Last updated on May 30th, 2026 at 09:23 am
ಕುಡ್ಲ, ಮೇ. 30: ಪೋವೊಂದಿತ್ತಿನ ಬಸ್ಸ್ರ್ದ್ ತತ್ತ್ದ್ ಬೂರ್ದ್ ಗಡಿಕುಲಾದಿತ್ತಿನ ಪೊಂಜೊವು ಬೊಕ್ಕ ಬಾಲೆನ್ ಪೊರ್ತುಡು ರಕ್ಷಣೆ ಮಲ್ತ್ದ್ ಆಸ್ಪತ್ರೆಗ್ ದಾಕಲ್ಪುನ ಮಕೇನ ಪ್ರೈವೇಟ್ ಬಸ್ ಡ್ರೈವರ್ ದಯಾನಂದ ಮರಕಡ ಬೊಕ್ಕ ಕಂಡಕ್ಟರ್ ಸಂದೀಪ್ ಪಂಜಿಮೊಗೇರ್ ಮೊಕುಲು ಮಾನವೀಯತೆ ತೋಜಾದಿನ ನಡಕೆ ಮರಕಡ ಜಂಕ್ಷನ್ಡ್ ನಡತ್ದ್ಂಡ್. 13B ‘ಮಾಸ್ಟರ್’ ಪುದರ್ದ ಬಸ್ಸ್ದ ಡ್ರೈವರ್ ದಯಾನಂದ್ ಬೊಕ್ಕ ಕಂಡಕ್ಟರ್ ಸಂದೀಪ್ ಮೊಕಲೆನ ಈ ಸಮಯಪ್ರಜ್ಞೆದ ಬೇಲೆನ್ ಮಾತೆರ್ಲಾ ಪುಗರೊಂದುಲ್ಲೆರ್.
ಮರಕಡ ಜಂಕ್ಷನ್ಡ್ ಬೇತೆ ಒಂಜಿ ಬಸ್ಸ್ರ್ದ್ ಪೊಂಜೊವು ಒರ್ತಿ ತನ್ನ ಬಾಲೆದ ಒಟ್ಟುಗು ಆಕಸ್ಮಿಕವಾದ್ ತಿರ್ತ್ ಬೂರ್ದೆರ್. ಬೂರ್ದಿನ ಬರಸ್ಗ್ ಅಪ್ಪೆ ಬಾಲೆ ಇರ್ವೆರೆಗ್ಲಾ ಗಡಿಕುಲಾದಿತ್ತ, ಅವ್ವೇ ಪೊರ್ತುಡು ಆ ಸಾದಿಯೆ ಕುಡ್ಲದಂಚಿ 13B ಮಾರ್ಗೊದ ‘ಮಾಸ್ಟರ್’ ಪುದರ್ದ ಪ್ರೈವೇಟ್ ಬಸ್ ಬರೊಂದಿತ್ತ್ಂಡ್. ಸಾದಿಗ್ ಬೂರ್ದು ಗಡಿಕುಲಾತಿನ ಪೊಂಜೊವು ಬೊಕ್ಕ ಬಾಲೆನ ತೂಯಿನ ಬಸ್ ಸಿಬ್ಬಂದಿ ಅಪಗನೇ ಅಲರ್ಟ್ ಆತೆರ್.
ಸಾಮಾನ್ಯವಾದ್ ಗೊತ್ತುಮಲ್ದಿನ ಪೊರ್ತುದುಲಯಿ ಎತ್ತೊಡಾಯಿನ ಒತ್ತಮೆಡ್ ಇಪ್ಪುನ ಪ್ರೈವೇಟ್ ಬಸ್ ಸಿಬ್ಬಂದಿ, ಮುಲ್ಪ ಅಕಲೆನ ರೂಟ್ದ ಟ್ರಿಪ್ ಅತ್ತ್ಂಡ ಟೈಮ್ದ ಬಗೆಟ್ ಒಂಚೂರುಲಾ ಅಲೆಚನೆ ಮಲ್ದಿಜೆರ್. ಅಪಗನೇ ಅಕಲೆನ ಬಸ್ನ್ ಉಂತಾದ್, ಐಟ್ ಇತ್ತಿನ ಪ್ರಯಾಣಿಕೆರೆಗ್ ಪರಿಸ್ಥಿತಿ ಮನವರಿಕೆ ಮಲ್ಪಾದ್, ಅಕಲೆನ್ ಬೇತೆ ಬಸ್ಸ್ಡ್ ಸುರಕ್ಷಿತವಾದ್ ಕಡಪುಡ್ದೆರ್.
ಬೊಕ್ಕ ಗಡಿಕುಲಾತಿನ ಅಪ್ಪೆ-ಬಾಲೆನ್ 13B ಬಸ್ಸ್ಡೇ ಬಾರೀ ತುರ್ತಡ್ ಕುಡ್ಲದ ಎ.ಜೆ. ಆಸ್ಪತ್ರೆಗ್ (A.J. Hospital) ಲೆತೊಂದು ಪೋತೆರ್. ಬಸ್ ಸಿಬ್ಬಂದಿ ದಯಾನಂದ್ ಬೊಕ್ಕ ಸಂದೀಪ್ ಮೊಕಲೆನ ಈ ನಿರ್ಧಾರ ಬೊಕ್ಕ ಕರ್ತವ್ಯೊರ್ದು ಮಾನವೀಯತೆ ಮಲ್ಲೆ ಪನ್ದ್ ತೋಜಾಯಿನ ಗುಣೊನು ಸಾರ್ವಜನಿಕೆರ್, ಪ್ರತ್ಯಕ್ಷದರ್ಶಿಲು, ಸಾಮಾಜಿಕ ಬಲೆತ್ತಾನೊಡು ಪುಗರೊಂದುಲ್ಲೆರ್.