Last updated on May 31st, 2026 at 09:23 am
ದೆಲ್ಲಿ: ಪೆತ್ತಗ್ ‘ರಾಷ್ಟ್ರೀಯ ಪ್ರಾಣಿ’ ದ ಸ್ಥಾನಮಾನ ಕೊರ್ಪುನ ಅತ್ತ್ಂಡ ದೇಶೊಡೊರ್ಮೆ ಅಲಕ್ಕ ಗೋಹತ್ಯೆ ನಿಷೇಧ ಮಲ್ಪುನ ಬಗೆಟ್ ಪ್ರಸ್ತಾಪ ಇತ್ತೆಗ್ ಕೇಂದ್ರ ಸರ್ಕಾರೊದ ಪರಿಶೀಲನೆಡ್ ಇಜ್ಜಿ ಪನ್ದ್ ಕೇಂದ್ರ ಕಾನೂನು ಸಚಿವೆ ಅರ್ಜುನ್ ರಾಮ್ ಮೇಘವಾಲ್ ಸ್ಪಷ್ಟ ಮಲ್ತ್ದೆರ್. ಬೇತೆ ಬೇತೆ ಸಂಘಟನೆಲು ಬೊಕ್ಕ ಧಾರ್ಮಿಕ ಮುಖಂಡೆರೆರ್ದ್ ಈ ಬಗೆಟ್ ಬೆರಿಬೆರಿ ಕಾಯೆಸ್ಲು ಕೇನ್ದ್ ಬರೊಂದುಪ್ಪುನ ಬೆರಿಟೇ ಕೇಂದ್ರ ಸಚಿವೆರ್ ಈ ಮಹತ್ವೊದ ಪಾತೆರ ಪನ್ತೆರ್.
ಸುದ್ದಿಸಂಸ್ಥೆ ‘ಪಿಟಿಐ’ಗ್ ಕೊರ್ತಿನ ವಿಶೇಷ ಸಂದರ್ಶನೊಡು ಪಾತೆರ್ನ ಆರ್, ಈ ವಿಷಯೊದ ಬಗೆಟ್ ಇತ್ತೆಗ್ ಒವ್ವೇ ಪ್ರಸ್ತಾವನೆ ಕೇಂದ್ರ ಸಚಿವ ಸಂಪುಟೊದ (Cabinet) ಎದುರು ಇಜ್ಜಿ ಪನ್ದ್ ನ್ಡೆರ್.
“ಪೆತ್ತೊನು ರಾಷ್ಟ್ರೀಯ ಪ್ರಾಣಿಯಾದ್ ಘೋಷಣೆ ಮಲ್ಪೊಡು ಬೊಕ್ಕ ದೇಶೊಡೊರ್ಮೆ ಗೋಹತ್ಯೆ ನಿಷೇಧ ಮಲ್ಪೊಡು ಪನ್ದ್ ಕೇನ್ದ್ ಬೇತೆ ಬೇತೆ ಸಂಸ್ಥೆಲು ಬೊಕ್ಕ ಸಾರ್ವಜನಿಕೆರ್ ಸಂಸತ್ ಸದಸ್ಯೆರೆಗ್ ಅಂಚೆನೇ ಸರ್ಕಾರೊಗು ಅಪಗಪಗ ಬಿನ್ನಪು ಸಂದಾವೊಂದು ಬರೊಂದುಲ್ಲೆರ್. ಜನೊಕುಲು ಅಕಲೆನ ಭಾವನೆಲೆನ್ ಅರ್ಜಿಲೆನ ಮುಕೇನ ಪ್ರಾತಿನಿಧ್ಯ ಕೊರ್ಪುನವು ಸಾಮಾನ್ಯ” ಪನ್ದ್ ಸಚಿವೆರ್ ಒತ್ತೊಂಡೆರ್. ಆಂಡಲಾ, “ಇತ್ತೆಗ್ ಅಂಚಿನ ಒವ್ವೇ ವಿಷಯ ಸಂಪುಟೊದ ಅಜೆಂಡಾಡ್ ಇಜ್ಜಿ. ಒಲಾಂಡಲಾ ಈ ಪ್ರಸ್ತಾವನೆ ಸರ್ಕಾರ ನಡುಕು ಬರ್ಪುನ ನಿಲವುಗು ಎತ್ತ್ಂಡ, ಎಂಕ್ಲನೇ ಅಧಿಕೃತವಾದ್ ಒಲವು ಕೊರ್ಪ” ಪನ್ದ್ ಪನ್ಡೆರ್.
ಗೋಹತ್ಯೆ ನಿಷೇಧೊದ ಕಾನೂನುಲೆನ ಬಗೆಟ್ ಪಾತೆರ್ನ ಕಾನೂನು ಸಚಿವೆರ್, “ಭಾರತೊದ ಬೇತೆ ಬೇತೆ ರಾಜ್ಯೊಲು ಅಕ್ಲೆನನೇ ಆಯಿನ ಪ್ರಾದೇಶಿಕ ಸಂದರ್ಭೊಲು, ಇತಿಹಾಸ ಬೊಕ್ಕ ಅರ್ಹತೆಲೆನ ಆಧಾರೊಡು ಅಂಚಿನ ವಿಷಯೊಲೆನ ಬಗೆಟ್ ಸ್ವತಂತ್ರ ನಿರ್ಧಾರೊಲೆನ್ ಗೆತೊನುವೆರ್” ಪನ್ದ್ ಪನ್ಡೆರ್. ಇಂದೇ ಪೊರ್ತುಡು ಆರ್, ಪಶ್ಚಿಮ ಬಂಗಾಳ ಸರ್ಕಾರ ತನ್ನ 1950ದ ಪರ ರಾಜ್ಯ ಕಾನೂನುದಡಿಟ್ ಕೈಕಂಜಿಲೆನ್ ಕೆರ್ಪುನ ನಿಯಮೊಲೆನ್ ಇಂಚಿಪ ನನಲಾತ್ ಕಠಿಣ ಮಲ್ತ್ದ್ ಜಾರಿ ಮಲ್ದಿನೆನ್ ಉದಾರ್ಮೆ ಆದ್ ಉಲ್ಲೇಖ ಮಲ್ತೆರ್.
ವಿಶೇಷ ಪನ್ಡ, ದೇಶೊಡು ಗೋಹತ್ಯೆ ನಿಷೇಧ ಮಲ್ಪೊಡು ಪನ್ದ್ ಹಿಂದೂ ಸಂಘಟನೆಲು ಒತ್ತಾಯ ಮಲ್ತೊಂದಿತ್ತಿಲೆಕನೆ, ಇಂಚಿಪದ ದಿನೊಟು ಪ್ರಮುಖ ಮುಸ್ಲಿಂ ಸಂಘಟನೆಲು ಬೊಕ್ಕ ಧರ್ಮಗುರುಕುಲುಲಾ ಪೆತ್ತೊನು ರಾಷ್ಟ್ರೀಯ ಪ್ರಾಣಿ ಪನ್ದ್ ಘೋಷಣೆ ಮಲ್ಪೆರೆ ಮುಕ್ತ ಬೆರಿತಾಂಗ್ ಕೊರ್ತೆರ್.
ಮೌಲಾನಾ ಅರ್ಷದ್ ಮದನಿ (ಜಮಿಯತ್ ಉಲಮಾ-ಎ-ಹಿಂದ್ ಮುಖ್ಯಸ್ಥೆ): ಪೆತ್ತೊನು ರಾಷ್ಟ್ರೀಯ ಪ್ರಾಣಿ ಪನ್ದ್ ಘೋಷಣೆ ಮಲ್ಪುನೆರ್ದ್ ದೇಶೊಡು ಈ ವಿಷಯೊದ ಸುತ್ತ ಉಂಡಾವೊಂದುಪ್ಪುನ ಕೋಮು ಉದ್ವಿಗ್ನತೆನ್ ಶಾಶ್ವತವಾದ್ ಕಮ್ಮಿ ಮಲ್ಪೆರೆ ಸಕಾಯ ಆಪುಂಡು ಪನ್ದ್ ವಾದ ಮಲ್ತಿತ್ತೆರ್.
ಹಮೀದ್ ಅನ್ಸಾರಿ (ಮಾಜಿ ಉಪರಾಷ್ಟ್ರಪತಿ): ಪೆತ್ತೊಗು ರಾಷ್ಟ್ರೀಯ ಪ್ರಾಣಿ ಸ್ಥಾನಮಾನ ಕೊರ್ನ್ಡ ಗೋಹತ್ಯೆಗ್ ಸಂಬಂಧಿತಿನ ಪುನರಾವರ್ತಿತ ವಿವಾದೊಲೆಗ್ ಪಿರಿಕಟ್ಟ್ ಮಲ್ಪೆರೆ ಸಾಧ್ಯನಾ ಪನ್ದ್ ಸರ್ಕಾರ ತೂವೊಡು ಪನ್ದ್ ಪನ್ದಿತ್ತೆರ್. ಇಸ್ಲಾಂ ಧರ್ಮೊಡು ಒವ್ವೇ ನಿರ್ದಿಷ್ಟ ಪ್ರಾಣಿನ್ ಬಲಿ ಕೊರ್ಪುನೆನ್ ಕಡ್ಡಾಯ ಮಲ್ದಿಜೆರ್ ಪನ್ದ್ ಪನ್ದಿತ್ತಿನ ಇರ್, ಮುಸ್ಲಿಮೆರ್ ಗೋ ಬಲಿ ಕೊರ್ಪುನೆನ್ ಉಂತಾಯೆರ ಬಿನ್ನಪು ಮಲ್ತಿತ್ತೆರ್.
ಮೌಲಾನಾ ಖಾಲಿದ್ ರಶೀದ್ ಫರಂಗಿ ಮಹಾಲಿ (ಅಖಿಲ ಭಾರತ ಮುಸ್ಲಿಂ ವೈಯಕ್ತಿಕ ಕಾನೂನು ಮಂಡಳಿದ ಪೆರಿಯ ಸದಸ್ಯೆ): ಪೆತ್ತೊನು ರಾಷ್ಟ್ರೀಯ ಪ್ರಾಣಿಯಾದ್ ಮಲ್ತ್ಂಡ ಕೋಟಿಗಟ್ಲೆ ಹಿಂದೂಲೆನ ಧಾರ್ಮಿಕ ನಂಬೊಲಿಗೆ ಬೊಕ್ಕ ಸಾಂಸ್ಕೃತಿಕ ಭಾವನೆಲೆಗ್ ದೇಶ ಗೌರವ ಕೊರ್ಲೆಕ ಆಪುಂಡು ಪನ್ದ್ ಈ ಕಾಯೆಸ್ಗ್ ಅನುಮೋದನೆ ಕೊರ್ದಿತ್ತೆರ್.
ಬಕ್ರೀದ್ (ಈದ್-ಉಲ್-ಅಝಾ) ಪರ್ಬೊದ ಪೊರ್ತುಡು ಮುಸ್ಲಿಂ ನಾಯಕೆರೆರ್ದ್ ಇಂಚಿನ ಬೆರಿಬೆರಿ ಪಾತೆರೊಲು ಬೈದಿನೆರ್ದಾವರ ಈ ವಿಷಯ ರಾಷ್ಟ್ರಮಟ್ಟೊಡು ಭಾರೀ ಸಾರ್ವಜನಿಕ ಚರ್ಚೆಗ್ ಸಾದಿ ಆದಿತ್ತ್ಂಡ್. ಆಂಡ, ಇತ್ತೆಗ್ ಕೇಂದ್ರ ಸರ್ಕಾರ ಇಂಚಿನ ಒವ್ವೇ ಭಾವನಾತ್ಮಕ ಅತ್ತ್ಂಡ ದೇಶವ್ಯಾಪಿ ಕಾನೂನು ಜಾರಿ ಮಲ್ಪೆರ ತೂವೊಂದಿಜ್ಜಿ ಪನ್ಪಿನೆನ್ ಕಾನೂನು ಸಚಿವೆರ್ ಸ್ಪಷ್ಟ ಮಲ್ತ್ದೆರ್.