Last updated on March 7th, 2026 at 08:59 am
ಬೆಂಗಳೂರ್, ಮಾ 07: ನಾಯಿನ್ ವಾಕಿಂಗ್ ಲೆತೊಂದು ಪೋಪುನ ವಿಚಾರೊಗು ಬೆಂಗಳೂರ್ದ ಅಪಾರ್ಟ್ಮೆಂಟ್ ಒಂಜೆಟ್ ಸಿನೆಮಾ ಸ್ಟೈಲ್ಡ್ ಆಕೊಂದಿನ ನಡಕೆ ನಡತ್ದ್ಂಡ್. ಒಂತೆ ಜನ ಪ್ರಾಯೊದ ನಾಗರಿಕೆರ್ ಬೊಕ್ಕ ಒರಿ ಜವನನ ನಡುಟು ಈ ಗಲಾಟೆ ಆದಿತ್ತ್ದ್, ಮೆಯಿಕ್ ಕೈ ಪಾಡೊನುನಡೆ ಮುಟ್ಟ ಪೋತುಂಡು. ಬೆಂಗಳೂರ್ದ ವರ್ತೂರ್ದ ಬ್ರಿಗೇಡ್ ಅಪಾರ್ಟ್ಮೆಂಟ್ಡ್ ಈ ನಡಕೆ ನಡತ್ದ್ಂಡ್. ಈ ಬಗೆಟ್ ರಡ್ಡ್ ಕಡೆತಕುಲುಲಾ ವರ್ತೂರ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತ್ದ್, ಪೊಲೀಸೆರ್ ಪ್ರಕರಣೊದ ಜಡ್ತೆ ಸುರು ಮಲ್ತ್ದೆರ್.
ಪೆಟ್ಟ್ ತಿನ್ತಿನಾಯನ್ ತರುಣ್ ಅರೋರಾ ಪನ್ದ್ ಗುರ್ತ ಪತ್ತ್ದೆರ್. ಒಂತೆ ದಿನೊಕು ದುಂಬು ತರುಣ್ ಅರೋರ ತನ್ನ ತಾಂಕನೆದ ನಾಯಿನ್ ವಾಕಿಂಗ್ ಮಲ್ಪಾಯೆರ ಅಪಾರ್ಟ್ಮೆಂಟ್ದ ತಿರ್ತ್ ಲೆತೊಂದು ಬತ್ತಿತ್ತೆರ್. ಅಲ್ಪ ನಾಯಿ ಪಡಿಕೆ ಮೈತಿನೆನ್ ತೂದು ಒಂತೆ ಜನ ಆಕ್ಷೇಪ ತೂಪಾದಿತ್ತ್ದ್, ಈ ವಿಷಯೊಗು ಸಂಬಂಧಿತ್ದ್ ತರುಣ್ಡ ವಾಗ್ವಾದ ಸುರು ಆತ್ಂಡ್.
ಪಾತೆರೊಗು ಪಾತೇರ ಬುಲೆಯಿಲೆಕನೆ ಅಲ್ಪ ಇತ್ತಿನ ಏಳ್–ಎಣ್ಮ ಜನ ಪ್ರಾಯೊದಕುಲು ಸೇರ್ದ್ ತರುಣ್ ಅರೋರ ಗ್ ಆಕ್ದೆರ್ಗೆ. ಆಕ್ದ್ ಆರೆನ್ ನೂಕುದ್ ಪಾಡ್ದ್, ಕಾರ್ಡ್ ದೊಂಕುದೆರ್ ಪನ್ದ್ ಆರೋಪ ಮಲ್ತ್ದೆರ್. ಬೊಕ್ಕ ಅಲ್ಪನೇ ಇತ್ತಿನ ಒರ್ತಿ ಪೊಂಜೊವು ನಡುಕು ಬತ್ತ್ದ್ ಗಲಾಟೆನ್ ಉಂತಾದ್, ರಡ್ಡ್ ಕಡೆತಕ್ಲೆನ್ಲಾ ಬೇತೆ ಬೇತೆ ಮಲ್ತ್ದೆರ್.
ಈತ್ಮಾತ ಆಯಿ ಬೊಕ್ಕ ತರುಣ್ ವರ್ತೂರ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಇಂದೆಕ್ ಪ್ರತಿಯಾದ್ ಅಪಾರ್ಟ್ಮೆಂಟ್ದ ಪೊಂಜೊವು ಒರ್ತಿ ಎದುರೊಯಿಲ್ ಬರೆಪಾದಿತ್ತ್ದ್, ತರುಣ್ ಎಂಕ್ಲೆಗ್ ಆಕ್ದ್ ಪೋಡಿಕಟ್ಯಾದೆ ಪನ್ದ್ ಆರೋಪ ಮಲ್ತ್ದೆರ್. ಎಂಕ್ಲೆನ ಜೋಕುಲು ಪಿದಯೂರುಡ್ ಉಲ್ಲೆರ್, ಎಂಕ್ಲ ಇರ್ವೆರೇ ಮುಲ್ಪ ಉಲ್ಲ. “ಎನ್ನ ಪಿರವು ಮಲ್ಲ ಗ್ಯಾಂಗ್ ಉಂಡು, ನಿಕ್ಲೆನ್ ಬುಡ್ಪುಜಿ” ಪನ್ದ್ ತರುಣ್ ಪೋಡಿಕಟ್ಟಾದೆ ಪನ್ದ್ ಆರ್ ಒಯಿಲ್ಡ್ ತೆರಿಪಾದೆರ್. ಇತ್ತೇ ರಡ್ಡ್ ಕಡೆತಕ್ಲೆನಲಾ ಒಯಿಲ್ ಗೆತೊಂದಿನ ವರ್ತೂರ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದು, ಜಡ್ತೆ ಮಲ್ತೊಂದುಲ್ಲೆರ್.