Last updated on April 17th, 2026 at 12:22 pm
ನಟ್ಟುನಕುಲುಯೆ ಮಾತ ನಟ್ಟುನಕುಲುಯೆ
ಅವುಲು ಮೂಲು ಓಲು ತೂಂಡ ನಟ್ಟುನಕುಲುಯೆ//
ಓಟುಗಾದ್ ನಟ್ಟುನಕುಲು,ಸೀಟ್ಗಾದ್ ನಟ್ಟುನಕುಲು
ಲೈಕ್ ಗಾದ್ ನಟ್ಟುನಕುಲು ಸಬ್ಸ್ಕ್ರೈಬ್ಗಾದ್ ನಟ್ಟುನಕುಲು//
ಬಂಜಿಗಿಜ್ಜಿ ಪಂಡ ಮೂಲು ಕೆಬಿಕ್ ಕೇನುಜಿ
ತರೆಕ್ ನಿರೆಲ್ ಇಜ್ಜಿ ಪಂಡ ಕಣ್ಣ್ಗ್ ತೋಜುಜಿ
ಕಷ್ಟ ಪಂಡ್ದ್ ಬುಲ್ತುನಾಂಡ ಮನಸ್ ಕರಗುಜಿ
ಸೀಕ್ಡ್ ಬೂರ್ದು ನರಕ್ಂಡ ತಿರ್ಗ್ ತೂಪುಜಿ //
ಪುದರ್ ಬಿರ್ದ್ ತಮ್ಮನೊಗು ದಾಯೆ ನಟ್ಟೊಡು
ಮಲ್ಲ ಮಣೆಕ್ ಲಡಯಿಕೂಟ ದಾಯೆ ಮನ್ಪೊಡು
ಸಕ್ಕರೆನ್ ಬಿರ್ಕ್ದ್ ಪಿಜಿನ್ ದಾಯೆ ಲೆಪ್ಪೊಡು
ಏರೊ ಬೆಂದಿಬೆಗರ್ಡ್ ಪಾಲ್ ದಾಯೆ ಕೇನೊಡು//
ಇತ್ತಿನಕುಲು ಬೊಕಲ ಬೋಡು ಆಸೆ ಮುಗಿಯುಜಾ
ಮೆರುವೆಗಾದ್ ತುತ್ತಿಕುಂಟು ಪರಿದ್ ನೇಲುಜಾ
ಬಡವುದಾಂತೆ ತಿನ್ಪಿ ತೆನಸ್ ಕಜವು ಸೇರುಜಾ
ಪಣವುಗಾದ್ ಮಾನೆಕೇರ್ಪಿ ಬುದ್ದಿ ಬೈದಿಜಾ//
ಮೂಜಿ ದಿನತ ಬದ್ಕ್ ಮೂಲು ನೆಂಪು ದೀವೊಡು
ಪಾಪ ಪುಣ್ಯ ಕರ್ಮ ನೇಮ ನೆಂಪುಡುಪ್ಪೊಡು
ದಾನ ಧರ್ಮ ಮನ್ಪುನಂಚಿ ಮನಸ್ ಉಪ್ಪೊಡು
ಅಂಚಿನೊಂಜಿ ಭಾಗ್ಯೊಗಾದ್ ಅರೆಡ ನಟ್ಟೊಡು//
……………
ಕುವಿಕು ಕಣ್ವತೀರ್ಥ