Last updated on March 10th, 2026 at 12:58 pm
ರಾಮಕುಂಜ : ಗೂವೆಲ್ ತೋಡುನ ಪೊರ್ತುಡು ತೋಟೆ ಗಲಸ್ದಿನೆರ್ದಾವರ ಕೈತಲ್ದ ಇಲ್ಲ್ಲೆಗ್ ಹಾನಿ ಆತಿನ ನಡಕೆ ಕಡಬ ತಾಲೂಕ್ದ ರಾಮಕುಂಜ ಗ್ರಾಮೊದ ಕಂಪ ಪನ್ಪಿನಲ್ಪ ಮಾ.8 ದಾನಿ ನಡತ್ದ್ಂಡ್. ಈ ನಡುಟು ಪುಡವಂದೆ ಗೂವೆಲ್ದ ಉಲಯಿ ಒರಿದಿನ ಮರ್ದ್ನ್ ಬಾಂಬ್ ನಿಷ್ಕ್ರಿಯದಳೊದ ಸಿಬ್ಬಂದಿಲು ಬತ್ತ್ದ್ ದೆಪ್ಪುನ ಕಾರ್ಯಾಚರಣೆನ್ ಇನಿ, ಮಾ. 10 ದ ಕಾಂಡೆ ಸುರು ಮಲ್ತ್ದೆರ್.
ರಾಮಕುಂಜ ಗ್ರಾಮೊದ ಕಂಪ ಪನ್ಪಿನಲ್ಪ ಮೈಸೂರ್ದ ಸೋಮಶೇಖರೆ ಪನ್ಪಿನಾರ್ ಆರೆನ ಸಂಬಂಧಿಕೆರೆರ್ದ್ 23 ಸೆಂಟ್ಸ್ ಜಾಗೆ ಗೆತೊಂದಿತ್ತ್ದ್ ಐಟ್ ಕಂಗ್ಲ್ ಉಲ್ಲ. ಈ ಜಾಗೆಡ್ ನೀರ್ಗ್ ಬೋಡಾದ್ ಗೂವೆಲ್ ತೋಡ್ದಿತ್ತ್ದ್ ಸುಮಾರ್ 15 ಫೀಟ್ ಗುಂಡಿಡ್ ಕಲ್ಲ್ ತಿಕ್ಕಿನೆರ್ದಾವರ ಸ್ಪೋಟಕ ಗಲಸ್ದ್ ಕಲ್ಲ್ ಪುಡಪೆರೆ ಪಿದಡ್ದೆರ್. ಆ ಪ್ರಕಾರ ಮಾ. 8 ದಾನಿ ಕಲ್ಲ್ ಪುಡತಿತ್ತ್ದ್ ಅವೆರ್ದಾವರ ಕೈತಲ್ದ ವಾಮನ ಮೂಲ್ಯ, ಕೆ.ಟಿ. ಮೋಹನ ಪನ್ಪಿನಕ್ಲೆನ ಇಲ್ಲದ ಮದೆಲ್ ಪುಡದ್ಂಡ್. ಈ ಬಗೆಟ್ ಅಕುಲು ಕಡಬ ಪೊಲೀಸೆರೇಡ ಒಯಿಲ್ ಬರೆಪಾದೆರ್. ಆನಿಯೇ ಜಾಗೆಗ್ ಬತ್ತಿನ ಕಡಬ ಸ್ಟೇಷನ್ ಸಬ್ ಇನ್ಸಪೆಕ್ಟರ್ ಜಂಬೂರಾಜ್ ಮಹಾಜನ್ ಪ್ರಕರಣ ದಾಕಲ್ತೊಂದೆರ್.
ಈ ನಡುಟು ಗೂವೆಲ್ದ ಉಲಯಿ ಪುಡವಂದೆ ಒರಿದಿನ ಸ್ಫೋಟಕ ಮರ್ದ್ನ್ ಪಿದಯಿ ದೆಪ್ಪೆರ ಮಾ. 10 ತಾನಿ ಕಾಂಡೆ ಬಾಂಬ್ ನಿಷ್ಕ್ರಿಯ ದಳೊತ ಸಿಬ್ಬಂದಿಲು ಬತ್ತ್ದ್ ಕಾರ್ಯಾಚರಣೆ ಮಲ್ತ್ದೆರ್. ಅಗ್ನಿಶಾಮಕ ದಳೊದ ಸಿಬ್ಬಂದಿಲು ಕಾರ್ಯಾಚರಣೆಗ್ ಕೈಗೋಡ್ಯಾದೆರ್. ಕಡಬ ಎಸ್ ಐ ಜಂಬೂರಾಜ್, ಎಫ್ ಎಸ್ ಎಲ್ ಟೀಮ್ದಕುಲು ಒಟ್ಟುಗು ಇತ್ತೆರ್.