Last updated on April 18th, 2026 at 08:31 am
ಮುಂಬೈ, ಎ. 18: ಬಾಲಿವುಡ್ದ ಪುಗರ್ತೆದ ಆ್ಯಕ್ಷನ್ ಡೈರೆಕ್ಟರ್ ರೋಹಿತ್ ಶೆಟ್ಟಿ ಮೆರೆನ ಮುಂಬೈದ ಇಲ್ಲದ ಮಿತ್ತ್ ನಡತಿತ್ತಿನ ಗುಂಡುದ ದಾಳಿ ಪ್ರಕರಣೊಗು ಸಂಬಂಧಿತ್ದ್ ಮಹತ್ವೊದ ಬುಲೆಚ್ಚಿಲ್ ನಡತ್ದ್ಂಡ್. ಉತ್ತರ ಪ್ರದೇಶೊದ ವಿಶೇಷ ಕಾರ್ಯಪಡೆ (STF) ಬೊಕ್ಕ ಮುಂಬೈ ಕ್ರೈಂ ಬ್ರಾಂಚ್ ಮಲ್ದಿನ ಜಂಟಿ ಕಾರ್ಯಾಚರಣೆಡ್ ಪ್ರಕರಣೊದ ಪ್ರಮುಖ ಆರೋಪಿನ್ ಉತ್ತರ ಪ್ರದೇಶೊದ ಆಗ್ರಾಡ್ ಗುರುವಾರ ಕೈದ್ ಮಲ್ತ್ದ್ಂಡ್.
ಆಗ್ರಾದ ಅಶೋಕ್ ನಗರ ನಿವಾಸಿ ಪ್ರದೀಪ್ ಕುಮಾರ್ ಕೈದಾತಿನ ಆರೋಪಿ. ಕರಿನ ಫೆಬ್ರವರಿ 1 ತಾನಿ ಮುಂಬೈದ ಜುಹು ಉಪನಗರೊಡುಪ್ಪುನ ರೋಹಿತ್ ಶೆಟ್ಟಿ ಮೆರೆನ ‘ಶೆಟ್ಟಿ ಟವರ್’ ನಿವಾಸೊದ ಮಿತ್ತ್ ಕೆಂಗುಡೆರ್ ಗುಂಡುದ ದಾಳಿ ಮಲ್ತಿತ್ತೆರ್. ಟೂವೀಲರ್ ಗಾಡಿಡ್ ಬತ್ತಿತ್ತಿನ ಕೆಂಗುಡೆರ್ ಮಲ್ದಿನ ಫೈರಿಂಗ್ರ್ದಾವರ ಶೆಟ್ಟಿ ಮೆರೆನ ಇಲ್ಲದ ಬಾಲ್ಕನಿದ ಗ್ಲಾಸ್ಲ್ ಪೊಡಿ ಆದಿತ್ತ. ಚಿತ್ರರಂಗೊಡು ಪೋಡಿಗೆದ ವಾತಾವರಣ ಉಂಡುಮಲ್ತ್ದ್, ಸೆಲೆಬ್ರಿಟಿಲೆರ್ದ್ ಮಲ್ಲ ಅಮೌಂಟ್ದ ಕಾಸ್ ಪೀಂಕಾವುನ ಉದ್ದೇಶೊಡು ಕುಖ್ಯಾತ ಶುಭಂ ಲೋಂಕರ್ ಗ್ಯಾಂಗ್ ಈ ಪ್ಲಾನ್ ಮಲ್ತ್ದೆರ್ ಪನ್ದ್ ಪೊಲೀಸೆರ್ ಪ್ರಾಥಮಿಕ ವಿಚಾರಣೆಡ್ ಬಾಯಿ ಬುಡ್ಪಾದೆರ್.
ಕೈದಾತಿನ ಆರೋಪಿ ಪ್ರದೀಪ್ ಕುಮಾರ್, ಆಯೆ ಫೇಸ್ಬುಕ್ ಬೊಕ್ಕ ಇನ್ಸ್ಟಾಗ್ರಾಮ್ದಂಚಿನ ಸಾಮಾಜಿಕ ಬಲೆತ್ತಾನೊದ ಮುಕೇನ ಗ್ಯಾಂಗ್ದ ಸಂಪರ್ಕೊಗು ಬೈದಿನೆನ್ ಒತ್ತೊಂದೆ. ಭೂಗತ ಲೋಕೊನು ತನ್ನ ಪ್ರಾಬಲ್ಯೊಡು ದೀವೊನುನ ತೊಡು ಇತ್ತಿನ ಉಂಬ್ಯೆ, ಸನ್ನಿ, ದೀಪು ಬೊಕ್ಕ ಸೋನು ಪನ್ಪಿನ ಸಹಚರೆರೆನ ಒಟ್ಟುಗು ಕೂಡೊಂದು ಈ ಕೃತ್ಯ ಮಲ್ತ್ದೆ ಪನ್ದ್ ತೆರಿಪಾದೆ. ಈ ಪ್ರಕರಣೊಗು ಸಂಬಂಧಿತ್ದ್ ಪೊಲೀಸೆರ್ ಇದಮುಟ್ಟ ಪ್ರದೀಪ್ ಶರ್ಮಾ ಅಲಿಯಾಸ್ ಗೋಲು, ದೀಪಕ್ ಬೊಕ್ಕ ವಿಷ್ಣು ಕುಶ್ವಾಹ ಸೇರ್ದ್ ಒಟ್ಟು ಒರ್ಮ್ಬ ಜನನ್ ಅರೆಸ್ಟ್ ಮಲ್ತ್ದೆರ್. ಕೈದಾತಿನಕಲೆನ ಮಿತ್ತ್ ಭಾರತೀಯ ನ್ಯಾಯ ಸಂಹಿತೆ, ಶಸ್ತ್ರಾಸ್ತ್ರ ಕಾಯ್ದೆ ಬೊಕ್ಕ ಮಹಾರಾಷ್ಟ್ರ ಸಂಘಟಿತ ಅಪರಾಧ ನಿಯಂತ್ರಣ ಕಾಯ್ದೆ (MCOCA) ದ ಅಡಿಟ್ ಕಠಿಣ ಪ್ರಕರಣೊಲೆನ್ ದಾಕಲ್ತೊಂದೆರ್. ದಾಳಿರ್ದ್ ಬೊಕ್ಕ ರೋಹಿತ್ ಶೆಟ್ಟಿಗ್ ಮುಂಬೈ ಪೊಲೀಸೆರ್ ವೈ-ಪ್ಲಸ್ ಕೆಟಗರಿದ ಭದ್ರತೆ ಕೊರ್ದಿತ್ತೆರ್.