Last updated on May 20th, 2026 at 10:43 am
ಮೇ. 20: ಎಚ್ಚಾದ್ ಇಸ್ಲಾಮಿಕ್ ಸಂಸ್ಕೃತಿ ಅತ್ತ್ಂಡ ಮುಸ್ಲಿಂ ಜನಸಂಖ್ಯೆದ ಬಗೆಟ್ ಜಾಗತಿಕ ಮಟ್ಟೊಡು ಚರ್ಚೆ ಆನಗ, ಪಾಕಿಸ್ತಾನ, ಬಾಂಗ್ಲಾದೇಶ ಅತ್ತ್ಂಡ ಮಧ್ಯಪ್ರಾಚ್ಯ (ಗಲ್ಫ್) ದೇಶೊಲೆನ ಪುದರ್ ಮಿತ್ತ್ ಬರ್ಪುಂಡು. ಆಂಡ ಜಾಗತಿಕ ಅಂಕಿ-ಅಂಶೊಲು ಒಂಜಿ ರೋಚಕ ಸತ್ಯೊನು ಪಿದಯಿ ಕನತ್ದ. ವಿಶ್ವೊಡೇ ಮಾತೆರ್ದ್ ಎಚ್ಚ ಪಲ್ಲಿಲು ಇಪ್ಪುನ ದೇಶೊಲೆನ ಪಟ್ಟಿಡ್ ಭಾರತ ರಡ್ಡನೇ ಸ್ಥಾನೊಡು ಉಂಡು. ಸೋದ್ಯದ ವಿಷಯ ದಾದ ಪನ್ಡ, ಮುಸ್ಲಿಂ ಬಹುಸಂಖ್ಯಾತ ನೆರೆಕರೆತ ದೇಶೊಲಾಯಿನ ಪಾಕಿಸ್ತಾನ ಬೊಕ್ಕ ಬಾಂಗ್ಲಾದೇಶೊರ್ದುಲಾ ಭಾರತ ಈ ಪಟ್ಟಿಡ್ ಎದುರು ಉಂಡು.
ಜಾಗತಿಕ ಮಟ್ಟೊಡು ಇಂಡೋನೇಷ್ಯಾಗ್ ಕಡೀರ ತಾನ:
ಮಸೀದಿ ಮಾಹಿತಿ ಪೋರ್ಟಲ್ (Simas) ಪ್ರಕಾರ, ಲೋಕೊಡೇ ಮಾತೆರೆರ್ದ್ ಎಚ್ಚ ಮುಸ್ಲಿಂ ಜನಸಂಖ್ಯೆ ಇತ್ತಿನ ಇಂಡೋನೇಷ್ಯಾ, ಪಲ್ಲಿಲೆನ ಸಂಖ್ಯೆಡ್ಲಾ ಲೋಕೊಡೇ ಕಡೀರ ತಾನೊಡು ಉಂಡು. ಜುಲೈ 2025 ತ ಅಂಕಿ-ಅಂಶೊಲೆನ ಪ್ರಕಾರ ಸುಮಾರ್ 7,44,000 ಒಟ್ಟು ನೋಂದಾಯಿತ ಪಲ್ಲಿಲು ಉಲ್ಲ.
ರಡ್ಢನೇ ತಾನೊಡು ಭಾರತ:
ಭಾರತ ಮುಸ್ಲಿಂ ಬಹುಸಂಖ್ಯಾತ ರಾಷ್ಟ್ರ ಅತ್ತ್ಂಡಲಾ, ಮುಲ್ಪ 20 ಕೋಟಿರ್ದ್ಲಾ ಎಚ್ಚ ಮುಸ್ಲಿಂ ಧರ್ಮೀಯೆರ್ ಉಲ್ಲೆರ್. ಈ ಗಂತ್ದ ಸಾಂಸ್ಕೃತಿಕ ಪರಂಪರೆ ದೇಶೊದ ಧಾರ್ಮಿಕ ಮೂಲಸೌಕರ್ಯೊಲೆಡ್ ನೆಗತ್ ತೋಜಿದ್ ಬರ್ಪುಂಡು. ಭಾರತೊಡು ಸುಮಾರ್ 3,00,000 ಸಕ್ರಿಯ ಪಲ್ಲಿಲು ಉಲ್ಲ. ಭಾರತೊದ ಕೆಲ ಪಲ್ಲಿಲು ಐಕ್ಲೆನ ವೈವಿಧ್ಯಮಯ ವಾಸ್ತುಶಿಲ್ಪೊಗು ಪುದರಾದುಲ್ಲ. ನಮ್ಮ ತುಳುನಾಡ್ಡೇ ‘ಬೆಲಿಯ ಪಲ್ಲಿ’ ಪನ್ದ್ ಪುದರಾತಿನ ಬಂದರ್ದ ಜೀನತ್ ಬಕ್ಷ್ ಜುಮಾ ಪಲ್ಲಿ, ಕಾಸ್ರೋಡ್ ತಲಂಗರೆದ ಮಾಲಿಕ್ ದಿನಾರ್ ಜುಮಾ ಪಲ್ಲಿ ದೇಶೊಡೇ ಬಾರೀ ಪೊರ್ಲುದ ಪಲ್ಲಿಲೆನ ಪಟ್ಟಿಡ್ ಬರ್ಪುನವು.
ಪಾಕಿಸ್ತಾನ ಬೊಕ್ಕ ಬಾಂಗ್ಲಾದೇಶ ಭಾರತೊರ್ದು ಪಿರವು ಇಪ್ಪೆರ ನೆವನ ದಾದ?
ಅಧಿಕೃತವಾದ್ ಮುಸ್ಲಿಂ ರಾಷ್ಟ್ರಲಾದಿತ್ತ್ಂಡಲಾ, ಪಾಕಿಸ್ತಾನ ಬೊಕ್ಕ ಬಾಂಗ್ಲಾದೇಶೊಲೆನ ಒಟ್ಟು ಪಲ್ಲಿಲೆನ ಸಂಖ್ಯೆ ಭಾರತೊರ್ದು ಕಮ್ಮಿ ಉಂಡು. ಇಂದೆಕ್ ತಜ್ಞೆರ್ ಪ್ರಮುಖವಾದ್ ಮೂಜಿ ನೆವನೊಲೆನ್ ಕೊರ್ಪೆರ್.
- ವಿಶಾಲವಾಯಿನ ಭೌಗೋಳಿಕ ವಿಸ್ತೀರ್ಣ: ಭಾರತೊದ ನೇಲ್ಯ ಭೂಭಾಗ ಬಗೆಬಗೆತ ಪ್ರಾದೇಶಿಕ ಸಮುದಾಯೊಲೆಗ್ ಆಶ್ರಯ ಕೊರ್ತುಂಡು.
- ಮಾಮಲ್ಲ ಜನಸಂಖ್ಯೆ: ಭಾರತೊಡುಪ್ಪುನ ಮುಸ್ಲಿಂ ಜನಸಂಖ್ಯೆ ಜಾಗತಿಕವಾದ್ ಮಲ್ಲ ಜನಸಂಖ್ಯಾ ಕೂಟೊಲೆಡ್ ಒಂಜಿ.
- ಐತಿಹಾಸಿಕ ನಿರಂತರತೆ: ಶತಮಾನೊರ್ದು ಬೇತೆ ಬೇತೆ ಪೊರ್ತುಡು ಬೇತೆ ಬೇತೆ ರಾಜವಂಶೊಲು ಕಟ್ಟಾದಿನ ಸಾಂಸ್ಕೃತಿಕ ಬೊಕೂ ಧಾರ್ಮಿಕ ಕೇಂದ್ರೊಲು ಇನಿಕ್ಲಾ ಸಕ್ರಿಯ ಪ್ರಾರ್ಥನಾ ಮಂದಿರೊಲಾದ್ ಒರಿದ.