Last updated on March 31st, 2026 at 08:40 am
ಬೋಲ್ತೇರ್, ಮಾರ್ಚ್ 31: ಕೊಕ್ಕಡ ಗ್ರಾಮೊದ ಸೀಮೆಡ್ ಕಾಡಾನೆಲೆನ ಉಪದ್ರ ದಿನೊರ್ದು ದಿನಕ್ ಜಾರಾವೊಂದಿತ್ತ್ದ್, ಗ್ರಾಮಸ್ಥೆರ್ ಬಾರೀ ಮಂಡೆಬೆಚ್ಚಡ್ ದಿನ ಕರಿಪುಲೆಕ ಆತ್ಂಡ್. ಕೃಷಿ ತೋಟೊಲೆಗ್ ಪೊಗ್ಗುದ್ ಹಾನಿ ಮಲ್ತೊಂದಿತ್ತಿನ ಆನೆಲು, ಇತ್ತೆ ಜನೊಕುಲು ಇತ್ತಿನ ಜಾಗೆಡ್ ಗಾಡಿಲೆನ ಮಿತ್ತ್ಲಾ ದಾಳಿ ಮಲ್ಪರೆ ಪತ್ತ್ದಿನ ಪೋಡಿಗೆಗ್ ನೆವನ ಆತ್ಂಡ್.
ಮಾರ್ಚ್ 28 ದಾನಿ ರಾತ್ರೆ ತೆಂಕಬೈಲ್ ಜಾಗೆಡೆ ತಿರ್ಗೊಂದಿತ್ತಿನ ಒಂಜಿ ಕಾಡಾನೆ, ಯಶವಂತೆ ಪನ್ಪಿನಾರೆನ ತೋಟಡ್ ಬೇಲೆ ಮಲ್ತೊಂದಿತ್ತಿನ ಕಾರ್ಮಿಕೆ ಒರಿಯನ ಮಾರುತಿ ಕಾರ್ದ ಮಿತ್ತ್ ದಾಳಿ ಮಲ್ತ್ದ್ ಞಕ್ಕೆ ಮಲ್ತ್ದ್ಂಡ್. ಅವೆತ ಬೆರಿಟೇ ಮಾರ್ಚ್ 29 ದಾನಿ ಮುಂಡೂರುಪಳಿಕೆ ಕೈತಲ್ದ ಸಂಕುಬೈಲ್ಡ್ ಸೇಸಪ್ಪ ಗೌಡ್ರೆನ ಸ್ಕೂಟರ್ನ್ ಪೊಡಿ ಮಲ್ದಿನ ನಡಕೆ ವರದಿ ಆತ್ಂಡ್. ಕಾಲಿ ಗಾಡಿಲು ಮಾತ್ರ ಅತ್ತಂದೆ, ಕಂಗ್, ತಾರೆ, ಬಾರೆ ಪೊಡಿ ಮಲ್ತೊಂದು ಬೊಕ್ಕ ಕಂಡೊಗು ಜತ್ತ್ದ್ ಕೆಯಿ ನ್ ಆನೆಲು ನಾಶ ಮಲ್ತೊಂದುಲ್ಲ. ಬೆನ್ನಿದಕುಲು ವರ್ಸ ಇಡೀ ಬೆಗರ್ ಜಪುಡಾದ್ ಬುಲೆತಿನ ಬುಲೆ ಒಂಜೇ ರಾತ್ರೆಡ್ ಮಣ್ಣಪಾಲಾವೊಂದಿತ್ತ್ದ್, ಕೃಷಿಕೆರ್ ಆರ್ಥಿಕ ಸಂಕಷ್ಟೊಗು ಬೂರೊಂದುಲ್ಲೆರ್.
ಜಾಗೆಗ್ ಉಬಾರ್ ವಲಯ ಅರಣ್ಯಾಧಿಕಾರಿ ರಾಘವೇಂದ್ರ ಎಚ್.ಪಿ ಬೊಕ್ಕ ಸಿಬ್ಬಂದಿಲು ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಬೊಕ್ಕ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಸುಬ್ಬಯ್ಯ ನಾಯಕ್ ಮೇರ್ ಹಾನಿ ಆತಿನ ಜಾಗೆಲೆಗ್ ಪೋದು ಸಂತ್ರಸ್ತೆರೆಡ ಪಾತೆರ್ದೆರ್. ಸರ್ಕಾರೊರ್ದು ತಿಕ್ಕುನ ಪರಿಹಾರ ಕ್ರಮೊಕ್ಲೆನ ಬಗೆಟ್ ಒಲವು ಕೊರ್ದು, ಬೇಗೊಡೆ ಪಿರಿಕಟ್ಟ್ ಮಲ್ಪುನ ಪಾತೆರ ಕೊರ್ತೆರ್. ಆನೆಲು ಪೋಪುನ ಬರ್ಪುನೆನ್ ತೂಯೆರ ಅಂಚೆನೇ ಐಕ್ಲೆನ್ ಕುಡ ಕಾಡ್ಗ್ ಬೆರಿಪತ್ತೆರೆ ಎಲಿಫೆಂಟ್ ಟಾಸ್ಕ್ ಫೋರ್ಸ್ ಉಂಡು ಮಲ್ತ್ದೆರ್. ಅಧಿಕಾರಿಲು ಸ್ವತಃ ರಾತ್ರೆದ ಪೊರ್ತುಡು ಈ ಕೂಟೊದ ಒಟ್ಟುಗು ಇತ್ತ್ದ್ ಕಾರ್ಯಾಚರಣೆಗ್ ಮಾರ್ಗದರ್ಶನ ಕೊರೊಂದುಲ್ಲೆರ್.