Last updated on April 20th, 2026 at 11:22 am
ಒಡಿಪು, ಏ. 20 : ರಾಂಗ್ ಸೈಡ್ಡ್ ಬತ್ತಿನ ಒಂಜಿ ಸ್ಕೂಟಿ ಗೂಡ್ಸ್ ಗಾಡಿಗ್ ಎಡ್ತ್ದ್, ಸ್ಕೂಟಿ ಬುಡೊಂದಿತ್ತಿನಾರ್ ತೀರ್ದಿನ ನಡಕೆ ಒಡಿಪು-ಕುಡ್ಲ ರಾಷ್ಟ್ರೀಯ ಪೆರ್ಸಾದಿದ ಎರ್ಮಾಳ್ ನಾರಾಳ್ತಾಯ ಗುಂಡೊದ ಕೈತಲ್ ಐತಾರ ಬಯ್ಯಡ್ ನಡತ್ದ್ಂಡ್.
ತೀರ್ದಿನಾರೆನ್ ಅದಮಾರ್ ಕೈತಲ್ದ ವಕೀಲೆರ ತೋಟೊದ ನಿವಾಸಿ ಗುರುರಾಜ ರಾವ್ (63) ಪನ್ದ್ ಗುರ್ತ ಪತ್ತ್ದೆರ್. ಮೇರ್ ಬೊಡೆದಿ ಬೊಕ್ಕ ಮಗಲೆನ್ ಅಗತ್ದೆರ್.
ಕುಡ್ಲ ಮೂಲೊದ ಗೂಡ್ಸ್ ಗಾಡಿ ಡ್ರೈವರ್ ವಿಜಯ್ ಕಾಮತ್ರೆಗ್ ಎಡ್ತೆಡ್ ಗಾತಿದ ಗಡಿಕುಲಾದಿತ್ತ್ದ್, ಆರೆನ್ ಒಡಿಪುದ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ದೆರ್. ವಿಜಯ್ರೆನ ತರೆಕ್ ಗಾತಿದ ಪೆಟ್ಟ್ ಬೂರ್ದಿತ್ತ್ದ್, ಬೊಂಡುದ ಭಾಗ ಪಿದಯಿ ಬತ್ತಿತ್ತ್ಂಡ್ಗೆ. ಆತೇ ಅತ್ತಂದೆ, ಆರೆನ ಒಂಜಿ ಕೈ ಅಲಕ್ಕ ಪೊಡಿ ಆದಿತ್ತ್ದ್, ರಡ್ಡ್ ಮೂಜಿ ಪೂಲಾದ್ ಬೂರ್ದಿನ ಬೊಕ್ಕ ತೆರಿದ್ ಬೈದ್ಂಡ್ ಪನ್ದ್ ತೂಯಿನಕುಲು ಪನ್ತೆರ್.
ಎಡ್ತೆದ ಬರಸ್ಗ್ ಗೂಡ್ಸ್ ಗಾಡಿ ಸಾದಿದ ಬರಿಟ್ ಕಬ್ಬೆ ಬೂರ್ದ್ಂಡ್. ಕೈತಲ್ ಇತ್ತಿನಕುಲು ಗಾಡಿನ್ ದೇರ್ತಿಬೊಕ್ಕನೇ ಡ್ರೈವರ್ ಮತಿತತ್ತಿನ ಸ್ಥಿತಿಟ್ ಉಲಯಿ ತಿಕೊಂದಿನ ತೋಜಿದ್ ಬೈದ್ಂಡ್. ಇಂಚಿರ್ದ್ ಸ್ಕೂಟರ್ ಬುಡೊಂದಿತ್ತಿನ ಗುರುರಾಜ ರಾವ್ ಮೆರೆನ ಸರ್ರೊ ಎಡ್ತೆದ ಪೊರ್ತುಡು ಒಂತೆ ದೂರೊಗು ರಟ್ಟ್ದ್ಂಡ್.
ಪಡ್ಡೆದ್ರ ಪೊಲೀಸ್ ಉಪನಿರೀಕ್ಷಕೆ ಅನಿಲ್ ಕುಮಾರ್ (ಅಪರಾಧ ವಿಭಾಗ) ಬೊಕ್ಕ ಆರೆನ ಕೂಟ ಜಾಗೆಗ್ ಬತ್ತ್ದ್, ಸಾರ್ವಜನಿಕೆರೆ ಸಕಾಯೊಡು ಗಡಿಕುಲಾತಿನಾರೆನ್ ಆಸ್ಪತ್ರೆಗ್ ಲೆತೊಂದು ಪೋಪಿನ ವ್ಯವಸ್ಥೆ ಮಲ್ತ್ದೆರ್.
ತೀರ್ದಿನಾರೆನ ಪುನೊನು ಒಡಿಪುದ ಅಜ್ಜೆರೆಕಾಡ್ ಸರ್ಕಾರಿ ಆಸ್ಪತ್ರೆದ ಶವಾಗಾರೊಡು ದೀತೆರ್.