Last updated on May 9th, 2026 at 08:12 am
ಬೆಂಗಳೂರ್, ಮೇ 8: ಸಿಲಿಕಾನ್ ಸಿಟಿ ಬೆಂಗಳೂರ್ಡ್ ಪೊಣ್ಣುಪೊಂಜೊವುಲೆನ ಸುರಕ್ಷತೆಗ್ ಪೊಲೀಸ್ ಇಲಾಖೆ ಪಾಕ ಕ್ರಮೊಕುಲೆನ್ ಗೆತೊನೊಂದಿತ್ತ್ಂಡಲಾ, ಸಮಸ್ಯೆಗ್ ಪಿರಿಕಟ್ಟ್ ತಿಕ್ಕುನ ಲಕ್ಷಣ ತೋಜೊಂದಿಜ್ಜಿ. ಪೊಂಜೊವುಲೆನ ವಿರುದ್ಧೊದ ಅಪರಾಧ ಪ್ರಕರಣೊಲೆಡ್ ಬೆಂಗಳೂರ್ ಇನಿಕ್ಲಾ ದೇಶೊದ ಕಡೀರ ಮೂಜಿ ತಾನೊಡೇ ಉಂಡು. ಎನ್ಸಿಆರ್ಬಿ (NCRB) ಬುಡುಗಡೆ ಮಲ್ದಿನ 2024ತ ವರದಿದ ಪ್ರಕಾರ, ದೇಶೊದ 19 ಮಲ್ಲ ಮೆಟ್ರೋಪಾಲಿಟನ್ ನಗರೊಲೆಡ್ ಪೊಂಜೊವುಲೆನ ವಿರುದ್ಧೊದ ಅಪರಾಧ ಪ್ರಕರಣೊಡು ದೆಲ್ಲಿ ಬೊಕ್ಕ ಮುಂಬೈ ಸುರುತ ರಡ್ಡ್ ಜಾಗೆಡ್ ಉಂಡು. ಬೊಕ್ಕದ ಜಾಗೆಡ್ ಬೆಂಗಳೂರ್ ಉಂಡು.
ಮುಖ್ಯಾಂಶೊಲು
- 2024ರ್ ಬೆಂಗಳೂರ್ಡ್ ದಾಕಲಾತಿನ ಒಟ್ಟು ಮಹಿಳಾ ದೌರ್ಜನ್ಯ ಪ್ರಕರಣೊಲು 4,748.
- ಪೊಂಜೊವುಲೆನ ಮಾನಭಂಗ ಮಲ್ಪೆರ ತೂತಿನ ಪ್ರಕರಣೊಲೆಡ್ ಬೆಂಗಳೂರ್ಗ ದೇಶೊಡೇ ಕಡೀರ ತಾನ.
- ಬದಿತ ಸಾವು ಪ್ರಕರಣೊಲೆಡ್ ಜೈಪುರದ ಒಟ್ಟುಗು ಬೆಂಗಳೂರು ದೇಶೊಡು 4ನೇ ತಾನೊಡು ಉಂಡು.
2023ತ ಲೆಕ್ಕೊದೊಟ್ಟುಗು ತೂನ್ಡ ಪೊಂಜೊವುಲೆನ ವಿರುದ್ಧೊದ ಒಟ್ಟು ಅಪರಾಧ ಪ್ರಕರಣೊಲೇನ ಸಂಖ್ಯೆ ಒಂತೆ ಜತ್ತ್ದಿತ್ತ್ಂಡಲಾ, ಪೊಂಜೊವುಲೆನ ಮಿತ್ತ್ ಆಪಿನ ದೌರ್ಜನ್ಯೊಲೆನ ತೀವ್ರತೆ ಮಾತ್ರ ಕಮ್ಮಿ ಆತಿಲೆಕ ತೋಜುಜಿ ಪನ್ದ್ ವರದಿ ರ್ದ್ ತೆರಿದ್ ಬೈದ್ಂಡ್.
ಅಪರಾಧ ಪ್ರಕರಣೊಲೆನ ಅಂಕಿ-ಅಂಶ
ವರದಿದ ಪ್ರಕಾರ, ಬೆಂಗಳೂರ್ಡ್ ಅತ್ಯಾಚಾರ ಪ್ರಕರಣೊಲೆನ ಸಂಖ್ಯೆಡ್ ಮಲ್ಲ ಎಚ್ಚಿಕಮ್ಮಿ ಆತಿಜಿ. 2023 ಟ್ 169 ಪ್ರಕರಣೊಲು ಇತ್ತಂಡ, 2024 ಟ್ 168 ಪ್ರಕರಣೊಲು ದಾಕಲಾತ. ಲೈಂಗಿಕ ಕಿರುಕುಳದ ಪ್ರಕರಣೊಲು ಕರಿನ ವರ್ಸೊರ್ದು 30 ಕಮ್ಮಿ ಆದಿತ್ತ್ದ್, ಒಟ್ಟು 180 ಪ್ರಕರಣೊಲು ವರದಿ ಆತ. ಆಂಡ, ಪೊಂಜೊವುಲೆನ ಮಾನಭಂಗ ಮಲ್ಪೆರ ತೂತಿನ ಕ್ರಿಮಿನಲ್ ದೌರ್ಜನ್ಯೊದ 66 ಪ್ರಕರಣ ದಾಕಲಾತ.