Last updated on May 18th, 2026 at 04:45 pm
ಬದಿಯಡ್ಕ, ಮೇ 18: ಸ್ಥಳೀಯ ಕ್ರಿಕೆಟ್ ಗೊಬ್ಬುದ ಪೊರ್ತುಡು ನಡತಿನ ವಾಗ್ವಾದ ಒಂಜಿ, ಬ್ಯಾಂಕ್ದ ಭದ್ರತಾ ಸಿಬ್ಬಂದಿನ್ ಆರೆನ ಬೇಲೆದ ಜಾಗೆಡೇ ಬೀಸತ್ತಿ ಪಾಡ್ದ್ ಕೆರ್ಪುನಡೆ ಮುಟ್ಟ ಎತ್ತಿನ ನಡಕೆ ಕುಂಬಡಾಜೆ ಪಂಚಾಯತ್ ಸೀಮೆಡ್ ನಡತ್ದ್ಂಡ್.
ಕುಂಬಡಾಜೆ ಬದ್ರು ಕುಡ್ಲು ಹೌಸ್ ನಿವಾಸಿ ಸುರೇಶ್ ಬಿ.ಕೆ (42) ತೀರ್ದಿನಾರ್. ಮೇರ್ ಕುಂಬಡಾಜೆ ಸೇವಾ ಸಹಕಾರಿ ಬ್ಯಾಂಕ್ಡ್ ಸೆಕ್ಯೂರಿಟಿ ಬೇಲೆ ಮಲ್ತೊಂದಿತ್ತೆರ್.
ನಡಕೆದ ಒಲವು: ಐತಾರ ಬಯ್ಯಡ್ ಕುಂಬಡಾಜೆ ಪಂಚಾಯತ್ ಮೈದಾನೊಡು ಕ್ರಿಕೆಟ್ ಗೊಬ್ಬುದ ಅಟ್ಟನೆ ಮಲ್ತಿತ್ತೆರ್. ಈ ಪೊರ್ತುಡು ಸುರೇಶ್ ಬೊಕ್ಕ ಆರೆನ ಮಗಕ್ಲಾ ಬೊಕ್ಕ ಅಲ್ಪದ ಜವನೆರೆ ಕೂಟೊಗ್ಲಾ ಪಾತೆರೊಗು ಪಾತೆರ ಬುಲೆದ್ ಬಾರೀ ಲಡಯಿ ಆತ್ಂಡ್. ಈ ಲಡಯಿಡ್ ಪಗೆಕಟೊಂದು ಆರೋಪಿಲು ರಾತ್ರೆ ಬೇಪು ಪಾಡ್ದೆರ್. ರಾತ್ರೆ 9.25 ತ ಅಂದಾಜಿಗ್ ಸುರೇಶ್ ಮಾರ್ಪಿನಡುಕ್ಕ ಜಂಕ್ಷನ್ಡ್ ಇಪ್ಪುನ ಬ್ಯಾಂಕ್ದಲ್ಪ ಉಂತುದಿಪ್ಪುನಗ ಅವ್ವೇ ಗ್ರಾಮೊದ ಕಿರಣ್ ಬೊಕ್ಕ ಅಖಿಲೇಶ್ ಪನ್ಪಿನಕುಲು ಒರರ್ದ್ ಒರಾನೆ ದಾಳಿ ಮಲ್ತ್ದೆರ್. ಕಿರಣ್ ಸುರೇಶ್ಗ್ ತಾರಾಮರ ಬೀಸತ್ತಿ ಪಾಡ್ದ್ ಗಾತಿದ ಗಡಿ ಮಲ್ತಿತ್ತ್ದ್, ಅಖಿಲೇಶ್ ಈ ಕೃತ್ಯೊಗು ಕೈತಾಂಗ್ ಕೊರ್ತೆ ಪನ್ದ್ ಪೊಲೀಸೆರ್ ತೆರಿಪಾದೆರ್.
ಪ್ರಕರಣ ದಾಕಲ್: ನೆತ್ತೆರ್ದ ಮಡುಟು ಬೂರ್ದಿತ್ತಿನ ಸುರೇಶ್ ರೆನ ಅರಬಾಯಿ ಕೇನ್ದ್ ಸ್ಥಳೀಯೆರ್ ಅಪಗನೇ ಆರೆನ್ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ಆರ್ ತೀರ್ದೆರ್ ಪನ್ದ್ ಡಾಕ್ಟರ್ ಘೋಷಣೆ ಮಲ್ತ್ದೆರ್. ತೀರ್ದಿನಾರೆನ ಮಗೆ ಸುಭಾಷ್ ಬರೆಪಾದಿನ ಒಯಿಲ್ದ ಪ್ರಕಾರ ಬದಿಯಡ್ಕ ಪೊಲೀಸೆರ್ ಕೆರ್ತಿನ ಪ್ರಕರಣ ದಾಕಲ್ತೊಂದೆರ್. ದೆಂಗ್ತಪ್ಪಾದಿನ ಆರೋಪಿಲೆನ್ ಪತ್ತೆರೆ ಜಡ್ತೆ ಮಲ್ತೊಂದುಲ್ಲೆರ್.