Last updated on March 7th, 2026 at 03:12 pm
ಬ್ರೂಕ್ಲಿನ್, ಮಾ. 07: ಅಮೆರಿಕದ ಅಧ್ಯಕ್ಷೆ ಡೊನಾಲ್ಡ್ ಟ್ರಂಪ್ ಸೇರ್ದ್ ಅಮೆರಿಕದ ಪ್ರಮುಖ ನಾಯಕೆರೆನ್ ಕೆರ್ಯೆರೆ ಪ್ಲಾನ್ ಮಲ್ತಿನ ಪ್ರಕರಣೊಡು, ಪಾಕಿಸ್ತಾನಿ ಪ್ರಜೆ ಆಸಿಫ್ ರಾಜಾ ಮರ್ಚೆಂಟ್ (47) ದೋಷಿ ಪನ್ದ್ ಬ್ರೂಕ್ಲಿನ್ ಫೆಡರಲ್ ನ್ಯಾಯಂತಡೆ ತೀರ್ಪು ಕೊರ್ತುಂಡು. 2020ಡ್ ಅಮೆರಿಕ ಮಲ್ತಿನ ಡ್ರೋನ್ ದಾಳಿಡ್ ಸೈತಿನ ಇರಾನ್ದ ಕಮಾಂಡರ್ ಖಾಸೆಮ್ ಸೊಲೈಮಾನಿನ ಸಾವುಗು ಪಗೆ ಸಂದಾವುನ ಉದ್ದೇಶೊಡು ಇಂಚ ಮಲ್ತ್ದೆರ್ ಪನ್ದ್ ಪ್ರಾಸಿಕ್ಯೂಟರ್ನಕುಲು ತೆರಿಪಾದೆರ್.
ವಿಚಾರಣೆದ ಪೊರ್ತುಡು ಮರ್ಚೆಂಟ್, ಟೆಹ್ರಾನ್ಡ್ ಇಪ್ಪುನ ತನ್ನ ಇಲ್ಲದಕ್ಲೆನ್ ಇರಾನ್ದ ಕ್ರಾಂತಿಕಾರಿ ಪಡೆಕ್ಲೆರ್ದ್ ಬದ್ಕಾಯೆರ ಅನಿವಾರ್ಯವಾದ್ ಈ ಪ್ಲಾನ್ಡ್ ಪಾಲ್ಪಡೆತೆ ಪನ್ದ್ ಒತ್ತೊಂದೆ. ಆತೇ ಅತ್ತಂದೆ ಸ್ಫೋಟಕ ಸುದ್ದಿ ಒಂಜೆನ್ಲಾ ಪಟ್ಟೊಂದೆ. ಆಯಗ್ ಡೈರೆಕ್ಟ್ ಏರೆನ್ಲಾ ಕೆರ್ಪುನ ಆದೇಶ ಇತ್ತ್ಜಿಂಡಲಾ, ಇರಾನ್ದ ಸಂಪರ್ಕೊಲು ಮೂವೆರ್ ಪ್ರಮುಖೆರ್ ಪನ್ಡ ಡೊನಾಲ್ಡ್ ಟ್ರಂಪ್, ಜೋ ಬಿಡೆನ್ ಬೊಕ್ಕ ನಿಕ್ಕಿ ಹ್ಯಾಲಿ ನ್ ಕೆರ್ಯೆರ ಸೂಚನೆ ಕೊರ್ದಿತ್ತೆರ್ ಪನ್ದ್ ಆಯೆ ತೆರಿಪಾದೆ. ಈ ಪ್ಲಾನ್ ಇರಾನ್ ಆಡಳಿತೊದ ತಂತ್ರಗಾರಿಕೆದ ಭಾಗ ಪನ್ದ್ ಅಮೆರಿಕದ ಅಧಿಕಾರಿಲು ಪನೊಂದುಲ್ಲೆರ್.
ಆಸಿಫ್ ರಾಜಾ ಮರ್ಚೆಂಟ್ ಏರ್?
ಆಸಿಫ್ ರಾಜಾ ಮರ್ಚೆಂಟ್ ಪಾಕಿಸ್ತಾನೊದ ಉದ್ಯಮಿ ಆದಿತ್ತ್ದ್, ಇರಾನ್ದೊಟ್ಟುಗು ಬಾರೀ ಮುಟ್ಟ ಇತ್ತೆ ಪನ್ದ್ ಅಮೆರಿಕದ ತನಿಖಾ ಸಂಸ್ಥೆಲು ಬೊಕ್ಕ ಪ್ರಾಸಿಕ್ಯೂಟರ್ನಕುಲು ತೆರಿಪಾದೆರ್. 2024ತ ಜುಲೈ 12ತಾನಿ ಅಮೆರಿಕರ್ದ್ ಪದ್ರಾಡಾಯೆರ ತೂನಗ ಆಯನ್ ಅಮೆರಿಕದ ಅಧಿಕಾರಿಲು ಪತ್ತ್ದಿತ್ತೆರ್. ಬೊಕ್ಕ ಬ್ರೂಕ್ಲಿನ್ದ ಫೆಡರಲ್ ನ್ಯಾಯಂತಡೆಡ್ ನಡತಿನ ವಿಚಾರಣೆಡ್ ಅಂತರರಾಷ್ಟ್ರೀಯ ಭಯೋತ್ಪಾದನೆ ಬೊಕ್ಕ ಕಾಸ್ಗ್ ಬೋಡಾದ್ ಕೆರ್ಪುನ ಪ್ಲಾನ್ ಮಲ್ತಿನ ಆರೋಪೊಲೆನ ಮಿತ್ತ್ ಆಯೆ ದೋಷಿ ಪನ್ದ್ ಸಾಬೀತಾತ್ಂಡ್.