Last updated on April 13th, 2026 at 02:47 pm
ಬೆಂಗಳೂರ್, ಏ. 13: ಅಸ್ತಿತ್ವೊಗು ಬರ್ಪಿನ ಏತೋ ವರ್ಸೊಗು ದುಂಬೇ, ಇಜ್ಜಂದಿನ ಕಂಪೆನಿ ಒಂಜೆಕ್ ಸುಮಾರ್ 53 ಎಕರೆ ಜಾಗೆ ಸ್ವಾಧೀನ ಮಲ್ತ್ದ್ ಪಟ್ಟ್ದಿನ ಸರ್ಕಾರೊದ ಕ್ರಮೊನು ಕರ್ನಾಟಕ ಹೈಕೋರ್ಟ್ ‘ಸಂವಿಧಾನೊಗು ಮಲ್ದಿನ ದಗೆ’ ಪನ್ದ್ ಲೆತ್ತ್ದ್ಂಡ್. ಈ ಬಹುಕೋಟಿ ಹಗರಣೊದ ಸತ್ಯಾಸತ್ಯತೆ ಪಿದಯಿ ಬರ್ಯೆರ ಸಿಬಿಐ ಜಡ್ತೆಗ್ ಆದೇಶ ಮಲ್ದಿನ ನ್ಯಾಯಂತಡೆ, ಸಂಬಂಧಿತಿನ ಸಂಸ್ಥೆಗ್ 10 ಲಕ್ಷ ರೂಪಾಯಿ ದಂಡ ಪಾಡ್ದ್ಂಡ್.
ಹೆಬ್ಬಾಳದ ಅಮಾನಿಕೆರೆ ಕೈತಲ್ ಬಾರೀ ಎಚ್ಚ ಮೌಲ್ಯೊದ ಜಾಗೆನ್ 2004 ಟ್ ಬೆನ್ನಿದಕಲೆಡ ಎಕರೆಗ್ ಕಾಲಿ 15 ಲಕ್ಷ ರೂಪಾಯಿದ ಲೆಕ ಸ್ವಾಧೀನ ಮಲ್ತಿತ್ತೆರ್. ಇಂದೆನ್ ‘ಲೇಕ್ವ್ಯೂ ಟೂರಿಸಂ ಕಾರ್ಪೊರೇಷನ್’ ಪನ್ಪಿ ಸಂಸ್ಥೆಗ್ ರಿಯಲ್ ಎಸ್ಟೇಟ್ ಉದ್ದೇಶೊಗು ಪಟ್ಟ್ದಿತ್ತೆರ್. ವಿಶೇಷ ದಾದ ಪನ್ಡ, ಈ ಸಂಸ್ಥೆ ಜಾಗೆಗ್ ಬೋಡಾದ್ 2000ನೇ ಇಸವಿಡ್ ಅರ್ಜಿ ಪಾಡ್ದಿತ್ತ್ಂಡ್, ಆಂಡ ಸಂಸ್ಥೆ ಅಧಿಕೃತವಾದ್ ರಿಜಿಸ್ಟರ್ ಆತೀನೇ 2011 ಟ್! ಪನ್ಡ, ಅಸ್ತಿತ್ವೊಡೇ ಇಜ್ಯಂದಿನ ಸಂಸ್ಥೆಗ್ ಜಾಗೆ ಕೊರ್ಯೆರೆ ಅಪಗದ ಉನ್ನತ ಮಟ್ಟೊದ ಸಮಿತಿ ಶಿಫಾರಸ್ ಮಲ್ತಿತ್ತ್ಂಡ್.
ನ್ಯಾಯಮೂರ್ತಿಲಾಯಿನ ಡಿ.ಕೆ.ಸಿಂಗ್ ಬೊಕ್ಕ ತಾರಾ ವಿತಸ್ತ ಗಂಜು ಮೊಕುಲಿತ್ತಿನ ಪೀಠ ಈ ಪ್ರಕರಣೊಡು ಸರ್ಕಾರೊದ ಉಲಗೊಬ್ಬುನು ಪಿದಯಿ ಕನತ್ದ್ಂಡ್. ನ್ಯಾಯಂತಡೆ ಉಲ್ಲೇಖ ಮಲ್ದಿನ ಅಂಶೊಲು ಇಂಚ ಉಲ್ಲ;
- ಅರ್ಜಿ ಸಂದಾದಿನ 5 ದಿನೊಟೇ ಅನುಮೋದನೆ: ಸಂಸ್ಥೆ ಅರ್ಜಿ ಸಂದಾದಿನ ಐನೇ ದಿನೊಟು ಸಭೆ ಲೆತ್ತ್ದ್ ಭೂಸ್ವಾಧೀನೊಗು ಶಿಫಾರಸ್ ಮಲ್ತಿತ್ತೆರ್.
- ಕಮ್ಮಿ ಬಂಡವಾಳ: ಕಾಲಿ 1 ಲಕ್ಷ ರೂಪಾಯಿ ಷೇರ್ ಕ್ಯಾಪಿಟಲ್ ಇತ್ತಿನ, ಇತ್ತೆ ಮೌಲ್ಯ ಮೈನಸ್ 8.60 ಲಕ್ಷ ರೂಪಾಯಿ ಇಪ್ಪುನ ಸಂಸ್ಥೆಗ್ ಸಾರಗಟ್ಲೆ ಕೋಟಿ ಮೌಲ್ಯೊದ ಜಾಗೆ ಕೊರ್ತೆರ್.
- ಉದ್ದೇಶ ಪಗತೆ: ಪ್ರವಾಸೋದ್ಯಮ ಕೇಂದ್ರೊದ ಪುದರ್ಡ್ ಜಾಗೆ ಗೆತೊಂದು, ಬೊಕ್ಕ ಅವೆನ್ ಕಮರ್ಷಿಯಲ್ ಟೌನ್ಶಿಪ್ಗ್ ಗಲಸೆರೆ 2023 ಟ್ ಸರ್ಕಾರ ನಿರ್ಧಾರ ಮಲ್ತಿತ್ತ್ಂಡ್.
‘ಈ ಭೂಸ್ವಾಧೀನ ಪ್ರಕ್ರಿಯೆನೇ ಸಾರ್ವಜನಿಕ ಉದ್ದೇಶೊದ ಆದಿಜ್ಜಂಡ್. ಸರ್ಕಾರೊದ ಅಧಿಕಾರಿಲೇ ಖಾಸಗಿದಕಲೆನ ಒಟ್ಟುಗು ಉಲಗೊಬ್ಬು ಗೊಬ್ಬುದೆರ್. ರಾಜ್ಯೊದ ತನಿಖಾ ಸಂಸ್ಥೆಲೆರ್ದ್ ಸ್ವತಂತ್ರ ಜಡ್ತೆ ಸಾಧ್ಯ ಇಜ್ಜಂದಿನೆರ್ದಾವರ ಸಿಬಿಐಗ್ ಕೊರೊಂದುಲ್ಲ’ ಪನ್ದ್ ಹೈಕೋರ್ಟ್ ಆದೇಶ ಕೊರ್ತುಂಡು.