Last updated on April 11th, 2026 at 10:29 am
ಬಂಟ್ವಾಳ, ಏಪ್ರಿಲ್ 11: ಗರ್ದ್ದ ಮದ್ರೆಂಗಿದ ಲೇಸ್ ಒಂಜಿ, ಕಣ್ಣ್ ಮುಚ್ಚಿದ್ ಬುಲವೊಡಾಂಡ ಶೋಕಸಾಗರ ಆದ್ ಪೋತಿನ ನಡಕೆ ಬಂಟ್ವಾಳ ತಾಲೂಕ್ದ ನರಿಕೊಂಬು ಗ್ರಾಮೊದ ನಾಯಿಲ ಪನ್ಪಿನಲ್ಪ ಏಪ್ರಿಲ್ 10 ತಾನಿ ರಾತ್ರೆ ನಡತ್ದ್ಂಡ್. ಲೇಸ್ದ ಎಮ್ಸಿ ಮಲ್ತೊಂದುಪ್ಪುನಗ ಜವನೆ ನಿರೂಪಕೆ ಒರಿ ಮಿತ್ತರ್ಮೆಡೇ ಕುಸ್ಕ್ದ್ ಬೂರ್ದ್ ತೀರ್ದೆರ್.
ಫರಂಗಿಪೇಟೆ ಅಬ್ಬೆಟ್ಟು ನಿವಾಸಿ ಅಶ್ವಿತ್ (32) ತೀರ್ದಿನಾರ್. ಮೇರ್ ಎಡ್ಡೆ ನಿರೂಪಕೆ ಆದ್ ನೆಟೆ ಪುದರ್ ಪೋತಿನಾರ್. ನಾಯಿಲಡ್ ತನ್ನ ಸಂಬಂಧಿಕೆರೆ ಇಲ್ಲದ ಮದ್ರೆಂಗಿ ಲೇಸ್ಡ್ ಅಶ್ವಿತ್ ಮೆರೆಗ್ ನಿರೂಪಣೆದ ಜಬದರಿ ಕೊರ್ದಿತ್ತೆರ್. ಆ ಪ್ರಕಾರ ಶುಕ್ರವಾರ ರಾತ್ರೆ (ಏಪ್ರಿಲ್ 10) ಆರ್ ಬಾರೀ ಉಮೇದ್ಡ್ ಮಿತ್ತರ್ಮೆ ಏರ್ದ್ ಲೇಸ್ ಸುರು ಮಲ್ತೊಂದಿತ್ತೆರ್. ಆಂಡ, ಪಾತೆರ ಸುರು ಮಲ್ತಿನ ಒಂತೆ ಪೊರ್ತುಡೇ ಆರ್ ಉಸಾರ್ ತತ್ತ್ದ್ ಒರರ್ದ್ ಒರಾನೆ ಮಿತ್ತರ್ಮೆಡೇ ಕುಸ್ಕ್ದ್ ಬೂರ್ದೆರ್.
ಅಶ್ವಿತ್ ಕುಸ್ಕ್ದ್ ಬೂರಿನೇ ಅಲ್ಪ ಇತ್ತಿನ ಸಂಬಂಧಿಕೆರ್ ಬೊಕ್ಕ ಸಾರ್ವಜನಿಕೆರ್ ಅಪಗನೇ ಆರೆನ್ ತುಂಬೆದ ಪ್ರೈವೇಟ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಂಡ ಪರೀಕ್ಷೆ ಮಲ್ತಿನ ಡಾಕ್ಟರ್, ಆರ್ ಆಸ್ಪತ್ರೆಗ್ ಎತ್ತ್ನಗನೇ ತೀರ್ದಿತ್ತೆರ್ ಪನ್ದ್ ಘೋಷಣೆ ಮಲ್ತ್ದೆರ್. ಹಾರ್ಟ್ ಅಟ್ಯಾಕ್ ಆದ್ ತೀರ್ದೆರ್ ಪನ್ದ್ ಪನೊಂದುಲ್ಲೆರ್.