Last updated on March 10th, 2026 at 09:47 am
ಬೆಂಗಳೂರ್, ಮಾ 10: ಕರ್ನಾಟಕೊದ ಸರ್ಕಾರಿ ಆಸ್ಪತ್ರೆಲೆಡ್ ಮರ್ದ್ ಮಲ್ತೊಂದುಪ್ಪುನ ರೋಗಿಲೆಗ್ ಮಾರ್ಚ್ 11 ರ್ದ್ ಬಂಙ ಎದುರಾಪುನ ಸಾಧ್ಯತೆ ಉಂಡು. ಬೇತೆ ಬೇತೆ ಕಾಯೆಸ್ಲೆನ್ ದುಂಬು ದೀವೊಂದು ಕರ್ನಾಟಕೊದ ಸರ್ಕಾರಿ ಆಸ್ಪತ್ರೆಲೆನ ಡಾಕ್ಟರ್ನಕುಲು ಮಾರ್ಚ್ 11ರ್ದ್ ಅನಿರ್ದಿಷ್ಟಾವಧಿ ಮುಷ್ಕರೊಗು ತೀರ್ಮಾನ ಮಲ್ತ್ದೆರ್. ಅಂಚಾದ್ ರಾಜ್ಯೊದ ಪಾಕ ಸರ್ಕಾರಿ ಆಸ್ಪತ್ರೆಲೆಡ್ ಓಪಿಡಿ (OPD) ಸೇವೆಲು ಉಂತುನ ಸಾಧ್ಯತೆ ಉಂಡು. ಜ್ವರ, ತೆಮ್ಮ, ಚರ್ಮೊದ ಸೀಕ್ಲು, ಸ್ಕ್ಯಾನಿಂಗ್ ಅತ್ತ್ಂಡ ನೆತ್ತೆರ್ ಪರೀಕ್ಷೆ ಸೇರ್ದ್ ಸಾಮಾನ್ಯ ಮರ್ದ್ಗ್ ಸರ್ಕಾರಿ ಆಸ್ಪತ್ರೆಲೆನ್ ತಾಂಗ್ದುಪ್ಪುನ ರೋಗಿಲೆಗ್ ಉಂದು ಮಲ್ಲ ತೊಂದರೆ ಆಪಿನ ಪೋಡಿಗೆ ಉಂಡಾತ್ಂಡ್.
ವಿಶೇಷವಾದ್ ಪಾಪದ ಬೊಕ್ಕ ಮಧ್ಯಮ ವರ್ಗೊದ ಜನೊಕುಲು ಎಚ್ಚಿಗೆ ಸರ್ಕಾರಿ ಆಸ್ಪತ್ರೆಲೆನೇ ತಾಂಗ್ದ್ ಇಪ್ಪುನೆರ್ದಾವರ ಪರಿಸ್ಥಿತಿ ಗಂಭೀರ ಆಪಿನ ಸಾಧ್ಯತೆ ಉಂಡು.
ಸರ್ಕಾರಿ ಆಸ್ಪತ್ರೆಲೆನ ಡಾಕ್ಟರ್ನಕ್ಲೆನ ಸ್ಟ್ರೈಕ್ಗ್ ನೆವನ ದಾದ?
ಸರ್ಕಾರಿ ವೈದ್ಯಾಧಿಕಾರಿಲೆನ ಸಂಘ ಪಾಕ ವರ್ಸೊರ್ದಿಂಚಿ ಬಾಕಿ ಇಪ್ಪುನ ಬೇತೆ ಬೇತೆ ಸಮಸ್ಯೆಲೆನ ಪಿರಿಕಟ್ಟ್ಗ್ ಸರ್ಕಾರೊದ ಗುಮನ ಒಯ್ಪೆರ ಈ ಸ್ಟ್ರೈಕ್ಗ್ ಲೆಪ್ಪು ಕೊರ್ತುಂಡು. ಕರಿನ ನಾಲ್ ವರ್ಸೊರ್ದಿಂಚಿ ನಡಪಂದಿನ ವೃಂದ ಬೊಕ್ಕ ನೇಮಕಾತಿ ಪ್ರಕ್ರಿಯೆ, 13 ವರ್ಸೊರ್ದಿಂಚಿ ರಿನೀವಲ್ ಆವಂದಿನ ಡಾಕ್ಟರ್ನಕಲೆನ ಜೇಷ್ಠಾತಾ ಪಟ್ಟಿ, ಸರ್ಕಾರಿ ಆಸ್ಪತ್ರೆಲೆಡ್ ಮರ್ದ್ಲೆನ ಕುಂದೆಲ್ ಸೇರ್ದ್ ಒಟ್ಟು 15 ಪ್ರಮುಖ ಕಾಯೆಸ್ಲೆನ್ ದುಂಬು ದೀವೊಂದು ಸಂಘ ಪೊರ್ಮ್ಬಾಟೊಗು ಜತ್ತ್ದ್ಂಡ್.
ಡಾಕ್ಟರ್ನಕ್ಲೆನ ಕಾಯೆಸ್ಲೆನ್ ಈಡೆತ್ತಾಯೆರ ನಡತಿನ 7 ಇನಯೊಲು ವಿಫಲ
ಡಾಕ್ಟರ್ನಕ್ಲೆನ ಕಾಯೆಸ್ಲೆನ್ ಚರ್ಚೆ ಮಲ್ಪೆರ ಆರೋಗ್ಯ ಇಲಾಖೆ ಈತ್ನೇಟ ಏಳ್ ಇನಯೊಲೆನ್ ಮಲ್ತ್ದ್ಂಡ್. ಮಾರ್ಚ್ 2ತಾನಿ ಆರೋಗ್ಯ ಸಚಿವೆರ್ ಇತ್ತ್ದ್ ನಡತಿನ ಇನಯೊಡ್ಲಾ ದಾಲಾ ಆತಿಜಿ. ಸರ್ಕಾರೊರ್ದು ಒವ್ವೇ ಲಿಖಿತ ಭರವಸೆ ತಿಕ್ಕಂದಿನೆರ್ದಾವರ ಮುಷ್ಕರ ಮಲ್ಪೊಡೇ ಆಂಡ್ ಪನ್ದ್ ಸಂಘೊದ ನಾಯಕೆರ್ ತೆರಿಪಾದೆರ್.
ಮಾರ್ಚ್ 16 ರ್ದ್ ಜೋರಾಪುಂಡು ಪೊರ್ಮ್ಬಾಟ
ಮುಷ್ಕರೊದ ಭಾಗ ಆದ್ ಮಾರ್ಚ್ 11 ರ್ದ್ ಬೈದ್ಯೆರ್ ಬೊಕ್ಕ ಸಿಬ್ಬಂದಿಲು ಕಪ್ಪು ಪಟ್ಟಿ ಪಾಡೊಂದು ಓಪಿಡಿ ಸೇವೆಲೆನ್ ಉಂತಾಯೆರ ತೀರ್ಮಾನ ಮಲ್ತ್ದೆರ್. ಆತೇ ಅತ್ತಂದೆ ಮಾರ್ಚ್ 16 ರ್ದ್ ಸಾಮೂಹಿಕವಾದ್ ಬೇಲೆಗ್ ಬರಂದೆ ಕುಲ್ಲುನ ಎಚ್ಚರ್ಗೆನ್ಲಾ ಕೊರ್ತೆರ್.
ಈ ಬಗೆಟ್ ರಾಜ್ಯ ಸರ್ಕಾರಿ ವೈದ್ಯಾಧಿಕಾರಿಲೆನ ಸಂಘೊದ ರಾಜ್ಯಾಧ್ಯಕ್ಷೆ ಡಾ. ರವೀಂದ್ರನಾಥ್ ಮೇಟಿ ಮೆರೆನ ಮುತಾಲಿಕೆಡ್ ಡಾಕ್ಟರ್ನಕುಲು ಇತ್ತೆನೇ ಬೆಂಗಳೂರು ಜಿಲ್ಲಾಧಿಕಾರಿಲೆಗ್ ಬಿನ್ನಪುದೋಲೆ ಸಂದೈತ್ದೆರ್. ಒಟ್ಟುಡು ಸರ್ಕಾರಿ ಡಾಕ್ಟರ್ನಕಲೆನ ಮುಷ್ಕರೊರ್ದಾವರ ರಾಜ್ಯೊದ ಆರೋಗ್ಯ ಸೇವೆಲೆನ ಮಿತ್ತ್ ಮಲ್ಲ ಪರಿಣಾಮ ಆಪಿನ ಸಾಧ್ಯತೆ ಇತ್ತ್ದ್, ವಿಶೇಷವಾದ್ ಬಡಪತ್ತ್ದ ರೋಗಿಲೆಡ್ ಪೋಡಿಗೆ ಎಚ್ಚ ಆತ್ಂಡ್.