Last updated on March 16th, 2026 at 03:27 pm
ಮಲಪ್ಪುರಂ, ಮಾ 16: ಚಾ ಕೊರ್ಪುನ ವಿಚಾರೊಡು ನಡತಿನ ಲಡಯಿ ಒಂಜಿ ವಿಕೋಪಗ್ ಪೋದು, ಮಾಮಿ ಒರ್ತಿ ತನ್ನ 28 ವರ್ಸ ಪ್ರಾಯೊದ ಮರ್ಮಲೆನ್ ಬೀಸತ್ತಿ ಪಾಡ್ದ್ ಕೆರ್ತಿನ ನಡಕೆ ಕೇರಳದ ಮಲಪ್ಪುರಂ ಜಿಲ್ಲೆದ ಕರುಲೈಡ್ ಸೋಮಾರ ಕಾಂಡೆ ನಡತ್ದ್ಂಡ್.
ತೀರ್ದಿನಾರೆನ್ ಸುನಿಲ್ ಬಾಬು ಪನ್ಪಿನಾರೆನ ಬೊಡೆದಿ ರಜಿಲಾ (28) ಪನ್ದ್ ಗುರ್ತ ಪತ್ತ್ದೆರ್. ನಡಕೆಗ್ ಸಂಬಂಧಿತ್ದ್ ಸುನಿಲ್ ಬಾಬು ನ ಅಪ್ಪೆ ಶಾಂತಾ (72) ಪನ್ಪಿನಾರೆನ್ ಪೂಕ್ಕೊಟ್ಟುಂಪಡಂ ಪೊಲೀಸೆರ್ ಉಲಕೈ ಮಲ್ತೊಂದೆರ್.
ಪೊಲೀಸೆರೆ ಒಲವುದ ಪ್ರಕಾರ, ಕಾಂಡೆ 6:30 ತ ಅಂದಾಜಿಗ್ ಶಾಂತಾ ಮೇರ್ ಮರ್ಮಲ್ ರಜಿಲಾಡ ಚಾ ಕೇನ್ದೆರ್ಗೆ. ರಜಿಲಾ ಚಾ ಕೊರಂದಿನೆಕ್ ಮಾಮಿ ಮರ್ಮಲೆನ ನಡುಟು ಲಡಯಿ ಆತ್ಂಡ್, ಶಾಂತಾ ಪಿಸ್ರ್ಡ್ ಬೀಸತ್ತಿಡ್ ಮರ್ಮಲೆನ ಮಿತ್ತ್ ದಾಳಿ ಮಲ್ತ್ದೆರ್. ಈ ಘೋರ ಕೃತ್ಯ ರಜಿಲಾನ ರಡ್ಡ್ ಎಲ್ಯ ಪೊಣ್ಣು ಜೋಕುಲೆನ ಕಣ್ಣೆದುರುಡೇ ನಡತ್ದ್ಂಡ್. ಜೋಕುಲು ಕಲ್ಕುನೆನ್ ಕೇನ್ದ್ ಬರಿತಿಲ್ಲದಕುಲು ಬತ್ತ್ದ್ ತೂನಗ ರಜಿಲಾ ನೆತ್ತೆರ್ದ ಮಡುಟು ಬೂರ್ದಿತ್ತೆರ್. ಆರೆನ್ ಅಪಗನೇ ನಿಲಂಬೂರು ತಾಲ್ಲೂಕ್ ಸರ್ಕಾರಿ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ಅಡೆ ಎತ್ತ್ನಗ ಆರ್ ತೀರ್ದಿತ್ತೆರ್ ಪನ್ದ್ ಡಾಕ್ಟರ್ ಘೋಷಣೆ ಮಲ್ತ್ದೆರ್.