Last updated on April 13th, 2026 at 12:34 pm
ಮರೆನಾ, ಮ.ಪ್ರ., ಏ. 13: ಅಪ್ರಾಪ್ತ ಪ್ರಾಯೊದ ಪೊಣ್ಣು ಒರ್ತಿ ಬಾಯ್ಫ್ರೆಂಡ್ನ್ ಮದಿಮೆ ಆಯೆರ ಆಲೆನ್ ಪೆದ್ದಿನ ಅಪ್ಪೆಅಮ್ಮಗೇ ವಿಷ ತಿನ್ಪಾದಿನ ನಡಕೆ ಮಧ್ಯಪ್ರದೇಶದ ಮರೆನಾ ಡ್ ನಡತ್ದ್ಂಡ್. ಮೋಕೆದ ಅಮಲ್ಡ್ ಮಗಲೊರ್ತಿ ಪೆದ್ದಿನಕ್ಲೆನೇ ಮುಗಿಪೆರ ಪ್ಲಾನ್ ಮಲ್ದಿನ ಕರಾಳ ಕಥೆ ಉಂದು. ಅಪ್ಪೆಅಮ್ಮೆ ಮಗಲೆನ ಮಿತ್ತ್ ದೀತಿನ ನಂಬಿಕೆ ಪೊಟ್ಟಾತ್ಂಡ್. ಚಪಾತಿಡ್ ಎಲಿ ಪಾಷಾಣ ಬೆರಕೆ ಮಲ್ತ್ದ್ ಅಪ್ಪೆಅಮ್ಮಗ್ ಕೊರ್ತಿನ ನಡಕೆ ಬೊಲ್ಪುಗು ಬೈದ್ಂಡ್. ಮೊರೆನಾ ಜಿಲ್ಲೆದ ಪೋರ್ಸಾ ಪನ್ಪಿನಲ್ಪ ಅಪ್ರಾಪ್ತ ಪ್ರಾಯೊದ ಪೊಣ್ಣು ಒರ್ತಿ ತನ್ನ ಚಂಗಾಯಿನ ಒಟ್ಟು ಕೂಡೊಂದು ಅಪ್ಪೆಅಮ್ಮನೇ ಕೆರ್ಯೆರ ತೂತಲ್!
ಆಲೆನ ಮೋಕೆಗ್ ಅಡ್ಡ ಬರ್ಪೆರ್ ಪನ್ಪಿ ನೆವನೊಗಾ ದಾನ್ನ, ಈ ಪೊಣ್ಣು ತನ್ನ ದೋಸ್ತಿ ಸುದಾಮನ ಒಟ್ಟುಗು ಕೂಡೊಂದು ಕ್ರೂರ ಯೋಜನೆ ಒಂಜೆನ್ ಪಾಡೊಂದಲ್. ಏ. 12ತಾನಿ ಇಲ್ಲಡ್ ಏರ್ಲಾ ಇಜ್ಜಂದಿನ ಪೊರ್ತು ತೂದು, ತಾನೇ ಅಟಿಲ್ ಮಲ್ಪುನ ಜಬದರಿ ಗೆತೊಂಡಿನ ಪೊಣ್ಣು, ಚಪಾತಿದ ಪೊಡಿಕ್ ಎಲಿ ಕೆರ್ಪುನ ಮರ್ದ್ ಪಾಡ್ದಲ್. ಇಂದೆನ್ ತಿನ್ದಿನ ಅಪ್ಪೆ ಮಿಥಿಲೇಶ್ ಬೊಕ್ಕ ಅಮ್ಮೆ ಗಬ್ಬರ್ ಪ್ರಜಾಪತಿ ಮೊಕಲೆನ ಆರೋಗ್ಯ ಅಪಗನೇ ತೆಟ್ಟ್ದ್ಂಡ್. ಇತ್ತೆ ಇರ್ವೆರೆನ ಸ್ಥಿತಿಲಾ ಸೀರಿಯಸ್ ಆದಿತ್ತ್ದ್, ಮೊರೆನಾರ್ದ್ ಗ್ವಾಲಿಯರ್ನ ಆಸ್ಪತ್ರೆಗ್ ಎಚ್ಚಿಗೆ ಮರ್ದ್ಗ್ ಲೆತೊಂದು ಪೋತೆರ್.
ಈ ಪ್ರಕರಣ ಸುರುಟು ಕಾಲಿ ಫುಡ್ ಪಾಯ್ಸನ್ದ ಲೆಕ ತೋಜಿದಿತ್ತ್ಂಡ್. ಆಂಡ ಪೊಲೀಸೆರೆಗ್ ತಿಕ್ಕಿನ ಒಂಜಿ ಆಡಿಯೋ ಕ್ಲಿಪ್ ಇಡೀ ಕಥೆನೇ ಅಡಿಮೇಲ್ ಮಲ್ದ್ಂಡ್. ಸಾಮಾಜಿಕ ಬಲೆತ್ತಾನೊಡು ವೈರಲ್ ಆತಿನ ಆ ಆಡಿಯೋಡ್ ಪೊಣ್ಣು ಬೊಕ್ಕ ಆಲೆನ ದೋಸ್ತಿ ಸುದಾಮೆ ಇರ್ವೆರ್ ಕೂಡೊಂದು ಪ್ಲಾನ್ ಮಲ್ದಿನ ದೃಢ ಆತ್ಂಡ್.
“ಕೈತಲೇ ಗೊಬ್ಬರದ ಅಂಗಡಿ ಉಂಡು, ಅಲ್ಪರ್ದ್ ಎಲಿ ಪಾಷಾಣ ಕನಲ. ಇನಿ ಏನೇ ರೋಟಿ ಮಲ್ತೊಂದುಲ್ಲೆ, ಎಂಕ್ ಎಡ್ಡೆ ಅವಕಾಶ ತಿಕ್ಕ್ದ್ಂಡ್. ರೋಟಿಡ್ ವಿಷ ಬೆರಕೆ ಮಲ್ತ್ದ್ ಅಕಲೆಗ್ ತಿನರೆ ಕೊರ್ಪೆ” ಪನ್ದ್ ಆಲ್ ಪನ್ದಿತ್ತಲ್. ಈ ಒಂಜಿ ಸಂಭಾಷಣೆ ಪೊಲೀಸೆರೆ ಕೈಕ್ ತಿಕ್ಕಿಬೊಕ್ಕನೇ ಮಗಲೆನ ಕ್ರೂರ ಮೋನೆ ಮಾತೆರೆಗ್ ತೆರಿದ್ ಬೈದ್ಂಡ್.
ಅಪ್ಪೆಅಮ್ಮೆ ಇತ್ತೆ ಪೋರ್ಸಾ ಪೊಲೀಸ್ ಸ್ಟೇಷನ್ಡ್ ಒಯಿಲ್ ಬರೆಪಾದೆರ್. ಆಡಿಯೋ ಸಾಕ್ಷ್ಯ ಬೊಕ್ಕ ಅಪ್ಪೆಅಮ್ಮನ ಒಯಿಲ್ದ ಆಧಾರೊಡು ಪೊಲೀಸೆರ್ ಅಪ್ರಾಪ್ತ ಪೊಣ್ಣು ಬೊಕ್ಕ ಆಲೆನ ದೋಸ್ತಿ ಸುದಾಮನ ಮಿತ್ತ್ ಕೆರ್ಪುನ ಪುನೆಪುದ ಪ್ರಕರಣ ಪಾಡ್ದೆರ್. ಇತ್ತೆ ಪೊಲೀಸೆರ್ ಈ ಇರ್ವೆರೆನ್ಲಾ ಉಲಕೈ ಮಲ್ತೊಂದು ಎಚ್ಚಗೆ ವಿಚಾರಣೆ ಮಲ್ತೊಂದುಲ್ಲೆರ್.
ಮೋಕೆದ ಪುದರ್ಡ್ ಅಪ್ಪೆಅಮ್ಮನೇ ಬಲಿ ಕೊರ್ಯೆರ ಪಿದಡ್ದಿನ ಮಗಲೆನ ಈ ಕೃತ್ಯ ಇಡೀ ಸಮಾಜೊನೇ ಪೋಡಿಕಟ್ಟಾದ್ಂಡ್. ಸಂಬಂಧೊಲೆನ ನಡುತ ನಂಬಿಕೆ ಇತ್ತೆ ಓಡೆ ಬತ್ತ್ದ್ ಉಂತುದುಂಡು ಪನ್ಪಿನೆನ್ ಈ ನಡಕೆ ತೂಪಾದ್ಂಡ್.