Last updated on March 4th, 2026 at 09:20 am
ಕುಡ್ಲ, ಮಾ. 04: ಸಾಮಾಜಿಕ ಬಲೆತ್ತಾನೊಡು ಒಂಜಿ ಪೋಸ್ಟ್ದ ಅಡಿಟ್ ‘ಸಪೋರ್ಟ್ ಮಲ್ಪುಲೆ ಬ್ರೋ, ಉಳ್ಳಾಲ ಪಲ್ಲಿದ ಕೈತಲ್ ಬಾಂಬ್ ಬ್ಲಾಸ್ಟ್ ಮಲ್ಪುವೆ’ ಪನ್ದ್ ಕಮೆಂಟ್ ಮಲ್ತಿತ್ತಿನ ಆರೋಪಿನ್ ಉಳ್ಳಾಲ ಪೊಲೀಸೆರ್ ಅಂಗಾರೆ ಕೈದ್ ಮಲ್ತ್ದೆರ್.
ಕೈದಾತಿನಾಯನ್ ಉತ್ತರ ಕನ್ನಡ ಜಿಲ್ಲೆದ ಭಟ್ಕಳ ತಾಲ್ಲೂಕ್ದ ಜಾಲಿ ದೇವಿನಗರದ ಶಂಕರ್ ಮಸ್ತಪ್ಪ ಮೊಗೆರ್ (35 ವರ್ಸ) ಪನ್ದ್ ಗುರ್ತ ಪತ್ತ್ದೆರ್. ಆಯೆ ಕಮೆಂಟ್ ಮಲ್ದಿನ ಮೊಬೈಲ್ನ್ ಉಲಕೈ ಮಲ್ತೊಂದ ಪನ್ದ್ ನಗರ ಪೊಲೀಸ್ ಕಮಿಷನರ್ ಸುಧೀರ್ ಕುಮಾರ್ ರೆಡ್ಡಿ ತೆರಿಪಾದೆರ್.
ಇನ್ಸ್ಟಾಗ್ರಾಂಡ್ ಬೇತೆ ಏರೆನನಾ ಪೋಸ್ಟ್ಗ್ ಆರೋಪಿ ‘ಶಂಕರ್11916’ ಪನ್ಪಿ ಅಕೌಂಟ್ಡ್ “ಸಪೋರ್ಟ್ ಮಲ್ಪುಲೆ ಬ್ರೋ ಉಳ್ಳಾಲ ಪಲ್ಲಿದ ಕೈತಲ್ ಬಾಂಬ್ ಬ್ಲಾಸ್ಟ್ ಮಲ್ಪುವೆ” ಪನ್ದ್ ಕಮೆಂಟ್ ಮಲ್ತಿತ್ತೆ, ಈ ಪೋಸ್ಟ್ ವೈರಲ್ ಆದಿತ್ತ್ಂಡ್. ಈ ಬಗೆಟ್ ಉಳ್ಳಾಲ ಪೊಲೀಸೆರ್ ಸ್ವಯಂಪ್ರೇರಿತೆರಾದ್ ಪ್ರಕರಣ ದಾಕಲ್ತೊಂದು, ಆರೋಪಿನ್ ಕೈದ್ ಮಲ್ತ್ದೆರ್.