Last updated on April 11th, 2026 at 01:00 pm
ಕಾರ್ಲ, ಏ. 10: ಕಾರ್ಲ ಪುರಸಭೆಟ್ ಮಾಹಿತಿ ಹಕ್ಕು ಅಧಿಕಾರಿ ಏನ್ ಕೇನ್ದಿನ ದಾಕಲೆಲೆನ್ ಕೊರಂದೆ ತಿರ್ಗಾವೊಂದುಲ್ಲೆರ್, ಒಲವು ಕೇನ್ಡ ಪತ್ತ ಒಲವು ಕೊರಂದೆ ಆರೇ ಮಿತ್ತಬಿನ್ನಪು ಸಂದಾದ್ ಮಲ್ಲಜನತ ಲೆಕ ಸದು ಕೊರ್ಪೆರ್ ಪನ್ದ್ ಆರೋಪ ಮಲ್ತ್ದ್ ಮಾಹಿತಿ ಹಕ್ಕು ಅಧಿಕಾರಿನ ವಿರುದ್ಧ ಮಾಜಿ ಪದುಕೆರ್ ಸುನೀಲ್ ಕೋಟ್ಯಾನ್ ಪುರಸಭೆ ಕಛೇರಿದ ಉಲಯಿ ಮಾಹಿತಿ ಹಕ್ಕು ಅಧಿಕಾರಿನ ಟೇಬಲ್ದ ಎದುರು ಕುಲೊಂದು ಪೊರ್ಮ್ಬಾಟ ಮಲ್ತಿನ ನಡಕೆ ನಡತ್ದ್ಂಡ್.
ಕಾರ್ಲ ಪುರಸಭೆ ಸೀಮೆದ ಕುಂಟಲ್ಪಾಡಿ ಅಂಬಾಭವಾನಿ ದೇವಸ್ಥಾನದ ಸಾದಿಗ್ ಪುರಸಭೆದ ಕಡೆರ್ದ್ 2011 – 2012 ನೇ ಸಾಲ್ಡ್ ಡಾಮಾರ್ ಪಾಡ್ದಿತ್ತೆರ್. ಬೊಕ್ಕ ಕುಡ ಅವ್ವೇ ಸಾದಿಗ್ ಪಿರ ಡಾಮಾರ್ ಪಾಡ್ದೆರ್. ಆಂಡ ಈ ಸಾದಿನ್ ಬೊಕ್ಕ ದೇವಸ್ಥಾನೊಗು ಪೋಪುನ ಸಾದಿನ್ ಉದ್ಯಮಿ ಒರಿ ಲೇಔಟ್ ಮಲ್ತ್ದ್ ಮುಚ್ಚಿದ್ ಪಾಡ್ದೆರ್. ಅಧಿಕಾರಿಲು ಉದ್ಯಮಿಲೆಗ್ ಸಕಾಯ ಮಲ್ತೊಂದಿತ್ತ್ದ್, ಪುರಸಭೆ ಅಧಿಕಾರಿಲು ಸಾದಿದ ಬೇಲೆನೇ ಮಲ್ಪಾದಿಜೆರ್ ಪನ್ದ್ ಆರೋಪ ಮಲ್ತಿತ್ತ್ದ್, ಒಲವು ಕೊರೊಂದಿಜ್ಜೆರ್, ಕೇನ್ಡ ಮಿತ್ತಬಿನ್ನಪು ಸಂದಾಲೆ ಪನ್ದ್ ಮಾಹಿತಿ ಹಕ್ಕು ಅಧಿಕಾರಿ ಬೋಡಾ ಬೋರ್ಚಾನ್ದ್ ಸದು ಕೊರ್ಪೆರ್ ಪನ್ದ್ ಸುನಿಲ್ ಕೋಟ್ಯಾನ್ ಆರೋಪ ಮಲ್ತ್ದ್ ಎಂಕ್ ನ್ಯಾಯ ತಿಕ್ಕನಮುಟ್ಟ ಪೊರ್ಮ್ಬಾಟ ಮಲ್ಪುವೆ ಪನ್ದ್ ಪನ್ತೆರ್.