Last updated on April 21st, 2026 at 04:03 pm
ಒಡಿಪು, ಏ. 21: ತುಳುನಾಡ್ ಮಾತಾ ಧರ್ಮೊಲೆನ್ಲಾ ಒಂಜೇ ದಿಟ್ಟಿಡ್ ತೂತಿನ ನಾಡ್. ನಮ್ಮ ದೈವಾರಾಧನೆ ಧರ್ಮೊದ ಅರು ಮೀರ್ದ್ ನಡಪುನ ಪವಿತ್ರ ಆಚರಣೆ. ಆಂಡ ಕಾಲೊದ ಗೊಬ್ಬುಡು, ಒಂಜಾತ್ ಜನೊತ ಆಂಕಾರ ತರೆಕ್ ಬರ್ತ್ದ್, ಓಲಾ ಅಲ್ಪಲ್ಪ ಅತ್ತಂದಿ ನಡಕೆಲು ಕೋಮು ಲಡಯಿಲು ಆಂಡ ಮಾಧ್ಯಮೊಲು ಅವೆನೇ ಮಲ್ಲೆ ಮಲ್ತ್ ತೋಜಾದ್ ನಮ್ಮ ಸರ್ವ ಧರ್ಮ ಸಹಿಷ್ಣು ತುಳುಧರ್ಮೊದ ಮಣ್ಣ್ನ್ ಕೋಮು ಸೂಕ್ಷ್ಮ ಜಾಗೆ ಮಲ್ತ್ ಪಾಡ್ದೆರ್. ಆಂಡ ಒಡಿಪು ಧರ್ಮಪ್ರಾಂತ್ಯೊದ ಪೊಸ ಬಿಷಪ್ ಆದ್ ನೇಮಕ ಆತಿನ ರೆ| ಡಾ| ಲೆಸ್ಲಿ ಕ್ಲಿಫರ್ಡ್ ಡಿಸೋಜಾ ಮೆರೆನ ಒಂಜಿ ಪಾತೆರ ಇನಿಕ್ ಆ ಕೋಮು ಸೂಕ್ಷ್ಮದ ಕಲಂಕೊನು ದೆಕ್ಕುನಂಚಿ ಮಲ್ಲ ಪಜ್ಜೆ ಆತ್ಂಡ್.
ರೆ| ಡಾ| ಲೆಸ್ಲಿ ಕ್ಲಿಫರ್ಡ್ ಡಿಸೋಜಾ ಮೇರೆನ್ ಧರ್ಮ ಪ್ರಾಂತ್ಯೊದ ರಡ್ಡನೇ ಧರ್ಮಾಧ್ಯಕ್ಷೆರಾದ್ ಪೋಪೆರೇ ಅಜತ್ದಿತ್ತ್ದ್, ಆರೆನ ದೀಕ್ಷಾ ಕಾರ್ಯಕ್ರಮ ಕೋಡೆ ಎಪ್ರಿಲ್ 20 ದಾನಿ ಕಲ್ಯಾಣಪುರ ಮಿಲಾಗ್ರಿಸ್ ಕಾಲೇಜಿದ ಮೈದಾನೊಡು ನಡತ್ಂಡ್.
ದೀಕ್ಷಾ ಕಾರ್ಯಕ್ರಮೊಡು ಪಾತೆರ್ನ ಆರ್ “ಯಾನ್ ತುಳುನಾಡ್ದಾಯೆ, ಯಾನ್ ಪುಟ್ಟುದಿನಿ ಉಚ್ಚಿಲದ ಮಹಾಲಕ್ಷ್ಮೀ ದೇವಸ್ಥಾನೊದ ಕೈತಲ್, ಯಾನ್ ಕಲ್ತ್ದಿನಿ ಉಚ್ಚಿಲದ ಸರಸ್ವತಿ ಮಂದಿರ ಪ್ರೈಮರಿ ಶಾಲೆಡ್, ಅವು ಮಹಾಲಕ್ಷ್ಮಿ ದೇವಸ್ಥಾನೊದ ಎದುರುಡೇ ಉಂಡು. ಎನ್ನ ಹೈಸ್ಕೂಲ್ ಕಡಲಬರಿತ ಗವರ್ನಮೆಂಟ್ ಫಿಷರೀಸ್ ಹೈಸ್ಕೂಲ್ಡ್, ಐರ್ದ್ ಬೊಕ್ಕ ಯಾನ್ ಮಲ್ತಿನ ಪಿಯುಸಿ ಅದಮಾರು ಪೂರ್ಣಪ್ರಜ್ಞಾ ಪದವಿಪೂರ್ವ ಕಾಲೇಜ್, ಅಂಚಾದ್ ಎನ್ನ ಪೂರ ಬಾಲ್ಯ ಜೀವನ, ಬಾಲ್ಯ ಶಿಕ್ಷಣ ಈ ತುಳುನಾಡ್ಡೇ. ಯಾನ್ ತುಳುನಾಡ್ದ ಅಪ್ಪೆನ ಮಗೆ. ಎಂಕುಲು ಮಾತೆರ್ಲಾ ಒಂಜೇ ದೆವೆರೆನ ಜೋಕುಲು, ತೂಲೆ ನಿಕ್ಲೆನ ಧರ್ಮ ಒವ್ಲಾ ಆವು, ಆಂಡ ಈ ಭಾಷೆ, ಈ ಸಂಸ್ಕೃತಿ, ನಮ್ಮ ಸಹಮಿಲನ, ಸಹಬಾಳ್ವೆ ಐಕ್ ಧರ್ಮ ಇಜ್ಜಿ, ಪ್ರೀತಿಗ್ ಧರ್ಮ ಇಜ್ಜಿ. ಇತ್ತೆ ನಡತೊಂದುಪ್ಪುನ ದೀಕ್ಷೆಲಾ ಪ್ರೀತಿಡ್ ಭಗವಂತನ ಸೇವೆ ಮಲ್ಪುನ ದೀಕ್ಷೆ, ಮಾತೆರ್ಲಾ ದೇವೆರನ ಜೋಕುಲು ಪನ್ದ್ ಲೆಪ್ಪುನ ಆದೇಶ. ಅಂಚಾದುಪ್ಪುನಗ ಶಾಂತಿ, ಸೌಹಾರ್ದ ಸಹಬಾಳ್ವೆ ಉಂದು ಮಾತಾ ಇತ್ತ್ಂಡ ನಮ್ಮ ಜೀವನ ಏತ್ ಪೊರ್ಲು” ಪನ್ದ್ ಪನ್ಡೆರ್.
ಬೊಕ್ಕ ರಾಜಕಾರಣಿ ಬೊಕ್ಕ ದಾರ್ಮಿಕ ಮುಖಂಡೆರೆನ್ ಉದ್ದೇಶಿತ್ದ್, ಏರೆನ ಕಣ್ಣ್ಡ್ಲಾ ಕಣ್ಣನೀರ್ ಬರಂದಿಲೆಕ, ಏರೆನ ಉಡಲ್ಡ್ಲಾ ದಾಲ ಉಪ್ಪಂದೆ, ಬಡವುದಾಂತಿಲೆಕ ದೇವೆರ್ ಆಶೀರ್ವಾದ ಕೊರ್ತೆರ್, ನಮ ಮಾತಾ ಎಡ್ಡೆಡ್ ಒರಿಯಗೊರಿ ತಾಂಗ್ ಕೊರೊಂದು ಮೋನೆಡ್ ತೆಲಿಕೆ ದಿಂಜಾವೊಂದು ಕರಿಪುನ ಜೀವನೊರ್ದು ಮಲ್ಲ ಆಶೀರ್ವಾದ ಉಂಡಾ. ಜಾತಿ ಧರ್ಮ ಇಪ್ಪಡ್ ಆಂಡ ಮನುಷ್ಯತ್ವ ಅವೆರ್ದ್ ಮಿತ್ತ್ ಇಪ್ಪಡ್ ಪನ್ದ್ ಪನ್ಡೆರ್.