Last updated on May 18th, 2026 at 03:09 pm
ಬೆದ್ರ, ಮೇ 18: ಕಾರ್ಲ – ಬೆದ್ರ ರಾಷ್ಟ್ರೀಯ ಪೆರ್ಸಾದಿದ ಬನ್ನಡ್ಕ ಪನ್ಪಿನಲ್ಪ ಕಲ್ಲ್ ಕೊನೊವೊಂದಿತ್ತಿನ ಲಾರಿ ಒಂಜಿ ಡ್ರೈವರ್ನ ಅಂಕೆ ತತ್ತ್ದ್ ಸಾದಿಡೇ ಪಲ್ಟಿ ಆತಿನ ನಡಕೆ ಸೋಮವಾರ (ಮೇ 18) ನಡತ್ದ್ಂಡ್. ಬೂರ್ದಿನ ಬರಸ್ಗ್ ಲಾರಿಡ್ ಇತ್ತಿನ ಕೆಂಪು ಕಲ್ಲ್ಲ್ ರಾಷ್ಟ್ರೀಯ ಪೆರ್ಸಾದಿಡೊರ್ಮೆ ಬೂರ್ದ. ಅಂಚಾದ್ ಈ ಮಾರ್ಗೊಡು ಪೋಪುನಕುಲು ಒಂತೆ ಟೊರ್ತು ಬಾರೀ ಬಂಙ ಬರೊಡಾದ್ ಬತ್ತ್ಂಡ್.
ಎಚ್ಚ ಆಂಡ್ ಸಾರ್ವಜನಿಕೆರೆ ಆಕ್ರೋಶ: ಕರಿನ ಕೆಲ ದಿನೊರ್ದಿಂಚಿ ಬನ್ನಡ್ಕದ ಈ ಜಾಗೆಡ್ ಬೆರಿಬೆರಿ ಅಪಘಾತೊಲು ಆವೊಂದೇ ಉಲ್ಲ. ಈ ಸಾದಿ ಅಕ್ಷರಶಃ ‘ಡೆತ್ ಝೋನ್’ ಆವೊಂದಿತ್ತ್ಂಡಲಾ ಸಂಬಂಧಿತಿನ ಅಧಿಕಾರಿಲಾವಡ್ ಅತ್ತ್ಂಡ ರಾಷ್ಟ್ರೀಯ ಪೆರ್ಸಾದಿ ಪ್ರಾಧಿಕಾರ ಆವಡ್ ಒವ್ವೇ ಬೋಡಾಪಿನ ಕ್ರಮ ಗೆತೊಂದಿಜಿ ಪನ್ದ್ ಮುಲ್ಪದಕುಲು ಬಾರೀ ಆಕ್ರೋಶ ತೂಪಾದೆರ್. ದುಂಬು ಈ ಉಂಬರೊದಿಂಜಿನ ತಿರ್ಗೆಲ್ಲೆನ ಬಗೆಟ್ ಅಂಚೆನೇ ತಾಂತ್ರಿಕ ದೋಷೊಲೆನ ಬಗೆಟ್ ಮುಲ್ಪದ ಶಾಸಕೆರ್ ಬೊಕ್ಕ ಸಂಸದೆರೆ ಗುಮನೊಗು ಕನತ್ದ್ ರೋಡ್ ರಿಪೇರಿಗ್ ಆಗ್ರಹ ಮಲ್ತಿತ್ತೆರ್. ಆಂಡಲಾ ದಾಲ ಪ್ರೇಜನ ಆತಿಜಿ. ನನ ಆಂಡಲಾ ಜನಪ್ರತಿನಿಧಿಲು ಬೊಕ್ಕ ಅಧಿಕಾರಿಲು ಈ ಸಾದಿದ ದೋಷೊಲೆನ್ ಸಮ ಮಲ್ತ್ದ್, ಬೋಡಾಪಿನ ದುಂಬೆಚ್ಚರ್ಗೆದ ಪಲವೆಲೆನ್ ಪಾಡೊಡು ಪನ್ದ್ ಸಾರ್ವಜನಿಕೆರ್ ಒತ್ತಾಯ ಮಲ್ತ್ದೆರ್.