Last updated on April 16th, 2026 at 07:02 pm
ಕಾರ್ಲ: ಬ್ಯಾಡ್ಮಿಂಟನ್ ಏಷ್ಯಾ ಚಾಂಪಿಯನ್ಶಿಪ್ಡ್ ಬೊಳ್ಳಿದ ಪದಕ ಗೆಂದ್ದ್ ದೇಶೊಗು ಕೀರ್ತಿ ನತಿನ ಕಾರ್ಲದ ಉದಯೋನ್ಮುಖ ಪ್ರತಿಭೆ ಆಯುಷ್ ಶೆಟ್ಟಿ ಮೆರಗ್ ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್ ಎ.16ತಾನಿ ವಿಧಾನಸೌಧ ಸಿಎಂ ಕಚೇರಿಡ್ ಎಡ್ಡೆಪು ಬಯಕಿಯೆರ್.
ಈ ಪೊರ್ತುಡು ಪಾತೆರ್ನ ಮುಖ್ಯಮಂತ್ರಿಲು, ಆಯುಷ್ ಶೆಟ್ಟಿ ಮೇರ್ ಬೆನ್ತಿನ ಸಾದಗೊ ರಾಜ್ಯೊಗು ಪೆರ್ಮೆದ ವಿಷಯ ಆದಿತ್ತ್ದ್, ನನದ ದಿನೊಟು ನನಲಾತ್ ಎತ್ತರೊಗು ಬುಲೆಯಡ್ ಪನ್ದ್ ಬಾಮಿತೆರ್.
ಚೀನಾದ ನಿಂಗೋ ಡ್ ನಡತಿನ ಸೆಮಿಫೈನಲ್ ಗೊಬ್ಬುಡು ಆಯುಷ್ ಶೆಟ್ಟಿ ವಿಶ್ವೊದ ನಂ.1 ಗೊಬ್ಬುಗಾರೆ ಕುನ್ಹಾವುತ್ ವಿಟಿಕ್ಸರ್ನ್ ನ್ ಸೋಪಾದ್ ಫೈನಲ್ಗ್ ಪೋದಿತ್ತೆರ್. ಆಯುಷ್ ಮೇರ್ ಬೊಳ್ಳಿದ ಪದಕ ಗೆಂದುನೆತ ಒಟ್ಟುಗು, 61 ವರ್ಸೊರ್ದು ಬೊಕ್ಕ ಭಾರತೊಗು ಈ ವಿಭಾಗೊಡು ಪದಕ ತಿಕ್ಕ್ದ್ಂಡ್.
ವಿಧಾನಪರಿಷತ್ ಸದಸ್ಯೆ ಗೋವಿಂದರಾಜು, ಮಾಜಿ ಸಚಿವೆರಾಯಿನ ವಿನಯ ಕುಮಾರ್ ಸೊರಕೆ, ಜಯಪ್ರಕಾಶ್ ಹೆಗ್ಡೆ, ಕಾರ್ಲ ಕಾಂಗ್ರೆಸ್ ಮುಖಂಡೆ ಉದಯ ಶೆಟ್ಟಿ ಮುನಿಯಾಲ್, ಆಯುಷ್ರೆನ ಅಪ್ಪೆಅಮ್ಮೆ ರಾಮಪ್ರಕಾಶ್ ಶೆಟ್ಟಿ ಶಾಲ್ಮಲಿ ಶೆಟ್ಟಿ ದಂಪತಿ, ಬೇತೆ ಗಣ್ಯೆರ್ ಒತ್ತುಪಾಲ್ ಇತ್ತೆರ್.