ಸರ್ಬತ್ತ್ – ಕುವಿಕು ಕಣ್ವತೀರ್ಥ

Last updated on April 21st, 2026 at 05:47 pm

ಸರ್ಬತ್ತ್ ಸರ್ಬತ್ತ್
ರಂಗ್ ರಂಗ್‌ದ ಸರ್ಬತ್ತ್,
ಜಾತ್ರೆದ ಸಂತೆಡ್ ಪೇಂಟೆದ ಸಂದ್‌ಡ್
ಓಲು ತೂಂಡಲಾ ಸರ್ಬತ್ತ್

ಗಣ ಗಣ ಗಂಟೆದ ಗಾಡಿಡ್ ತಿಕ್ಕುಂಡು
ಕಾರದ ಸೋಡಾ ಸರ್ಬತ್ತ್
ಅಂಗಡಿದುಲಯಿ ಚಿಮ ಚಿಮ ಡಬ್ಬೆಡ್
ಲೋಟೆಡ್ ಬೊಂಡ ಸರ್ಬತ್ತ್

ಸಾಯ್ಬೆರೆನಂಗಡಿ ಕುಪ್ಪಿದ ಗ್ಲಾಸ್‌ಡ್
ಕಸ್ ಕಸ್ ಪಾಡಿನ ಸರ್ಬತ್ತ್
ಜೊಗ್ಯಣ್ಣಂಗಡಿಡ್ ಲೋಟೆಡ್ ಕೊರ್ಪೆರ್
ಪುನಾರ ಪುಳಿತ ಸರ್ಬತ್ತ್

ಮಿತ್ತ ಇಲ್ಲದ ಆಂಟಿ ಮಲ್ಪುನ
ಟೊಮೇಟ ಪುರುಂಚಿನ ಸರ್ಬತ್ತ್
ತಿರ್ತ್ ಬೀದಿದ ಬಾಯ್ಯಮ್ಮ ಕೊರ್ಪೆರ್
ಲಿಂಬೆದ ಪುಳಿತ ಸರ್ಬತ್ತ್

ಮೋಲ್‌ದ ಉಲಯಿ ಕನ್ನಟಿ ಪೆಟಿಗೆಡ್
ರಟ್ಟ್‌ದ ಪಕೆಟ್‌ಡ್ ಸರ್ಬತ್ತ್
ಸಾದಿದ ಬರಿತ ತಟ್ಟಿದ ಗೂಡುಡು
ಪ್ಲಾಸ್ಟಿಕ್ ತೊಟ್ಟೆಡ್ ಸರ್ಬತ್ತ್

ದೊಂಬುದ ಪೆಟ್ಟ್‌ಗ್ ಸಿಕೆತ ಗಾವುಗು
ಪರೊಡು ಸಂಪುದ ಸರ್ಬತ್ತ್
ಬೆಗರ್‌ನ್ ಜಪುಡುದು ಸೋತಿನ ಜೂವಗ್
ಸರ್ಬತ್ತ್ ಕೊರ್ಪುಂಡು ತಾಕತ್ತ್
………
ಕುವಿಕು