Last updated on May 18th, 2026 at 07:02 pm
ಪುತ್ತೂರ್, ಮೇ.18: ಪುತ್ತೂರ್-ಮಾಣಿ ರಾಜ್ಯ ಪೆರ್ಸಾದಿದ ಮಿತ್ತೂರ್ಗ್ ಕೈತಲ್ದ ಕೂವೆತ್ತಿಲ ಪನ್ಪಿನಲ್ಪ ಮಹಿಂದ್ರಾ ಪಿಕಪ್ ಗಾಡಿ ಬೊಕ್ಕ ಅಕ್ಟಿವಾ ಸ್ಕೂಟರ್ದ ನಡುಟು ನಡತಿನ ಭೀಕರ ಎಡ್ತೆಡ್ ಗಾತಿದ ಗಡಿಕುಲಾದಿತ್ತಿನ ಸ್ಕೂಟರ್ ಬುಡೊಂದಿತ್ತಿನಾರ್ ಮರ್ದ್ ಪಲಿಪಂದೆ ಕುಡ್ಲದ ಪ್ರೈವೇಟ್ ಆಸ್ಪತ್ರೆಡ್ ತೀರ್ದೆರ್.
ಮೂಲತಃ ಮುಕ್ವೆ ಮಣಿಯ ನಿವಾಸಿ ಆದಿತ್ತ್ದ್, ಇತ್ತೆ ಕಬಕ ಡ್ ಇಪ್ಪುನ ಸಲೀಂ (52) ತೀರ್ದಿನಾರ್. ಮೇರ್ ಸೋಫಾ ಬೊಕ್ಕ ಗಾಡಿಲೆನ ಕುಶನ್ ಬೇಲೆ ಮಲ್ತೊಂದಿತ್ತೆರ್.
ಸಲೀಂ ಮೇರ್ ಮಿತ್ತೂರ್ದ ದಾರುಲ್ ಇಸ್ಲಾಂ ಶಿಕ್ಷಣ ಸಂಸ್ಥೆದ ಗಾಡಿದ ಬೇಲೆ ಮಲ್ತ್ದ್ ಪಿರ ಬರೊಂದುಪ್ಪುನಗ ಈ ಎಡ್ತೆ ನಡತ್ದ್ಂಡ್. ಕಬಕ ದಂಚಿರ್ದ್ ಪುತ್ತೂರ್ ದಂಚಿ ಬಾರೀ ಬರಸ್ಡ್ ಬತ್ತಿನ ಮಹಿಂದ್ರಾ ಪಿಕಪ್ ಗಾಡಿ ಸಲೀಂ ಬುಡೊಂದಿತ್ತಿನ ಅಕ್ಟಿವಾ ಸ್ಕೂಟರ್ಗ್ ಎಡ್ತ್ದ್ಂಡ್.
ಎಡ್ತೆದ ಬರಸ್ಗ್ ಸಲೀಂ ಮೇರ್ ಸಾದಿಗ್ ರಟ್ಟ್ದ್, ಹೆಲ್ಮಟ್ ಪಾಡ್ದಿತ್ತ್ಂಡಲಾ ತರೆ, ಕೈ ಬೊಕ್ಕ ಕಾರ್ಗ್ ಗಾತಿದ ಗಡಿಕುಲಾತ. ಆರೆನ್ ಅಪಗನೇ ಪುತ್ತೂರ್ದ ಆಸ್ಪತ್ರೆಗ್ ದಾಕಲ್ತ್ದಿತ್ತ್ದ್, ಬೊಕ್ಕ ಎಚ್ಚಿಗೆ ಮರ್ದ್ಗ್ ಕುಡ್ಲದ ಪ್ರೈವೇಟ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಂಡ ಮರ್ದ್ ಪಲಿಪಂದೆ ಆರ್ ತೀರ್ದೆರ್.
ಸ್ಕೂಟರ್ಗ್ ಎಡ್ತಿಬೊಕ್ಕ ಡ್ರೈವರ್ನ ಅಂಕೆ ತತ್ತ್ದ್ ಮಹಿಂದ್ರಾ ಪಿಕಪ್ ಸಾದಿ ಬರಿಕ್ ಪೊಗ್ಗ್ದ್ ಪಲ್ಟಿ ಆತ್ಂಡ್. ಪಿಕಪ್ ಡ್ರೈವರ್ನ ಬೀಸದ ಬೊಕ್ಕ ಗೋಸ್ಮರಿದ ಡ್ರೈವಿಂಗ್ಗ್ ಒಂಜಿ ಜೂವ ಪೋಂಡು ಪನ್ದ್ ಮುಲ್ಪದಕುಲು ಆಕ್ರೋಶ ತೂಪಾದೆರ್.
ಎಡ್ತಿಬೊಕ್ಕ ಪಿಕಪ್ ಗಾಡಿದ ನಂಬರ್ ಪ್ಲೇಟ್ಗ್ ಕಪ್ಪು ರಂಗ್ ಪೂಜಿದಿನ ಸಾರ್ವಜನಿಕೆರೆಡ ಅನುಮಾನೊಗು ನೆವನ ಆದಿತ್ತ್ದ್, ನಡಕೆದ ಬಗೆಟ್ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.