Last updated on March 10th, 2026 at 11:17 am
ಬಂಟ್ವಾಳ, ಮಾ. 10: ಸುಮಾರ್ ಐದನ್ ತಿಂಗೊಲುಗು ದುಂಬು ಬಸ್ಡ್ ಬ್ಯಾಗ್ರ್ದ್ ಲಕ್ಷಗಟ್ಲೆ ರೂಪಾಯಿ ಮೌಲ್ಯೊದ ಬಂಗಾರ್ ಕನ್ಡ್ದಿತ್ತಿನ ಪ್ರಕರಣೊನು ಮುಗಿಪುನೆಟ್ ಬಂಟ್ವಾಳ ನಗರ ಪೊಲೀಸೆರ್ ಯಶಸ್ವಿ ಆತೆರ್.
ಪ್ರಕರಣೊಗು ಸಂಬಂಧಿತ್ದ್ ಮಧ್ಯಪ್ರದೇಶ ಮೂಲೊದ ಆರೋಪಿನ್ ಕೈದ್ ಮಲ್ತ್ದ್, ಪದ್ದೈ ಬಂಗಾರ್ನ್ ಉಲಕೈ ಮಲ್ತೊಂದೆರ್.
ನಡಕೆದ ಒಲವು
2025ತ ನವೆಂಬರ್ 19ದಾನಿ ಬೆರ್ಮಾವರ ಮೂಲೊದ ದಂಪತಿಲು ದುರ್ಗಾಂಬಾ ಬಸ್ಸ್ಡ್ ಪೋವೊಂದಿತ್ತೆರ್. ಬಂಟ್ವಾಳ ತಾಲೂಕ್ರ ಕಲ್ಲಡ್ಕದ ಕೈತಲ್ ಕುದ್ರೆಬೊಟ್ಟು ಪನ್ಪಿನಲ್ಪ ‘ಸಮುದ್ರ ಹೋಟೆಲ್’ದ ಕೈತಲ್ ಬಸ್ ಉಂತುದಿತ್ತಿನ ಪೊರ್ತುಡು, ದಂಪತಿಲೆನ ಬ್ಯಾಗ್ಡ್ ಇತ್ತಿನ 180 ಗ್ರಾಂ ತೂಕೊದ (ಅಂದಾಜಿ 20 ಲಕ್ಷ ರೂ. ಮೌಲ್ಯೊದ) ಪದ್ದೈ ಬಂಗಾರ್ ಕನ್ಡ್ದ್ ಪೋದಿತ್ತ್ಂಡ್. ಈ ಬಗೆಟ್ ಬಂಟ್ವಾಳ ನಗರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್.
ಆರೋಪಿ ಕೈದ್
ಪೊಲೀಸೆರ್ ಜಡ್ತೆ ಮಲ್ತ್ದ್, ಕಲ್ವೆ ಮಧ್ಯಪ್ರದೇಶ ನಿವಾಸಿ ಸಮದ್ ಖಾನ್ (37) ಪನ್ಪಿನಾಯನ್ ಪತ್ತ್ದೆರ್. ಆರೋಪಿನ ಕೈರ್ದ್ ಕನ್ಡ್ದಿನ ಬಂಗಾರ್ಲೆನ್ ಉಲಕೈ ಮಲ್ತೊಂದು, ಆಯನೊ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್.
ಪೊಲೀಸೆರೆ ಕಾರ್ಯಾಚರಣೆ
ಮಂಗಳೂರು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಡಾ. ಅರುಣ್ ಕೆ. ಬೊಕ್ಕ ಎಚ್ಚಿಗೆ ಪೊಲೀಸ್ ಅಧೀಕ್ಷಕೆ ಅನಿಲ್ ಕುಮಾರ್ ಭೂಮರೆಡ್ಡಿ ಮೊಕಲೆನ ಮಾರ್ಗದರ್ಶನೊಡು ಬಂಟ್ವಾಳ ಎ.ಎಸ್.ಪಿ ಯಶ್ ಕುಮಾರ್ ಶರ್ಮಾ ನಿರ್ದೇಶನೊಡು, ತನಿಖಾಧಿಕಾರಿ ಬೊಕ್ಕ ಬಂಟ್ವಾಳ ನಗರ ಇನ್ಸ್ಪೆಕ್ಟರ್ ಆನಂತ ಪದ್ಮನಾಭೆರೆ ಮುತಾಲಿಕೆಡ್ ಬಂಟ್ವಾಳ ನಗರ ಪೊಲೀಸ್ ಸ್ಟೇಶನ್ದ ಪೊಲೀಸ್ ಉಪ ನಿರೀಕ್ಷಕೆರಾಯಿನ ಸಂದೀಪ್ ಕುಮಾರ್ ಶೆಟ್ಟಿ, ಬಂಟ್ವಾಳ ನಗರ ಪೊಲೀಸ್ ಸ್ಟೇಶನ್ದ ಸಿಬ್ಬಂದಿಲಾಯಿನ ವಿಜಯ್ ಕುಮಾರ್, ಸುರೇಶ್ ಕುಮಾರ್, ರಾಜೇಶ್, ಇರ್ಷಾದ್ ಪಿ, ಬಸವರಾಜ್, ವಿಜಯ್ ಕುಮಾರ್, ಮಪಿಸಿ ರೇವತಿ ಬೊಕ್ಕ ಜಿಲ್ಲಾ ಪೊಲೀಸ್ ಘಟಕೊದ ಕಂಪ್ಯೂಟರ್ ಘಟಕೊದ ಸಂಪತ್ ಕುಮಾರ್ ಬೊಕ್ಕ ದಿವಾಕರ್ ಈ ಯಶಸ್ವಿ ಕಾರ್ಯಾಚರಣೆಡ್ ಪಾಲ್ಪಡೆದಿತ್ತೆರ್.