Last updated on April 17th, 2026 at 10:22 am
ಬೆಂಗಳೂರ್, ಏ 17: ಕರ್ನಾಟಕೊಡು ಪಕ್ಕಿ ಜ್ವರದ (Bird Flu) ಪೋಡಿಗೆ ಎಚ್ಚ ಆತ್ಂಡ್. ಬೆಂಗಳೂರ್ದ ಹೆಸರಘಟ್ಟಡ್ ಇಪ್ಪುನ ರಾಜ್ಯ ಸರ್ಕಾರೊದ ಅಧೀನೊಡು ಇಪ್ಪುನ ಪೌಲ್ಟ್ರಿ ಫಾರಂಡ್ H5N1 ವೈರಸ್ ತಿಕ್ಕ್ದ್ಂಡ್. ಕೇಂದ್ರ ಸರ್ಕಾರದ ಸೂಚನೆದ ಮಿತ್ತ್ ನಡತಿನ ತಪಾಸಣೆಡ್ ಕೋರಿಲೆಡ್ ಈ ಸೋಂಕು ಇಪ್ಪುನೆನ್ ಅಧಿಕಾರಿಲು ದೃಢ ಮಲ್ತ್ದೆರ್. ಫಾರಂನ್ ಅಪಗನೇ ಮುಚ್ಚಿದಿತ್ತ್ದ್, ಈ ಪ್ರದೇಶೊರ್ದು ರಾಜ್ಯೊದ ಬೇತೆ ಬೇತೆ ಜಾಗೆಲೆಗ್ ಕೋರಿ ಸಪ್ಲೈ ಆವೊಂದಿತ್ತಿನೆರ್ದಾವರ ದುಂಬೆಚ್ಚರ್ಗೆ ಕ್ರಮೊಕುಲೆನ್ ಬೊಕಲಾ ಗಟ್ಟಿ ಮಲ್ತ್ದೆರ್.
ಏವಿಯನ್ ಇನ್ಫ್ಲುಯೆನ್ಸ ಪನ್ದ್ಲಾ ಲೆಪ್ಪಾವುನ ಬರ್ಡ್ ಫ್ಲೂ ವೈರಸ್ ಸೋಂಕು ಆದಿತ್ತ್ದ್ ಅವು ಪಕ್ಕಿಲೆಗ್ ಮಾತ್ರ ಅತ್ತ್, ನರಮಾನಿ ಬೊಕ್ಕ ಬೇತೆ ಪ್ರಾಣಿಲೆಡ್ಲಾ ತೋಜಿದ್ ಬರ್ಪುಂಡು. ಇತ್ತೆ ಉಂದೇ ವೈರಸ್ ಬೆಂಗಳೂರ್ಡ್ ತೋಜಿದ್ ಬೈದಿತ್ತ್ದ್, ಪೌಲ್ಟ್ರಿ ಫಾರಂಡ್ ಬೇಲೆ ಮಲ್ತೊಂದಿತ್ತಿನ ಕೋರಿ ಸಾಂಕುನಕ್ಲೆನ್ ವೈದ್ಯಾಧಿಕಾರಿಲು ಕ್ವಾರಂಟೈನ್ ಮಲ್ತ್ದೆರ್. ಸುತ್ತಮುತ್ತದ ಕೋರಿ ಶೆಡ್ಲೆಡ್ಲಾ ತಪಾಸಣೆ ಮಲ್ಪೆರೆ ಪಶುವೈದ್ಯಾಧಿಕಾರಿಲೆಗ್ ರಾಜ್ಯ ಸರ್ಕಾರ ಸೂಚನೆ ಕೊರ್ತುಂಡು. ಗ್ರಾಮ ಪಂಚಾಯಿತಿ ಮಟ್ಟೊಡ್ಲಾ ಎಚ್ಚರ್ಗೆದ ನೋಟಿಸ್ ಕೊರ್ತೆರ್. ಕೋರಿ ಸಾಂಕುನ ಕೇಂದ್ರೊಲು ಬೊಕ್ಕ ಕೋರಿದ ಅಂಗಡಿಲೆಡ್ ವಿಶೇಷ ಪರಿಶೀಲನೆ ನಡತೊಂದುಂಡು. ದೊಂಬು ಶೆಕೆ ಎಚ್ಚ ಇಪ್ಪುನೆರ್ದಾವರ ಈ ವೈರಸ್ ಪಗರುನ ಸಾಧ್ಯತೆ ಎಚ್ಚ ಪನ್ದ್ ತಜ್ಞೆರ್ ತೆರಿಪಾದೆರ್.