Last updated on March 26th, 2026 at 10:00 am
ಸುಳ್ಯ, ಮಾ. 26: ಮೊಗರ್ಪಣೆಡ್ ಕೋಡೆ ರಾತ್ರೆ ಕಂಟೈನರ್ ಲಾರಿ ಒಂಜಿ ಬೂರ್ದಿತ್ತ್ದ್, ಆ ಜಾಗೆಡ್ ರೋಡ್ಡೆ ಡೀಸೆಲ್ ಲೀಕ್ ಆದ್ ಗುಚ್ಚಿನೆರ್ದಾವರ ಟೂವೀಲರ್ ಗಾಡಿ ಒಂಜಿ ಸ್ಕಿಡ್ ಆದ್ ಬೂರ್ದಿತ್ತ್ದ್ ಗಾತಿದ ಗಡಿಕುಲಾತಿನ ಗಾಡಿ ಬುಡೊಂದಿತ್ತಿನಾರೆನ್ ಕುಡ್ಲದ ಆಸ್ಪತ್ರೆಗ್ ದಾಕಲ್ತ್ದಿನ ನಡಕೆ ಕೋಡೆ ರಾತ್ರೆ ಸುಮಾರ್ 12:45ತ ಅಂದಾಜಿಗ್ ನಡತ್ದ್ಂಡ್.
ಬೂರ್ದು ಗಡಿಕುಲಾತಿನಾರೆನ್ ಜಯನಗರ ಮಿಲಿಟರಿ ಕ್ವಾರ್ಟರ್ಸ್ ನಿವಾಸಿ ಶಶಿ ಪನ್ದ್ ಗುರ್ತ ಪತ್ತ್ದೆರ್. ಸುಳ್ಯಡ್ ಕಡೀರ ಮರ್ದ್ ಮಲ್ತ್ದ್ ಬೊಕ್ಕ ಆರೆನ್ ಕುಡ್ಲಗ್ ಲೆತೊಂದು ಪೋತೆರ್.
ಪರಗೇಟ್ ಮೊಗರ್ಪಣೆ ಸಂಕೊದ ಕೈತಲ್ ಕೋಡೆ ರಾತ್ರೆ ಕಂಟೈನರ್ ಲಾರಿ ಒಂಜಿ ಡ್ರೈವರ್ನ ಅಂಕೆ ತತ್ತ್ದ್ ಸಾದಿಗ್ ಕಬ್ಬೆ ಬೂರ್ದಿತ್ತ್ದ್, ನಡಕೆಡ್ ಡ್ರೈವರ್ಗ್ಲಾ ಗಡಿಕುಲಾತ. ಆರೆನ್ ಸುಳ್ಯದ ಶಿವ ಆಂಬ್ಯುಲೆನ್ಸ್ಗ್ ಸರ್ಕಾರಿ ಆಸ್ಪತ್ರೆಗ್ ದಾಕಲ್ತ್ದೆರ್. ಕಂಟೈನರ್ ಲಾರಿ ಮಡಿಕೇರಿರ್ದೊ ಕುಡ್ಲದಂಚಿ ಪೋವೊಂದಿತ್ತ್ಂಡ್ ಪನ್ದ್ ತೆರಿದ್ ಬೈದ್ಂಡ್.
ಇಂಚ ಡೀಸೆಲ್ ಗುಚ್ಚಿದಿನ ಜಾಗೆಡ್ ರಾತ್ರೆ 3 ಗಂಟೆ ಮುಟ್ಟ ಸುಳ್ಯ ಆಂಬ್ಯುಲೆನ್ಸ್ ಚಾಲಕ ಮಾಲಕ ಸಂಘೊದ ಪದುಕೆರಾಯಿನ ಶಿವಪ್ರಸಾದ್, ರಫೀಕ್ ಬಾಳೆಮಕ್ಕಿ, ಸಮೀರ್ ಕಾಣಿಯೂರ್, ಸಿದ್ದೀಕ್, ಅಪ್ಪಿ ಮೊಕುಲು ಮಾತಾ ಕೂಡೊಂದು ಈ ಸಾದಿಯೆ ಗಾಡಿಡೆ ಪೋಪುನಕಲೆಗ್ ಸುರಕ್ಷಿತವಾದ್ ಪೋಯೆರ ಸಕಾಯ ಮಲ್ತ್ದೆರ್.