತಿಕ್ಕುವ. ಎಂಚಿನನೇ ಆವಡ್, ಪಕ್ಕಿಲೆನ್ ಗೂಡುಡು ಪಾಡ್ದ್ ತಾಂಕುನ ಎಡ್ಡೆ ಅತ್ತ್, ಬಾನೊಡು ಇನೆ ದಾಂತೆ ರಾಪುನ ಪಕ್ಕಿನ್ ಗೂಡುಡು ಪಾಡ್ದ್ ಬಂಧನೊದ ಬದ್ಕ್ ಅಯಿಕ್ ಕೊರ್ದು, ಅಯಿನ್ ತೂದು ಕುಷಿ ಪಡೆಪುನ ಎಡ್ಡೇಂದ್ ಪನಿಯೆರೆ ಆಪುಜಿ. ದುಂಬು ಮುಳಿತ ಇಲ್ಲ್ ಉಪ್ಪುನಗ ಗುರ್ಬಿ ಪಕ್ಕಿ ಇಲ್ಲ ಮಾಡುದಡಿಟ್ ಅತ್ತ್ಂಡ ಮಾಡ್ ದ ಬೆದುರುದ ಒಟ್ಟೆಡ್ ಗೂಡು ಕಟ್ದ್ ಬದ್ಕೊಂಡಿತ್ತ್ಂಡ್. ಎಲೆಲ್ಯ ಗುರ್ಬಿ ಅಯಿತ ರಡ್ಡ್ ಕಿನ್ನಿಲೆನ ಒಟ್ಟಿಗೆ ಕೀಯಂ ಕೀಯಂ ಪನೊಂದು ಇತ್ಂಡ ಇಲ್ಲಡಿತ್ತಿನಕ್ಲೆಗ್ ಮನಸ್ಗ್ ಉಲ್ಲಾಸ. ಕೆಲವು ಸರ್ತಿ ಇಲ್ಲದ ಉಲಾಯಿ ಪಟತ ಪಿರವು, ಬೋದಿಗೆದ ಕಂಬದ ಮಿತ್ತ್ ಲಾ ಗುರ್ಬಿ ಗೂಡು ಕಟ್ಟೊಂದು ಇತ್ತ್ಂಡ್.

ಕಾಲ ಪೋಯಿಲೆಕಾನೆ ನರಮಾನಿನ ಪೋಸ ಒರುತ ಬಧ್ಕ್ ಪಕ್ಕಿಲೆನ್ ನಮರ್ದ್ ದೂರ ಮಂತ್ಂಡ್. ಮೊಬೈಲ್ ಬತ್ತಿಬೊಕ್ಕ ಮಲ್ಲ ಮಲ್ಲ ಟವರ್ ಲು ಆದ್, ಅಯಿತ  ಸೆರೆ ತ ಪೆಟ್ಟ್ ಗ್ ಬೂರ್ದು ಏತೊ ಪಕ್ಕಿಲೆನ ಸಂತಾನನೇ ಅಲಿದ್ ಪೋಂಡು, ಮರಮಟ್ಟ್ ದ ನಾಶಡ್ ಪಕ್ಕಿಲೆಗ್ ಕಾರಿಕಟ್ಟೆರೆ ಜಾಗೆ ಇಜ್ಯಂದೆ ಅಯಿಕುಲು ಮಾತಾ ನರಮಾನಿ ನಡುರ್ದು ದೂರ ದೂರ ರಾದ್ ಪೋಯ, ಮಲ್ಲ ಮಲ್ಲ ತಾರಿಲೆನ್ ಕಡ್ತ್ ದ್ ಅಯಿತ ಮಡಲ್ಡ್ ನೇಲೋಂದಿತ್ತಿನ ಪಕ್ಕಿದ ಗೂಡು ಇತ್ತೆದ ಜೋಕುಲೆಗ್ ತೂಯೆರೆನೇ ಇಜ್ಯಂದೆ ಆಂಡ್. ಬೆನ್ನಿ ಬಧ್ಕ್ ಮೂಲೆ ಸೇರ್ಂಡ್, ಕಂಡದಪ್ಪುನಗ ಪುರಿಪಾಂತೆ ಪೆಜ್ಜೊಂದಿತ್ತಿನ ಕೊರೊಂಗು, ಕಾನಕುರ್ಲಿ, ಟಿಟ್ಟಿರಿ ಪಕ್ಕಿ ಇತ್ತೆ ತೂಯೆರೆನೇ ಇಜ್ಯಂದೆ ಆಂಡ್. ದುಂಬೊರಿ ದನಿ ಬೇಲೆದಾಯಡ್ “ಓಲ ಆ ಕೊರೊಂಗು ಕುಲ್ದಿನ ಕಂಡ ದಪ್ಪು ಪಂಡೆಗೆ, ಬೇಲೆದಾಯೆ ದಪ್ಪುನಗ ಕೊರೊಂಗು ಆಪೆದ ಕಂಡಡ್ ರಾದ್ ಕುಲ್ಲುಂಡುಗೆ, ಬೇಲೆದಾಯೆ ಆ ಕಂಡನ್ಲಾ ದತ್ತೆಗೆ, ಅಪಗ ಅವು ಕುಡೊಂಜೆಟ್ ಕುಲ್ಲುಂಡುಗೆ…,ಇಂಚೆನೆ ಬೇಲೆದಾಯೆ ಬಯ್ಯನಗ ಬೈಲ್ ಪೂರಾ ದತ್ತ್‌ದೆಗೆ ಇಂಚ ಬೆನ್ನಿದಕ್ಲೆಗ್ ಕೊರೊಂಗುದ ಪಾಸಾಡಿದ ಕತೆವುಂಡು. ಅಂಚೆನೆ ಟಿಟ್ಟಿರಿ ಪಕ್ಕಿ ಟಿಟ್ಟೀಟಿ…ಟಿಟ್ಟಿಟಿ ಟಿಟ್ಟೀಟೀ…ಪಂಡ್ದ್ ಬುಲಿಪುನಗ ಜೋಕುಲುಲೆಡ್ ಹಿರಿಯಕುಲು ಪನೊಂದಿತ್ತೆರ್ ಟಿಟ್ಟಿರಿ ಪಕ್ಕಿ ಕಂಡೊಡು ಒಡ್ಡುದ ಇಡೆಟ್ ತೆತ್ತಿ ದೀಪುಂಡು ಕೈಕಂಜಿ ಮೇಪೆರೆ ಪೋಯಿನ ಜೋಕುಲು ಅಯಿನ್ ದರ್ತ್ ಪಾಡ್ಯೆರ್ಗೆ ಅಯಿಕ್ ಅವು ಜೋಕ್ಲೆಗ್ ನೆರ್ಪುನಿ, “ಪಲ್ಲೊಡು ರಡ್ಡ್ ತೆತ್ತೀತೆ ಕೈಕಂಜಿ ಮೇಪುನ ಜೋಕ್ಲೆನ ಸಾವು ಕರಿತ್ಂಡ್” ಪನ್ಪುನಿ ಅವೂಂದು ಪನ್ಪೆದೆರ್, ಇಂಚ ಜೋಕುಲೆಡ ಪಂಡ್ಂಡ ಬೊಕ್ಕ ಅಕುಲು ಕಂಡಡ್ ಪಕ್ಕಿದ ತೆತ್ತಿನ್ ಹಾಳ್ ಮನ್ಪುಜೆರ್ ಪನ್ಪುನ ದೈರ ಹಿರಿಯಕ್ಲೆಗಿತ್ತ್ಂಡ್, ಇತ್ತೆ ಕಂಡ ಪಡಿಲಾಂಡ್, ಇಲ್ಲಡ್ ಅರಿ ಬಾರ್ ಇಜ್ಯಂದಾಯಿಲೆಕಾನೆ ಕೋರಿ ತಾಂಕುನಲಾ ಉಂತೊಂದು ಬತ್ತ್ಂಡ್, ಜನಮಾನಿ ಎಚ್ಚ ಆಯಿಲೆಕಾನೆ ಕೂಡು ಕುಟುಂಬ ಪೊಲಿದ್ ಕಿನ್ಯ ಕುಟುಮೊಲಾಯ. ಎಕ್ಕರೆ ಎಕ್ಕರೆ ಜಾಗೆ ಇತ್ತಿನ ಕುಟುಮ ಪಾಲ್ ಪಂತೆ ಆದ್ ಸೆನ್ಸ್ ಗ್ ಎತ್ತ್ಂಡ್ !! ನನ ಕೋರಿ ಇಲ್ಲಡ್ ತಾಂಕುನಾಂಡಲಾ ಎಂಚಾ…? “ನಿನ್ನ ಕೋರಿ ಎನ್ನ ಬಿತ್ಲ್ ಗ್ ಬತ್ತ್ಂಡ್, ನಾಯಿ ಬತ್ಂಡ್, ಪುಚ್ಚೆ ಬತ್ತ್ಂಡ್” ಪನೊಂದು ಲಡಯಿ ಪೆಟ್ಟ್ ಸುರುವಾಂಡ್, ನರಮಾನಿನ ಒಟ್ಟಿಗೆ ಬದ್ಕೊಂದು, ತನ್ಕುಲೆನನೇ ಆಯಿನ ಉಪಕಾರೊನು ಮಂತೊಂದಿತ್ತಿನ ಪಕ್ಕಿ, ಪಾರ್ಣೆಲು ಸಂಕಲೆ ಗೂಡುದುಲಯಿ ಬಂದಿಲು ಆಯ. ಒಂಜಾತ್ ಅಲಿದೇ ಪೋಯ ಪಂಡ ತಪ್ಪಾವಂದ್.

ಪೊಸ ದೇಕಿಗ್ ಮರ್ಲಾಯಿ ನರಮಾನಿ ಪಸಂತ್ರೊಗು ಅನ್ಯಾಯ ಮಂತೊಂದೇ ಉಲ್ಲೆರ್. ಅಯಿಕ್ ಗುಮನ ಕೊರ್ಪುನಾತ್ ತಾಮೆಸಲಾ ಇಜ್ಯಂದಿನಾತ್ ಬೀಸ ಬಲಿತೊಂದುಂಡು ಲೋಕ. ಮರ್ದ್ ಪಾಡ್ದಿನ ಮಾಸ, ತೆನಸ್ ತಿಂದೊಂದು ಸೀಕ್ ದ ಗೂಡಾವೊಂದುಂಡು ನರಮಾನಿ ಜೂವ. ಪೊಸ ಸೋಕು ದೇಕಿಗ್ ಮರ್ಲಾದ್ ನಮನ್ ನಮ ಕಲೆಯೊನೆರೆ ದುಂಬು ಎಚ್ಚೆರ್ಗೆ ಮಂತೊನುನ ಅಗತ್ಯೊ ಉಂಡು. ಈ ಪಸಂತ್ರೊನು ಕಾತೊಂದು ನಮ ಒರಿಕಾ, ನಮ್ಮ ಜೋಕುಲೆನ್ ಒರಿಪುಗ ಒಟ್ಟಿಗೆ ಪಕ್ಕಿ ಪಾರ್ಣೆಲೆನ್ ಬದ್ಕೆರೆ ಬುಡ್ಕ.