Last updated on May 1st, 2026 at 03:41 pm
ಬೆಂಗಳೂರ್, ಮೇ 01: ಸೆಕೆಂಡ್ ಪಿಯುಸಿ ಪರೀಕ್ಷೆ ಬರೆದ್ ಸಿಇಟಿಡ್ ರ್ಯಾಂಕ್ ಬತ್ತಿನೇ ಜೋಕುಲೆನ್ ಇಂಜಿನಿಯರಿಂಗ್ ಕೋರ್ಸ್ಗ್ (Engineering) ಸೇರಾಂಡ ಮುಗೀಂಡ್. ನಾಲ್ ವರ್ಸ ಕರಿನನೇ ಕ್ಯಾಂಪಸ್ ಇಂಟರ್ವ್ಯೂ ಡ್ ಬೇಲೆ ತಿಕ್ಕ್ದೇ ತಿಕ್ಕುಂಡು ಪನ್ಪಿ ಭಾವನೆ ಎಚ್ಚಿನ ಅಪ್ಪೆಅಮ್ಮಡ ಉಂಡು. ಆಂಡ, ಇಂದೆಕ್ ತದ್ವಿರುದ್ಧವಾಯಿನ ಅಂಚೆನೇ ಆಘಾತಕಾರಿಯಾಯಿನ ವಿಚಾರ ಒಂಜಿ ಇತ್ತೆ ತೆರಿದ್ ಬೈದ್ಂಡ್. ಕರ್ನಾಟಕೊದ ಇಂಜಿನಿಯರಿಂಗ್ ಪದವೀಧರೆರೆಡ್ ಕಾಲಿ ಶೇ. 17 ದಾತ್ ಜನಕ್ ಮಾತ್ರ ಬೇಲೆ ತಿಕ್ಕೊಂದುಂಡು ಪನ್ದ್ ಕರ್ನಾಟಕ ಇಂಜಿನಿಯರಿಂಗ್ ಶಿಕ್ಷಣ ಪರಿವರ್ತನೆ ಸುಧಾರಣಾ ಸಮಿತಿ ಸಂದಾದಿನ ವರದಿ ಬಹಿರಂಗ ಮಲ್ತ್ದ್ಂಡ್. ಪನ್ಡ, ರಾಜ್ಯೊದ ಶೇ. 83 ದಾತ್ ಇಂಜಿನಿಯರಿಂಗ್ ಪದವೀಧರೆರೆಡ ಉದ್ಯೋಗ ಮಾರ್ಕೆಟ್ಗ್ ಬೋಡಾಯಿನ ಕೌಶಲ್ಯ ಇಜ್ಜಂದೆ ನಿರುದ್ಯೋಗಿಲಾವೊಂದುಲ್ಲೆರ್.
ಬೇಲೆದಾಂತಿನೆಕ್ ನೆವನ ದಾದ?
ಪ್ರೊ. ಸಾದಗೋಪನ್ ಮುತಾಲಿಕೆದ ತಜ್ಞೆರೆ ಸಮಿತಿ ಉದ್ಯೋಗದ ಈ ಗಂಭೀರ ಕುಂದೆಲ್ಗ್ ಪಾಕ ಪ್ರಮುಖ ನೆವನೊಲೆನ್ ಪಟ್ಟಿ ಮಲ್ದ್ಂಡ್. ಕಂಪ್ಯೂಟರ್ ಸೈನ್ಸ್ ಪದವೀಧರೆರೆಗ್ ಉದ್ಯೋಗಾವಕಾಶೊದ ಕುಂದೆಲ್ರ್ದಾವರ ಎಚ್ಚಿಗೆ ಪ್ರಮಾಣೊದ ನಿರುದ್ಯೋಗ ಉಂಡಾತ್ಂಡ್. ಮೆಕ್ಯಾನಿಕಲ್, ಸಿವಿಲ್ ಬೊಕ್ಕ ಎಲೆಕ್ಟ್ರಿಕಲ್ ದಂಚಿನ ಮೂಲ ಇಂಜಿನಿಯರಿಂಗ್ ವಿಭಾಗೊಲೆಗ್ ದಾಖಲಾತಿ ಬಾರೀ ಕಮ್ಮಿ ಆತ್ಂಡ್. ಒಂಜಿ ಕಾಲೊಡು ರಾಷ್ಟ್ರೀಯ ಬೊಕ್ಕ ಅಂತರಾಷ್ಟ್ರೀಯ ಮಟ್ಟೊಡು ಪುದರ್ ಮಲ್ತಿತ್ತಿನ ರಾಜ್ಯೊದ ಇಂಜಿನಿಯರಿಂಗ್ ಕಾಲೇಜ್ಲೆಡ್ ಇತ್ತೆ ಶಿಕ್ಷಣೊದ ಗುಣಮಟ್ಟ ಜತ್ತ್ದ್ಂಡ್. ವಿದ್ಯಾರ್ಥಿಲೆಡ ಇನಿತ ಮಾರ್ಕೆಟ್ಗ್ ಬೋಡಾಪಿನ ಸ್ಪರ್ಧಾತ್ಮಕ ಕೌಶಲ್ಯೊಲೆನ ಕುಂದೆಲ್ ಲಕ್ಕ್ದ್ ತೋಜೊಂದುಂಡು.
ಈ ಶಿಕ್ಷಣೊದ ತಲೆಪುನು ಸಮ ಮಲ್ಪೆರ ರಾಜ್ಯ ಸರ್ಕಾರ ಕರ್ನಾಟಕ ಇಂಜಿನಿಯರಿಂಗ್ ಶಿಕ್ಷಣ ಸುಧಾರಣಾ ಪ್ರಾಧಿಕಾರ (KEERA) ಉಂಡು ಮಲ್ಪೆರ ಲೆಕ್ಕ ಪಾಡೊಂದುಂಡು. ಉನ್ನತ ಶಿಕ್ಷಣ ಸಚಿವೆ ಡಾ. ಎಂ.ಸಿ. ಸುಧಾಕರ್ ಮೇರ್ ಈ ಬಗೆಟ್ ಬೇಗೊಡೇ ಬೇತೆನೇ ಕಾಯ್ದೆ ಕನಪ ಪನ್ದ್ ತೆರಿಪಾದೆರ್.